[Katunde]
25
« Gajanŋe nda ɲi sero filli naxa, i n daga katta kiitaanon ŋa, i na kiiti i naxa. Kiitaano ku na tonŋunten tonŋun kini a yi, i na gaaranten kiiti. 2 Selli katunden ya ga na waajibi gaarante ke yi, kiitaanan na a banba saqa ɲiiɲen ŋa i jon ŋa, i na a katu ti i golli bure ke haqen jaanun ŋa. 3 Tannaxate jaane, xa maxa fo kafu ken ŋa. Katunden nan maxa daga gabo, axa gaa yaagun walla axa maarenmen ŋa.4 « Na be gaa yillikatini, maxa a kaba yillen yigana.
[Medaronde]
5 « Waaxinu nda ɲi bireene doome, i du baananbe ri kara na a ɲi renme nta a maxa, fure ke yaqen ma xawa yaxiini wande tana yi sellan ŋa. Kiine ke waaxin ya na a yaxini, nan ro ti a yi. A na sigi yaxare ke da kobinlensigan ŋa. 6 Ken moxo, a ga na sooma be saara, ken na ɲa waaxi fure ke renme yi, ken ŋa a toxon na waase buruxeene bakka Banisirayilagankon noxon ŋa.* 7 Xa selli kobinlenmen ga na bara i waaxi fure ke furujanten saagandini, yaxare ke n xawa dagana deben xirisun bulunŋen ya yi nan ti i da : “ N kiina waaxin bara sikki i sigan ŋa in da, na i waaxi furen toxon sabatindini Isirayila yi. ” 8 Debe ke xirisun na yugo ke xiri nan sefe a da. A nda sigi non xa yi nan ti : “ N nta a mulla na a wutu, ” 9 waaxi ke yaqen na tinko a yi xirisu ku jon ŋa, na a tepun bogu a tan ŋa, nan tufa a yeeson ŋa, ken falle nan ti : “ Yugo be ga bara i waaxin kan sigindini, ke ya n xawa ɲaana a yi. ” 10 Isirayila jamaane ke noxon ŋa, i na yugo ke kan toxora : “ taaduurunka. ”
11 « Taaxanlenmo filli ga na gaja, baanen yaqen xosi daga katta i ya nan faasandi i kiina da bakka baane ke katunden maxa, nan xosi i kitten rondi na yuguwande ke raga ti wure yi, 12 xa na ken yaxare kitte ke kuttu ya, xa maxa hinne a yi.
13 « Miijukiru filli be ga nta ɲera, i ma xawa wariini axa maxa. 14 Xensendifoonu filli ma xawa wariini axa maxa axa kaanun ŋa, dinkan do bucinne. 15 Miiju teleŋonta tinmanten ya n xawa ɲiini axa maxa. Xensendifo tinmanten ya n xawa ɲiini axa maxa, kuudo Tunka duumante axa Alla gaa riini ɲiiɲe be kini axa yi, axa na wuyi giile kita a kanma. 16 Baawo sero beenu gaa ke fi haraamunte su ɲaana, i xoninton ya ni Tunka duumanten maxa, axa Alla.
17 « Axa bogunton ŋa Misira yi, Hamaleexinun ga da fon be ɲaŋi axa yi, xa sinme ken ŋa. 18 Ikun be ga daga gemu axa yi killen kanma, i ma kanu Alla yi, i xenu axa sero beenu tanpinton ga toxo falle yi killen ŋa, na i bonondi. 19 Ken kuŋa, ɲiiɲe ke be Tunka Duumante axa Alla gaa riini a kini axa yi faabanxeye yi, kuudo axa na a foyaaxu, bire be aken Tunka Duumante axa Alla ga na niyen kini axa yi axa xonnon su kanma do fonkaaron ŋa, xa na Hamaleexinun toxon buruxa bakka kanmun wure. Xa maxa mungu do ken ŋa de !