[Fateyifano*]
26
« Ɲiiɲe ke be axa kaman gaa a kinni axa yi faabanxeye yi, axa ga na a mara bire be nan taaxu a yi, 2 Tunka Duumante axa Alla ga da noqu be sugandi kuudo i toxon nan hadari non ŋa, xa na ɲiiɲe ke soxofoonun fateyifanon ro kanden ŋa, na i wutu, do i nan daga ken noqu yi. 3 An na daga katta sadaxakiɲandaana be gaa du yi ken waxati, nan ti a da : “ Tunka Duumante, an kama, a ga da ɲiiɲe be laayidun wutu o xirisun da nan ti i wa a kinni o yi, n wa xiirene ti a yi lenki nan ti in ro. ” 4 Sadaxakiɲandaana ke na kande ke wutu an maxa, na a wara Tunka Duumanten sadaxakiɲandinoqun teŋon ŋa, axa Alla. 5 Ken bire an na ku digaamu ko Tunka Duumanten axa Alla jon me naxa nan ti : “ Nke seri fanan ni Haraaminken ya, girin-girindaanan ya ni. A do i koren daga taaxu mukkaaxun ŋa Misira yi. I gaa dagana non ŋa bire be, i jaaten nan roxa, xa i xabiilan ri xooro nan ɲa xabiila senbente yi, nan gabo. 6 Misiranko buro ti o yi, na o tooro, na golli xoton taaxu o yi. 7 Bire be o ga laxaraxaasa katta Tunka Duumanten ŋa, o seri fanon Alla, a da o laxaraxaasaxannen mugu, na o tooran wari, a do o xotoyen do o ɲaani. 8 Tunka Duumanten da o bagandi Misira yi ti i senbe daren do i baawuden ŋa, a do kaawafiinun do taagumansu, ken do kanuyi xoore. 9 A da o riiti ke noqu kundu yi, na ke ɲiiɲe kundu kini o yi, xattin do tamarileeman waranlaqen ɲiiɲe. 10 Ken kuŋa, Tunka Duumanten ga da ɲiiɲe ke be kini in ŋa, n faayi ga da a fateyifanon ya riiti saasa. ” Ken bire an na i saxundi Tunka Duumanten jon me naxa, an Alla. An na sujudi Tunka Duumanten jon me naxa. 11 Ke xeeri be su Tunka Duumante axa Alla ga da a kini axa do axa korun ŋa, axa do Leewikaarankon wa sewoono ti a yi, a do mukkunu beenu gaa bireene axa noxon ŋa.[Siinosikkinjakka]
12 « Bire be axa ga na axa soxofoonun jakkan bagandi siina sikkandi ke yi nan duguta, ken ga ni jakkan siinen ŋa, xa na i kini Leewikaarankon ŋa, a do mukkunu beenu taaxunton gaa axa noxon ŋa, ken do alihatiimun do wundunbaaru. Kun xa na i raqen logoman kita do axa batten ŋa axa debu ku noxo, i na baabuwase. 13 An na a dantaxi Tunka Duumanten jon me naxa, an Alla, nan ti : “ N da fo sugandinten bagandi kan ŋa na a kini Leewikaarankon ŋa xa, a do mukkunun do alihatiimu, kafiini wundunbaarun ŋa, na a saxu an ɲaamarindixannun kanma, an ga ɲaamarindi ti ku beenu yi. N ma xenperandangi ti an ɲaamarindixannun ŋa, n ma mungu i ya xa. 14 N ma fo yiga bakka a yi sunon ŋa, n sobinte xa ma fo wutu bakka a yi. N ma fo sadaxi bakka a yi fure da¤. Ganta, n da Tunka Duumanten ya batu tannu, n Alla, an ga da in ɲaamari ti fo wo fo su yi, n wa ken gollini. 15 Du toxo an dingira sennen ŋa kanmu, an nan faayindi, na an jaman barekindi, ken ga ni Banisirayilagankon ŋa, ken do ɲiiɲe ke be an ga da a kini o yi, xoyi an ga da a laayidun wutu o seri fanon da moxo be, xattin do tamarileeman waranlaqen jamaane. ”
[Annabi Muusa waajundi fillanden lagare]
16 « Lenki ke koota yi kuŋa, Tunka Duumante, axa Alla, a da axa ɲaamari ti axa na ku farilanu do ku kiitu batu, xa nan golli ti i ya ti axa sondomun do axa yonkinun su yi. 17 Ayiwa lenki ke koota yi, axa digaamu ti a yi, nan ti Tunka Duumanten ya ni axa Alla yi, nan ti axa wa terene a killen ŋa, axa wa a farilanun do a ɲaamarindixannun do a kiitun tangana, axa wa a daalen terinkana xa. 18 Lenki ke koota, Tunka Duumanten digaamu ti a yi, nan ti i duudanjaman ya ni axa yi, xoyi a ga da a laayidun wutu moxo be. Ken kuŋa, a waajibi axa kanma, axa na a ɲaamarindixannun su tanga. 19 A ga da xabiila su taga, a wa axa wurugini i su kanma. Axa na ɲa toxonto yi, a do darajanto do seri daronto. Axa na ɲa seri sugandinto yi Tunka Duumante axa Alla da, xoyi a ga da a ko moxo be. »