[Yuusawu roye jaman yinmankaaxun ŋa.]
31
Ken falle Muusa ri digaamu Banisirayilaganko su kafumanton da. 2 A ti i da : « N wuyin wa kame do tanpille siine yi lenki, n ra ntaxa in sigan fakka, Tunka Duumanten xa ti in da : “ An nta ke Yaradefanŋe kuttu. ” 3 Tunka Duumanten yinme ya n wareene axa kaane, axa Alla, a ya na ku xabiilanu buruxana bakka axa kaane, axa na i ɲiiɲen raga i ya. Yuusawu xa ya n wareene axa kaane, xo Tunka Duumanten ga da a ko moxo be. 4 Tunka Duumanten wa ku xabiilanu gajanŋa, xoyi a ga da Sihoona do Wooga ɲa moxo be, Hamoorikaarankon tunkanyugun do i jamaanu, a ga da i ɲama.* 5 Tunka Duumanten wa i roono axa kittun ŋa, axa na i ɲa xoyi in ga da axa ɲaamari moxo be. 6 Xa da duruxoto, axa na butten wutu, xa maxa kanu, xa maxa jooti i kaane, baawo Tunka Duumanten yinme ya ni do axa yi, axa Alla. A nta axa walla, a nta axa sedde ! »7 Ken falle Muusa da Yuusawu xiri Banisirayila su jon ŋa nan ti a da : « Xoto, an na butten wutu, baawo, an ya do ke jama nan roono jamaane be Tunka Duumanten ga kuna ti a yi i faabanu da, nan ti i wa a kinni i ya, an ya na a taxandini i ya xo faabanxaye. 8 Tunka Duumanten ya n wareene an kaane, a ya na do an batten ŋa ; a nta an walla, a nta an sedde, maxa kanu, maxa du wara. »
[Sariyan xaranŋunde siino ɲeri su yi]
9 Muusa da ke sariya safa na a kini sadaxakiɲandaanon ŋa, Leewi renmu ku, Tunka Duumanten laayidun waxanden gaa i be maxa, a kini i do Isirayila xirisun su ya yi. 10 Muusa da i ɲaamari ti : « Siino ɲeri su, axa ga na ɲi tanbunun buruxana gupun sallen* ŋa, 11 Tunka Duumante axa Alla ga da dingira be sugandi, Isirayila su gaa riini taŋe aken Alla yi non ŋa bire be, axa na ke sariya xara Isirayila su jon ŋa, i na a terinka. 12 An na jaman kafu me yi, yugon do yaxare, leminen do xirise, nan daga a wara mukke be gaa axa debun ŋa, kuudo i na a mugu, i na a tu, kuudo i na kanu Tunka Duumanten ŋa, axa Alla, i na ke sariya digaamun su tanga na i golli. 13 Axa gaa riini ke ɲiiɲe be xallaaxu Yaradefanŋe falle, na a toxo axa gaa bireene ken ɲiiɲe kanma, axa renmu be ga nta sariya ke tu, i na a mugu waxati su, i na saage kanna Tunka Duumanten ŋa, axa Alla. »
[Yuusawu ɲanŋe Annabi Muusa battamaxen ŋa]
14 Tunka Duumanten daali Annabi Muusa da : « An faatiyen kootan tinko. Yuusawu xiri, an do a n sigi genmanlenmaaxuntilliisen ŋa, kuudo in na a ɲaamari. » Muusa do Yuusawu ri, i sigi genmanlenmaaxuntilliisen ŋa. 15 Tunka Duumanten bange tabullungondoman noxon ŋa genmanlenmaaxuntilliisen ŋa, nan sigi tilliisen raqe. 16 A daali Muusa da : « A waajibi an nan daga an seri fanon ɲi. Ayiwa ke jama kundu wa fillakafini, i gaa roono jamaane ke be yi, i wa kapa ken jamaane seron ŋa na kaman sagatanto batu. I na inke wara ; n ga da laayidu ke be ro in do i naxa, i na a guruja. 17 N na butu i wure ken waxati yi, n na i wara, n na in falle koyi i ya, i na ɲa jiirefon ŋa, masiibon do kasaaran gaben na xenu i kanma. Ken koota i yinme na ti : “ O Kaman ga nta do o batten ŋa ya ni ku masiibonu kundu ga da o kita. ” 18 Ken koota, n na in falle koyi i ya, na a sababun ɲa i ga da fo bure ke be su dabari, nan saage katta kamanu tananu yi. 19 Saasa kuŋa, xa da ke xesiida safa du da, axa na a ro Banisirayilaganko raqun ŋa, na a xaranŋundi i ya in da, a na ɲaŋi in da seeda yi i xanne maxa. 20 Baawo ke ɲiiɲe be in ga da a laayidun wutu i seri fanon da ti in wa a kinni i ya, ken ga ni xattin do tamarileeman waranlaqen ɲiiɲen ŋa, n ga na i rondi ken ɲiiɲe yi bire be, i ga na yige nan fogu, i ga kato, i yillene katta kamanu tananu ya yi, i na kun batu, i na inke yebure, na in laayidun guruja. 21 Bire be masiibon do kasaaran gaben ga na xenu i ya, ke xesiida be gaa i maxa, a na seede ti i ya, baawo i bonsonŋu ku na a tangana ya, i nta mungunu do a yi. I sinmeyen gaa wurunu ke be yi saasa, n wa ken tu gelli in ga ma i rondi ɲiiɲe ke yi, ken ga ni in ga da ɲiiɲe ke be laayidun wutu i da ti kunayen ŋa. » 22 Ken koota, Muusa da ke xesiida safa, a da Banisirayilaganko xaranŋundi a yi. 23 Ken falle, Tunka Duumanten da Nuunu renme Yuusawu ɲaamari nan ti a da : « Duruxoto, an nan saako, baawo ɲiiɲe ke be in ga da a laayidun wutu axa da ti kunayen ŋa, anken ya na Banisirayilaganko rondini, ayiwa in wa ɲaana do an batten ŋa. »
24 Bire be Annabi Muusa ga duguta sariya ke ku digaamu kundu su safanden ŋa kitaaben ŋa, 25 Leewikaarankon be gaa Tunka Duumanten laayidunwaxanden wuttu, a ti i da : 26 « Xa da ke sariyankitaabi safante kundu raga, xa na a saxundi Tunka Duumante axa Alla laayidunwaxanden kaaran ŋa, a na ɲa seeda yi axa xanne maxa non ŋa. 27 Nke wa a tu mene, nan ti murutinton do xandunxoton ya ni axa yi. Gelli in biranten du, na in do axa toxo doome, axa wa murutini katta Tunka Duumanten ŋa. Ayiwa in ga na kara xa ? 28 Saasa kuŋa, xa da axa xirisun do axa xabiilanyinmankon meeɲindi in noqu, kuudo in na ku digaamu koni i tarun ŋa, kanmun do ɲiiɲen na seede ti i ya i xanne maxa. 29 Baawo in wa a tu nan ti in kallen falle, axa bonondindini ya nan sanku bakka kille ke be in gaa axa ɲaamari ti a yi. Koota riyinton ŋa, masiibon na xenu axa yi, baawo axa na fo buren ya dabarini Tunka Duumanten jon me naxa, axa na a butundini ti axa ɲangolli dabarinton ŋa ya. » 30 Muusa da xesiida ke digaamun su suugu Banisirayilaganko jaman danman su taron ŋa, ma a gaa tinmeene.