29
Annabi Muusa da Banisirayila su gangu nan ti i da : « Tunka Duumanten ga da ke be ɲa Firawunan do i kafon do i ɲiiɲen danman su yi Misira, axa yinmenu da ken wari ti axa yaaxen ŋa. 2 Kun yanganxata xooro do kun kaawafiinu, a do kun fi lasamanto, axa yinmenu seede kun ŋa ti yaaxarawallen ŋa. 3 Xa ke su kanma, ma ke lenki, Tunka Duumanten ma sondomu kini axa yi i gaa faamini, a ma yaaxo kini axa yi i gaa warini, a ma taru kini axa yi i gaa mugini. 4 A da axa terendi gunjuran ŋa tannaxate siine ; axa yiraamu be gaa rondini axa yi i ma xaso ; axa tepunu beenu gaa axa taanun ŋa i ma kuti. 5 Axa ma buuru yiga, axa ma reesendolo mini, axa ma mandefo mini. Ke su ni ya axa na a tu nan ti aken ya ni Tunka Duumanten ŋa, axa Alla. 6 Bire be axa ga kiɲe ke noqu yi yere, Sihoona bogu, ken ga ni Hesiboona tunkan ŋa, a do Wooga, Basaani tunka, nan ti i wa o gajanŋa.xa o da i ni. 7 O da i ɲiiɲen raga i ya, na a kini Rubeenikaarankon do Gaadikaarankon do Manaase fonlaqen taxanden ŋa faabankutiye yi.8 « Ken kuŋa, xa da ku laayidunu tanga, xa nan golli ti i ya, kuudo axa gaa fo wo fo su gollini, axa na wulluliŋontaaxu a noxon ŋa. 9 Axa danmon su siginton ya na Tunka Duumanten jon me naxa lenki, axa Alla : xabiilan yinmanko, xirisu, a do yaaxamaxo, kafiini Isirayila yugon su yi, 10 ken do yaxarun do leminu, a do mukkunu beenu gaa axa noxon ŋa daaxa ke yi, ken do ku beenu gaa suwana axa da, i gaa ɲoŋono axa da, 11 kuudo Tunka Duumante axa Alla gaa laayidu ke be wuttu axa da lenki, nan kuna a kanma, axa su na ro ken ŋa. 12 A wa axa ɲaana i duudanjaman ŋa lenki, a wa ɲaana axa da kamane yi, xo moxo be a ga da a laayidun wutu axa da nan kuna axa seri fanon da, kun ga ni Ibirahiima do Isiyaaxa do Yaaxuba yi. 13 Ke laayidu be kundu a ga kuna a kanma, a nta do axakun baane batten ŋa de ! 14 Ku sero beenu su gaa sikki Tunka Duumanten o Alla jon me naxan ŋa yere yi ke lenki, kun baane fe. Ku xa beenu ga nta do o yi yere lenki, a wa kun xa da.
15 « Axa yinmenu wa a tu o ga ɲi Misira jamaanen ŋa moxo be, ken do o ga da jamon noxon booxo do killen ŋa moxo be yi katta yere. 16 Axa da i munu ɲexunto ku wari, ku beenu gaa i maxa, sollu do gidu, a do kanŋu do xaalisixullu. 17 Ken kuŋa, yugo ma yaxare n maxa ɲa kafiini axa yi lenki, walla xabiila ma fonlaqe, a sondomen gaa fallakoyini Tunka Duumante o Alla yi, a n maxa daga kun jamo munonun batu, kuudo sababu bure n maxa ɲa kafiini axa yi, ken gaa saarene ti golli bure yi ma golli haraamunte. 18 Ayiwa sere be ga na ke kunaxanne digaamun mugu, nan yille xeerin jigini i du da ken falle, na a koni i noxon ŋa ti : “ Hari in ga na in kille tera, fo wo fo nta a yi ”, ken sere maxankuton faayi : Ken kaman wa ɲaana sababu yi na sokki xayen buyi do sokki kaawanten ŋa. 19 Tunka Duumanten nta duŋene xafarini a kaman da, ganta a tallan buttu a wure ya, langande su gaa ke kitaabe noxon ŋa, a wa xenne a kaman ŋa. Tunka Duumanten na a toxon buruxa bakka duna yi. 20 Tunka Duumanten na a kaman booxo bakka Isirayila xabiilanun ŋa. Langande su jaaten gaa do ku saratinu gurujanden batten ŋa, i safanten gaa ke sariyankitaabe kundu yi, a na a su yanqandi a kanma. 21 Ku masiibonu beenu gaa xenne axa jamaanen ŋa, a do wattu beenu Tunka Duumanten ga da axa katu ti i ya, xa renmu beenu gaa saareene axa falle, a do mukkunu beenu gaa gilli noqu laatun ŋa nan ri, i wa tini : 22 ɲiiɲen guruje, sapen do tinbiritin funti ti a yi na a buyi, soxen ra nta ɲaana, tebe nta bakka, funtifo nta funtini. A ɲa xo Sodoomu do Hamoora moxon ŋa, a do Hadima do Sebuyiimu, kun debu be Tunka Duumanten ga da i guruja ti i butten yanganxata xoten ŋa. 23 Ma duna kutten su ga da a ko nan ti : “ Manne n sigi Tunka Duumanten ga da ke ɲa ke ɲiiɲe yi ? Manne n da a butundi ke butuyi xote yi ? ” 24 Seron na ti : “ Ke na i kitta ya, baawo Tunka Duumante, i faabanu Alla, a ga da laayidu be tafu i do i naxan ŋa bire be i gaa bakka Misira jamaanen ŋa, i da ken ya guruja. 25 I daga du wara kamane tana ya batunden ŋa, nan sujudi a da. Kamane be i nta a tu, Alla ma a deni i da. 26 Ken ya n sigi Tunka Duumanten ga da butuyi xoten butu ke jamaane wure, langande su safanten gaa ke kitaabe yi, a da a su xenundi i ya. 27 Tunka Duumanten da butuyi xoten butu katta i ya, na i xiili bakka i jamaanen ŋa, na i sedi jamaane tana yi, xo axa yaaxen gaa i ya moxo be yi lenki. ” 28 Fi muxunton na Tunka Duumanten ya da, o Alla, xa ke sariya ku laayiduxannu kundu, a da i bangandi o do o renmun danŋa ya, kuudo o nan abadangolli ti i ya.