[Alla barekinde]
28
« Axa ga na Tunka Duumante axa Alla sefon terinka, N gaa axa ɲaamarini ti ku beenu yi lenki na i su tanga nan golli ti i ya, Tunka Duumante axa Alla wa axa wurugini duna xabiilan su kanma. 2 Axa ga na Tunka Duumanten terinka, axa Alla, bareken su na yanqa axa kanma na axa loogo : 3 axa na bareki debun noxon ŋa, axa na bareki soxanteenun ŋa. 4 Axa na bareki ti saarerenmen gaben ŋa, nan bareki ti axa ɲiiɲen sanjanfon gaboyen ŋa, a do axa nan do axa tanmisen jiidiye. 5 Axa sanjankandon do a axa yeregendixollon na bareki. 6 Axa royinton ni xeeri, axa bogunton ni xeeri. 7 Xonno beenu nda giri ti axa xanne maxa, Tunka Duumanten na i xoso axa da ; i nda me batu riini axa yi ti killi baane, i daganton na wuru axa kaane do killu ɲeri yi. 8 Tunka Duumanten na neeman fonlaqen wuɲi axa da, ti axa maron ŋa, a do axa gaa fo wo fo dabarini, a gaa ɲiiɲe ke be kinni axa yi, a na axa barekindi a kanma. 9 Axa ga na Tunka Duumante axa Alla ɲaamarindixannun batu, axa ga sabati a killen kanma, a na axa ɲaŋi i duudanjama sennen ŋa, xoyi a ga kuna ti a yi axa da moxo be. 10 Duna jamon su na a wari nan ti axakun na ti Tunka Duumanten ya yi, i na kanu axa yi xa. 11 Tunka Duumanten na xeerin kini axa yi : a na axa jiidi ti saarenuxunlemen ŋa, na axa naaburusiginten jiidi ti saarenuxunlenmen ŋa, ɲiiɲe ke be a ga kuna ti a yi axa seri fanon da nan ti i wa a kinni axa yi, a na a soxofoonun jiidi ti saarefuugen ŋa. 12 Tunka Duumanten na kanmun neeman fonlaqen wuɲi axa da, na kanmen texendi axa ɲiiɲen ŋa i texewaxatin ŋa axa da. Axa kitten gaa golle su yi, a na ken barekindi axa da. Axa nta tanbo muurunu xabiila tana sere yi. Xabiila kuttun seron ya na tanbon muurunu axa yi. 13 Tunka Duumante axa Alla ɲaamarindixannu be in gaa i kinni axa yi lenki, axa ga na i tanga, axa ga da i batu, na i golli, a wa axa ɲaana yinmanko yi, axa nta ɲaana fallanko yi. Axa wa ɲaana wuruginto yi, axa nta ɲaana maxayanqanton yi abada. 14 Ganta, n ga da axa ɲaamari ti ku digaamu be yi lenki, axa maxa sele bakka i ya ti tayen ŋa, xa maxa sele bakka i ya ti noogen ŋa. Xa maxa sukke do kamanu tana batten ŋa, na i batu.[Alla langande]
15 « Xa ganta, Tunka Duumante axa Alla, a ku ɲaamarindixannu kundu do a ku farilanu beenu su in gaa axa ɲaamarini ti i ya lenki, axa ga ma i tanga nan golli ti i su yi, ku langandu su ya na axa kitta : 16 Axa na ɲa seri langanto yi debun noxon ŋa, axa na ɲa seri langanto yi soxanteenun ŋa. 17 Axa sanjankandon do a axa yeregendixollon na lange. 18 Axa nuxudunlenmun na lange, axa ɲiiɲen sanjanfon do axa nan do axa tanmisen na lange. 19 Axa royinton na lange, axa bogunton na lange.
20 « Axa ga na axa kitten ro golle su yi, nan ti axa wa a ɲaana, Tunka Duumanten na langanden ya walla do axa batten ŋa, a do hawujayen do joote, ma axa ga n'n halaki, nan karamanburuxe, na a sababun ɲa axa ga da inke Alla wara, axa da fo buren ya dabari. 21 Tunka Duumanten na axa katu ti taawoonun ŋa, ke ɲiiɲe be axa gaa roono a yi kuudo na a xallaaxu, ma a ga nda axa buruxa bakka a kanma. 22 Tunka Duumanten na axa xuumandi, na axa katu ti fatankumun do fatankutu, a do buyindu, ken do kankonto, dinba, ma biyaane. Ku masiibonu su ya n sukkene do axa batten ŋa, ma axa ga n'n buruxe. 23 Kanmun na ɲaŋi axa kanma xo kire, ɲiiɲen na ɲaŋi axa wure xo mexenbinne. 24 Tunka Duumanten na kanmen faraaxu dundun do xoben ŋa yanqana gilli kanmun ŋa, ma axa ga n'n halaki.
25 « Tunka duumanten na axa niyindifeeran kini axa xonnon ŋa. Axa nda me batu dagana do killi baane yi nan xenu axa xonnon ŋa, axa riyinto na wuru i kaane do killu ɲeri yi. Duna tunkaaxunun su wa jootini ti ken golle be ga da axa kita kundu. 26 Axa tiyun na ɲa kanmun yeliŋun do ɲiiɲen kanbanton da yigande yi, sere su nta i xatana bakka axa kanma. 27 Tunka Duumanten na axa katu ti Misira funbuunun me yi, ken do kutunbakken do koosi, a do fiite. Axa nta safaare kitta i ya xa. 28 A na axa katu ti tuurin ŋa, a do finkun do kiilungirintaaxu. 29 Axa na toxo meemendini do killen ŋa kiiranxullen ŋa, xo finkinten gaa meemendini biten ŋa moxo be. Axa ga na golle su dabari, a wa bonno. Axa bireyen su ni roxoyen ya, duna gaa bireene axa yi, sere xa su nta axa deemana. 30 An na yaxaren muuru, seri tana na a saqanlenmaaxu. An na an kan taga, an nta roono a yi. An na yittingooren goori, an nta a renmen fatana. 31 I na an gunbon kari an yinme yaaxon ŋa, xa an nta a tiyen yigana. I na an faren wutu an yaaxon ŋa, do a nan daga, a ntaxa saagene katta an ŋa. An tanmisen na kini an xonnen ŋa, sere su nta an faasana. 32 Axa ren yugun do axa ren yaxarun na wuti nan kini xaabila tana seren ŋa, an na kira a killidufaayini ma an yaaxon ga tanpi, xa an ra nta fo wo fo bakka a yi. 33 Axa ɲiiɲe nafan su, a do axa tanpiyen yittirenmen su, sero ya na i yigana, axa ga nta sero be tu. Tooran do roxoyen baane ya na axakun kanma abada. 34 Axa yaaxen gaa ke be walla ɲaana, axa kiilunun gilli ya. 35 Tunka Duumanten wa axa katta ti tugu burun ŋa, axa taanun do axa xurungun su yi. Tugu burun wa axa loogono gelli axa yinmu ma axa taanu, axa nta safaare kitta i ya xa. 36 Axakun do axa tunka be axa ga da a wara axa yinmen ŋa, Tunka Duumanten na axa forogondi katta xabiila yi, axa ga nta ku beenu tu, axa seri fanon nta i tu. Axa na kamanu tana batu non ŋa ; gidun do sollu. 37 Tunka Duumanten gaa axa gengene katta xabiilanu ku beenu yi, ke be ga da axa kita, a wa i lasamana. I na soyi axa yi, na axa roxondi.
38 « Axa wa soxoodin gaben soxono gunnen ŋa, xa axa na fonne ya fatana, baawo buuren na a yigana ya. 39 Axa wa reesengoorun lorini, nan golli, xa axa nta renme fatana bakka i ya, axa nta reesendolo minni bakka i ya, baawo xuuden na a yigana ya. 40 Tenŋen wa ɲiini do axa banŋe wo banŋe yi, xa axa nta te daarini du yi, baawo a renmen xintan ya joxiini bakka i ma yi. 41 Axa na ren yugun do ren yaxarun saara, xa i nta toqo axa maxa, baawo i na i ragana komaaxun ya yi. 42 Buuren na axa ɲiiɲen soxofon su yiga, a do axa yitten su. 43 Mukkunu beenu gaa taaxunu axa nen ŋa, i wa wurugiini axa kanma, xa axakun maxayanqana ya tannu. 44 Axakun ya na tanbon muurunu i ya, ikun nta tanbo muurunu axa yi. Ikun na ɲa yinmu yi, axakun na ɲa xoqu yi.
45 « Ke bone su na axa kitta ya, nan sukke do axa yi, nan toxo axa kanma, ma axa ga n'n halaki, baawo axa ma Tunka Duumanten digaamun tanga, axa Alla, ken ga ni a ga da ɲaamarindixannu be do farilanu be kini axa yi, axa ma golli ti i ya. 46 Ku wa ɲaana axa do axa bonsonŋun da taxasiye yi, a do kawande, ma abada.
47 « Axa ga ma Tunka Duumante axa Alla batu ti ɲaxan do sewoyen ŋa xeeri biren ŋa, 48 ken saabu da Tunka duumanten ga da axa xonno be janba axa yi, axa wa ɲaana i da komo yi : dullen na xenu axa yi, a do daqu, ken do feeton do kori xote. Tunka duumanten na mexenbinnen xarun ro axa xannun ŋa, ma a ga n'n da axa halaki. 49 A na xabiila geesu gilli jaman laate tana yi duna yinmen ŋa katta axa yi, xabiila be axa ga nta i xannen mukku, ken na ri tufi axa yi xo gope. 50 I waritinyaaxen kanunten ya ni, i nta i yaaxen bakka xirise yi, i nta hinnene lemine yi. 51 I na axa naaburu siginton renmun yiga, a do axa ɲiiɲen sanjanfo, ma axa ga n'n halaki. Yille nta toqo, reesendolo kurunba nta toqo, te nta toqo. Nangoore do tanmisangoore nta toqo, ma i ga n'n da axa ɲama. 52 Tunka Duumante axa Alla gaa ɲiiɲe ke be kinni axa yi, debe nta toqo i ga nta a raqen ragana. Tageyinbinni xooro ku beenu gaa debu ku yi axa saxunten gaa i ya, i na xenu. 53 Xonnon wa axa liixini, na i toxo a raqen ŋa, axa yinme nuxudunrenme be Tunka Duumante, axa Alla ga da a kini axa yi, yugo ga ni ma yaxare ga ni, ma an yinme ga da a tiyen yiga. 54 Ma an ga da buttuxayigumun ɲi kafiini axa yi ken koota, i gaa ɲuumunu i yinme waaxinun do i yaxarin baatanun do i renmun kuttun ŋa. 55 A yinme nuxudunrenme ke tiyen be a gaa yigana, a wa kanna a taxandini i do kun sero naxan ŋa. I yinme nuxudunlenme be i gaa a tiyen yigana, i wa kanna a taxandini i do i naxa, baawo na xonnon toxo taaxunu i debun su raqun ŋa, fo tana su nta i maxa i gaa a yigana ken ɲaani waxatin ŋa. 56 Yaxarin buttuxayigumu beenu ga ma demu taamandi baane wuttu ɲiiɲen kanma bannaaxun do neeman saabu da, an na i wari kafiini axa yi ken koota, a kiina ke yinme be a do a gaa me mulla, a wa ɲuumunu a yi do i yinme nuxudunrenmen tiyen batten ŋa, nan ɲuumu i yinme ren yugun do i yinme ren yaxarun ŋa. 57 Hari xoxono be gaa riini do renmen ŋa saarewaxatin ŋa, a na kun do renme ke su muxuntanyigana ya. Baawo na xonnon toxo taaxunu axa debun su raqun ŋa, fo tana su nta axa maxa axa gaa a yigana ken ɲaani waxatin ŋa.
58 « Ku sariyanu beenu safanton gaa ke kitaabe noxon ŋa, axa ga ma i tanga, axa ga ma golli ti i ya, axa ga ma kanu ke toxo dare yi, kanufo ga ni, Tunka Duumante axa Alla, 59 a na axa do axa bonsonŋun kaawafintankatu, katundi xoore, a mamante ga ni, ken do abadanmasiibonu, a do watti buru, i ga nta jaareene. 60 Wattu ku beenu ga da axa kanundi Misira, a wa i su selletini axa yi, na i ɲa axa da taaxanlenma yi. 61 A wa hari watten do masiibon danben tanan xayini axa yi, ku beenu a ga ma i fin ko ke sariyan kitaabe kundu noxon ŋa, ma axa ga n'n halaki. 62 Axa ke jama be gaben ga ni kundu xo kanmun saanun moxo, a wa riini lamaano, na a sababun ɲa axa ga ma Tunka Duumanten terinka, axa Alla. 63 Moxo ke be a ga liŋo Tunka Duumanten da nan siro axa da na axa jiidi de, ken moxo baananne ya ni, a gaa liŋoono a da nan bono ti axa yi na axa buruxa. Axa gaa riini ro ɲiiɲe ke be yi kuudo na a mara, a na axa xiili bakka a yi. 64 Ken falle a na axa sanqi do duna jamon su yi, gelli duna yinme ma a yin baane. Axa na kamanu tana batu non ŋa ; sollinkamanu do gidinkamanu, kamanu ya ni axa ga nta i tu, axa seri fanon xa nta i tu. 65 Axa nta xeeri kitta kun jamo naxan ŋa ken noqu yi, axa nta tuumaraxe kitta, ganta Tunka Duumanten na butturankannen ya walla axa yi, na axa diinan misondi, axa yonkinun na jikkirankuti. 66 Axa na bire kallen kanun noxon ŋa. Xaaxantaaxun ya na axa yi wuron do kiye, axa bireye ke noxon ŋa, axa haqilun ntaxa taaxunu. 67 Suxuba su, axa wa tini : “ Yaala o wa lellen walla ba ? ” Lellen xa, axa na yille tini : “ Yaala o wa suxuban walla ba ? ” Ke su ni sondonxaaxantaaxu be gaa axa kitta ya ti ke be axa yaaxen gaa a yi. 68 Tunka Duumanten na axa saagandi ti jiidunfuurun ŋa katta Misira yi, ken ga ni kille ke be in ga ti axa n maxa axa yaaxen saxu a yi xadi. Non ŋa, axa na du gaaga axa xonnon ŋa, kuudo axa nan ɲa axa xonnen da kome yi ma tunbaare, xa xobaana nta kiteene axa yi. »
[Annabi Muusa waajundi sikkande 28.68 - 30.20]
69 Tunka Duumanten ga da laayiduxannu beenu kini Annabi Muusa yi Mowaaba giden ŋa, nan ti a do Banisirayilaganko na i dabari, kun ya digaamu ni ku. Ken do laayidu ke be a do i ga da a dabari Tuurisiina yi, i nta baana.