24
« Yugo be nda yaxare yaxi, a nda hayibeyen ɲi yaxare ke yi, ken da a tu bogu a yi. A na warandi bataaxen safa na a ro yaxare ke kitten ŋa, na a wara bakka i kan ŋa. 2 Yaxare ke bogu falle a kan ŋa, a ra wa dagana yaxi yugu tana yi. 3 Selli ken yugu fillandi xa ga na a bara yaxare ke yi, na warandibataaxen safa na ro a kitten ŋa, na a wara bakka i kan ŋa, ma walla ken fe de ! Yugu lagare ke be ga da yaxare ke yaxi, ken kara ya, 4 ken ŋa yugu fana ke be ga da yaxare ke wara, a ra ntaxa saagene a wuttu keeta na a ɲa yaqe yi yaxaren sobi falle aken maxa. Baawo ken ni fi ɲexunten ya yi Tunka Duumanten maxa. Tunka Duumante axa Alla gaa ɲiiɲe be kinni axa yi taqe, xa maxa fi buren fuutu riini a kanma.5 « Yugo be ga ni finnayaxaanan ŋa, a nta bakka dagana kure yi, i nta xibaare su yinmankaaxun kinni a yi ; a n toxo i mulon ŋa i konpen noxo, siina baane, a na i yaxarin wutunte ke ɲaxalindi.
6 « Maxa an tanbanlenman gorotungon do a gondomen¤ wutu tolomada yi, baawo ken ni yonkiwutten ya.
7 « Sere ga na i maaren Banisirayilaganke fayi, na a ɲa kome, ma walla xa na a gaaga xo kome, ken fayaana ga na rage, a kalla ya ; Axa na fo buren buruxa bakka axa noxon ŋa.
[Me haqun tangande]
8 « Xa da du koroosi fatanwattun ŋa moxo siri, xa na Leewikaarankon toŋondun batu, sadaxakiɲandaano ku. I ga na axa ɲaamari fo wo fo su yi, xa na ken koroosi kuudo na i ɲa xoyi in ga da i ɲaamari moxo be.* 9 Xa sinme, ke be Tunka Duumante axa Alla ga da a ɲa Mariyaamu yi axa bogunton ŋa Misira yi.*
10 « An ga na an kapanlenman baabu baabundifo su danbe yi, maxa ro a konpen ŋa ti an wa tolomada wuttu non ŋa. 11 An sikki fonlaqen ya yi, an ga da sere ke be baabu, a yinme do tolomada ke na bogu katta an ŋa sellan ŋa. 12 Selli sere ke ga ni misikiinen ya, a ga na i yiraame kini an ŋa tolomada yi, tolomada ke n maxa wuyi an maxa de. 13 An na a tolomada ke saagandi katta a yi saado kiyen gaa xenne, a na wuyi i yiraamen wure, a na duwa an da ; ken na ɲaŋi an da tonŋuntaaxu yi Tunka Duumante an Alla jon me naxa.
14 « Maxa musungolliɲaŋaana korinten tooɲa, a do tanpinte, ken ga ɲa an maarenme ya yi ma mukkunu beenu gaa taaxunu axa jamaanen ŋa ya ga ni axa debun noxon ŋa. 15 A koota yinme su ya ni an gaa a muson kinni a yi ; kiyen nan maxa xenu a yi an maxa, baawo korinten ya ni, a yonkin tuuganten na ken ya kanma, ken falle a n maxa laxaraxaasa ti an ŋa katta Tunka Duumanten ŋa, ken gaa telle ɲaŋi an da junuubu yi.
16 « O nta faabe karini ti renme yango yi. O nta renme xa karini ti faabe yango yi. Sere su kalla ti yinme yangon ya.
17 « Maxa mukken kiiten ɲengendi, Maxa alihatiimen kiiten ɲengendi. Maxa wundunbaaren yiraamen wutu tolomada yi. 18 Xa inme nan ti axa ɲi komaaxun ya yi Misira, Tunka Duumante axa Alla da axa maxawasa bakka non ŋa, ken ya ni in gaa axa ɲaamarini ti ku fiinu kundu ɲaŋunden ŋa.
19 « An ga na an fatefon fata gunnen ŋa, an ga mungu do bereje yi non ŋa, maxa saage dagana a wutu, mukkunun do alihatiimun do wundunbaarun ya fo ni kun ŋa, ken ŋa an kitten ga na fo wo fo golli, Tunka Duumante an Alla na a barekindi. 20 Bire be an ga na an jayituunan konko nan duguta, maxa yille dagana fo yaara non ŋa xadi, mukkunun do alihatiimun do wundunbaarun ya fo ni kun ŋa. 21 An ga na an reesengooren fata, maxa a yaara do du yi xadi. Mukkunun do alihatiimun do wundunbaarun ya fo ni kun ŋa. 22 Axa Sinme nan ti axa ɲi komaaxun ya yi Misira ɲiiɲen kanma, ken ya ni in gaa axa ɲaamarini ti ku fiinu kundu dabarinden ŋa.