23
« Yugo n maxa i faaba yaqen wutu, ken na xo an ga da an faaba boora ya.[Tunka Duumanten kafundon ga kabe sero beenu maxa.]
2 « Yugo be tapinten ga ni, a do yugo be yugaaxun muusanten ga ni, kun nta roono Tunka Duumanten jaman kafundon ŋa. 3 Jeenirenme nta roono Tunka Duumanten jaman ŋa, hari a buru tanmunden nta roono Tunka Duumanten jama su yi.
4 « Hamoonigankon do Mowaabakaarankon nta roono Tunka Duumanten jaman ŋa, hari i buru tanmunden nta roono Tunka Duumanten jaman ŋa, i nta roono hari abada. 5 Ken ni ya axa bogunton ŋa Misira, i do jin do yiganden ga ma gemu axa yi killen ŋa. Ken do i ga da Booro renme Balaamu janba axa yi, ti a na axa langa. Petooronken ya ni, ke Balaamu be ga giri fanŋun filli Haraama yi. 6 Xa Tunka Duumante axa Alla ma duŋe Balaamu terinkana ; a da Balaamu langandu ku yillandi axa da duwanŋu yi, baawo Tunka Duumante axa Alla da axa xanu ya. 7 Maxa i jamun do i xeerin muuru abada, an bireye ke kooton danmon su noxon ŋa. 8 Xa maxa Hedoomugankon xoni, baawo axa waaxinun ya ni. Xa maxa Misiranke xoni, baawo axa ɲi mukkaaxun ŋa i jamaanen noxo. 9 I renmu beenu gaa saareene i buru sikkandinun noxo, kun ra wa roono Tunka Duumanten jaman ŋa.
[Senontaaxu sariyanu]
10 « Axa ga na bogu nan daga daaxe axa xonnon raqen ŋa, xa na du koroosi gelli fo sobinte su yi. 11 Selli sere gaa kafiini axa yi, a ga wurudunkuyi nan joxindindi, a kaman senne fe, a n bogu katta daaxan sellan ŋa. A nta roono daaxan noxon ŋa. 12 Lellen ga na ɲi riini, a na wanqi ; kiyen ga na xenu, a xa na ro daaxan ŋa.
13 « Dingira nan ɲa axa maxa daaxan sellan ŋa, axa ra gaa telle gunnebanŋe noqu be. 14 Fantin nan ɲa axa maxa axa yokkun noxon ŋa, axa ga na ɲi taaxunu, axa na kunmen jaga ti a yi, ken falle axa na saage a bulunu. 15 Baawo Tunka Duumante axa Alla terene do axa daaxan noxon ya yi, kuudo na axa kisi, na axa xonnon xoso axa da. Axa daaxan nan seno ya, kuudo a n maxa fi hayibante wari axa noxon ŋa, Tunka Duumanten, a gaa yillene bakka axa yi.
[Komo wurunten sariya]
16 « Kome be nda wuru i kaman ŋa katta axa jamaane ke yi, xa maxa yille a kini a yi xadi. 17 A yinme ga na debe be sugandi axa jamaane ke yi, a gaa non mulla, a taaxunu kafiini axa yi non ya. Xa maxa a tooro xa.
18 « Isirayila ren yaxare n maxa ɲa jeenaana yi do munubatten ŋa, Isirayila ren yugo n maxa ɲa jeenaana yi do munubatten ŋa. 19 Xa maxa jeenimuson ɲa tekkensadaxa yi, na a rondi Tunka Duumante axa Alla kan noxon ŋa, ken ga ni jeenaana yaxaren muso, walla xa jeenaana yugon muso. Baawo i filli su haraamunton ya ni Tunka Duumante axa Alla maxa.
20 « Maxa goroxontanbon ro an maarenmen ŋa, fo wo fo danbe, ken do tonon ya gaa roono, a xaalisinma ya ga ni, ma a yigandinma ya ga ni, xa maxa a ɲa.
21 « An na goroxontanbon roono seriwanden ya yi, xa an maarenmen ke, maxa ken goroxo. Ken ŋa, Tunka Duumante an Alla, a na an barekindi ti fo wo fo ga ni an kittiragolle yi ɲiiɲe ke kanma, ke ɲiiɲe be axa gaa roono a yi kuudo na a xallaaxu.
22 « An ga na tekke wutu Tunka Duumante an Alla da, maxa leele a tinmandini, a n maxa daga ɲa an da junuubu yi, baawo Tunka Duumante an Alla na an tanbunu a yi ya. 23 Xa, an ga na du kaba tegunu, yango nta an ŋa. 24 An yinme ga na an soomonfaton filli bogu me yi na tekke be wutu, ken tanga ya de, an na a dabari xoyi an yinme ga da an raqen bogu me yi nan tegu Tunka duumanten da moxo be an Alla.
25 « An ga na ro an maarenmen reesengooren noxon ŋa, reese be ga n liŋi an da an wa a yigana ma an ga n'n fogu. Xa maxa fo ro an xolle ŋa bakka. 26 An ga na daga an kapanlenman soxanten ŋa, an ra wa jogodo kuttu ti an kitten ŋa na i ɲa sanpan ŋa, xa an nta labo roono an kapanlenman yilli siginten ŋa na a fata.