30
« Ken kuŋa, Tunka Duumante axa Alla ga na axa sanqi-sanqi do duna jamon naxan ŋa bire be, ku fi koninto kundu ga ri na axa kita kun jamo naxan ŋa, ku duwaawunu do ku langandu beenu in ga da i kiɲandi axa yi, axa ga na nimisi do i batten ŋa, 2 axa nda du rasaaga katta a yi, axakun do axa renmu, axa nda a digaamen terinka ti axa sondomun do axa yonkinun su yi, xo moxo ke be in ga da axa ɲaamari lenki, 3 Kaman Tunka Duumanten wa tooran yillandini bakka axa kanma, na axa neema. A ga da axa sanqi-sanqi do jamo be su naxa, a na axa kafu me yi na axa saagandi. 4 Hari a ga na ɲi axa sedinton gaa noqu laate ya yi, kanmu ke wure ya ga ni, Tunka Duumante axa Alla yinme na axa kapa me yi ya, na axa saagandi riini. 5 Tunka Duumante axa Alla wa axa saagandini riini ɲiiɲe ke be axa seri fanon ga da a xallaaxu. A na siro katta axa yi, a na axa gabondi nan fuŋo axa seri fanon ŋa. 6 A na axa do axa bonsonŋun sondomun senondi, kuudo axa na Alla xanu, Tunka Duumante. Axa na a xanu ti axa sondomun su yi, na a xanu ti axa yonkinun su yi, kuudo axa na bire. 7 Ken bire, Tunka Duumante axa Alla, a na ku langandu su xenundi axa xonno beenu gaa axa xonno na axa tooro. 8 Ganta axakun ku, axa saagene katta Tunka Duumanten ya yi, na a terinka. N ga da axa ɲaamari ti ɲaamarindixanne su yi lenki, axa na golli ti a yi. 9 Tunka Duumante axa Alla, a na axa kittiragollen su sirondi na a jiidi, ken do axa bonsonŋu, a do axa daabangooru, kafiini axa funtifon su yi. A na saage sewoono ti i fosiriɲanŋen ŋa axa da, nan siro katta axa yi, xoyi a ga sewo ti i fisiriɲanŋen ŋa axa seri fanon da moxo be. 10 Ke su ni ya de, axa ga na Tunka Duumante axa Alla digaamen terinka, nan saage katta a yi ti axa sondomun su do axa yonkinun su yi, a farilanun do a ɲaamarindixannu beenu safanton gaa ke sariyankitaabe yi, na i tanga.11 « Iyo ! N gaa ke ɲaamarindixanne be kinni an ŋa lenki, a ma xoto an da buru, axa gaa korini a da. 12 A nta kanmun ŋa, axa gaa tini : “ Ko n segene nan daga a yanqandi o da, na a mugundi o yi, kuudo o nan golliɲa ti a yi ? ” 13 A nta geeji xa falle yi, axa gaa tini : “ Ko xa na geeji kuttu nan daga a wutu o da, a gaa a mugundini o yi, kuudo o na a gollen ɲa ? ” 14 Tonŋu, an do daalen nan tinka, a wa an raqen do an sondomen ŋa an ra gaa a gollen dabarini.
15 « An da a wari, lenki in wa bireyen do xeerin roono an jon ŋa, a do kallen do bone. 16 Nke ga da an ɲaamari ke be yi lenki, nan ti an na Tunka Duumanten xanu, an Alla, an na a batu, na a ɲaamarindixannun batu, a do a farilanun do a kiitu, ken ŋa, an na bire, an na jiidi, an gaa roono jaman kininte ke be yi na a xallaaxu, Tunka Duumanten xa na bareke ro an ŋa a noxon ŋa. 17 Xa an ga na an falle koyi, an ga ma terinke, an ga na sujudi alla tananu da, na i batu, 18 n wa axa xibaarini lenki nan ti axa wa buruxeene bogo-bogo, ɲiiɲe ke xa be axa gaa Yaradefanŋe karana katta yi na a xallaaxu, axa biton ntaxa giiloono non ŋa. 19 Kanmun do ɲiiɲen wa in seeda lenki : n da bireyen do kallen ya wara axa wure, a do xeerin do bone. Xa da bireyen sugandi, kuudo axa do axa bonsonŋun na bire. 20 Axa na Tunka Duumanten xanu xa, axa Alla, na a terinka, na axa du do a tafu. Axa gaa ɲiiɲe ke be kanma, Tunka Duumanten ga kuna ti i wa a kini an faabanu yi, Ibirahiima do Isiyaaxa, a do Yaaxuba, axa bireene non ŋa ken moxo ya, axa biton giiloono ken moxo ya yi. »