[Kanaana royen ɲaamarindixannu]
[Alla sariya safante gidi betexenton kanma]
27
Annabi Muusa do Banisirayila xirisun da jaman ɲaamari nan ti : « N gaa axa ɲaamarini ti ku ɲaamarindixannu beenu yi lenki, axa na i tanga. 2 Axa ga na Yaradefanŋe kara koota be katta Tunka Duumante axa Alla gaa ɲiiɲe ke be kinni axa yi, axa na gidi dinkanu sigindi, na i betexe ti tuxan ŋa. 3 Axa ga na kare, axa na sariya ke digaamen su safa i kanma. Ken moxo, axa na ro jamaane be Tunka Duumante axa Alla ga da a kini axa yi, xoyi a ga da a laayidun wutu axa faabanu da moxo be, xattin do tamarileeman waranlaqen jamaane. 4 Axa ga na Yaradefanŋe kara bire be, axa na kun gidu sigindi Heebali giden kanma, xoyi in ga da axa ɲaamari moxo ke be yi lenki. Axa na i betexe ti tuxan ŋa. 5 Axa na sadaxindinoqu taga Tunka Duumante axa Alla da non ŋa ti gidi sekuntanbalin ŋa, mexenyokke ga ma ro gide be yi na a seku. 6 Axa na Tunka Duumanten sadaxindinoqun tagana ti gidi sekuntanbalin ya yi, axa na axa sadaxa xuruminton sadaxi a kanma yi Tunka Duumanten da, axa Alla. 7 Axa na allatiigeyinsadaxan* xurusi, na a yiga non ŋa, axa na ɲaxali Tunka Duumanten jon me naxa, axa Alla. 8 Axa na ke sariya digaamen su safa gidi betexento ku kanma, na i safanden bangandi moxo siri. »9 Ken falle annabi Muusa do Leewikaaranka sadaxakiɲandaano ku digaamu Isirayila su danŋa nan ti : « Isirayila, axa deeje, xa nan terinke. Axa faayi ga ɲa jama yi Tunka Duumanten da lenki, axa Alla. 10 Ken kuŋa, axa na Tunka Duumanten terinka, axa Alla, a ga da i ɲaamarixannu be do farilanu beenu kini axa yi lenki, axa na i golli. » 11 Ken koota yinme su, Muusa da jama ke ɲaamari nan ti : 12 « Simoonakaarankon do Leewikaarankon da, a do Yehuudakaarankon do Yisaxaarikaarankon do Yuusufukaaranko, kafiini Beniyamiinakaarankon ŋa, axa ga na Yaradefanŋe kara bire be, axakun na sigi Gerijiimu giden kanma nan duwa jaman da. 13 Rubeenikaarankon xabiilan xa do Gaadikaaranko, a do Haseerikaarankon do Jebuluunukaarankon xabiila, kafiini Daanikaarankon do Nafutaalikaarankon ŋa, i xa na sigi Heebali giden kanma, nan langandi.
[Langandu, sariyan kutayen maxa]
14 « Leewikaarankon xannen wuruginten na ku digaamu gangu Isirayila seren su da nan ti : 15 “ Alla langanden wa sere kanma, sere ke be gaa muno dabarini, a gidi segunte ma a mexe xajante, na a sigindi ti i wa a batta gundon ŋa. Ken ɲexunten ya ni Tunka Duumanten banŋe, baawo ken ni seren kittiragollen ya. ” Jama ke danman su na a jaabi nan ti : “ Anmiina. ” 16 “ Alla langanden wa sere kanma, sere ke be ga da i ma do i faaba roxo. ” Jaman danman su na ti : “ Anmiina. ” 17 “ Alla langanden wa sere kanma, sere ke be ga da i do i kapanlenman naxan gingen girindi. ” Jama ke danman su na a jaabi nan ti : “ Anmiina. ” 18 “ Alla langanden wa sere kanma, ke be ga da finkinte geesu katta killi bure yi. ” Jaman danman su na ti : “ Anmiina. ” 19 “ Alla langanden wa sere kanma, ke be gaa miilene ti mukken ŋa kiiten noxo, ma walla xa alihatiime, ma wundunbaare. ” Jaman danman su na ti : “ Anmiina. ” 20 “ Alla langanden wa sere kanma, sere ke be ga do i faaba yaqe saqanlenmaaxu, an da an faaba boora. ” Jaman danman su na ti : “ Anmiina. ” 21 “ Alla langanden wa sere kanma, sere ke be ga saxu do daaba yi. ” Jaman danman su na ti : “ Anmiina. ” 22 “ Alla langanden wa sere kanma, sere ke be do i waaxi yaxarin saxiixen ga saxu, ma axa gaa saaxe ya, walla xa faabe. ” Jaman danman su na ti : “ Anmiina. ” 23 “ Alla langanden wa sere kanma, sere ke be do i kalluyaxaren ga saxu. ” Jaman danman su na ti : “ Anmiina. ” 24 “ Alla langanden wa sere kanma, sere ke be ga na baxu na i kapanlenman muxuntankari. ” Jaman danman su na ti : “ Anmiina. ” 25 “ Alla langanden wa sere kanma, sere ke be ga na duŋe seri fatimullen karini ti muso yi. ” Jaman danman su na ti : “ Anmiina. ” 26 “ Alla langanden wa sere kanma, sere ke be ga nta ke sariya digaamun tangana nan golli ti i ya. ” Jaman danman su na ti : “ Anmiina. ”