[Sariyanu yogonu]
22
« Maxa sigi na an maarenmen gunbu sankunten faayi do gunnen ŋa, ma walla a jaxe, na an du sankundi a yi ; an na a yillandini ya na a saagandi katta an maarenmen ŋa. 2 Selli an maarenme ke ga nta an tinkoyen ŋa, an nta a kaman tu xa, an na daaba ke kiɲa du yi an kan noxon ŋa, ma an maarenme ke ga na ri a muuru bire be, ken bire an na a saagandi katta a yi. 3 An na ken me ya ɲaana ti a faren xa yi, an na ken me ya ɲaana ti a yiraamen ŋa, an maarenme fo sankunte su, ken ga sanku a yi ya an ga da a sagara, an na ken me ya ɲaana. A nta telle an na an faaju bogu a maxa. 4 Maxa an maarenmen faren xanunten wari saqa killen ŋa, ma walla xa a gunbo, an ga an du sankundini a yi. Ken maɲa ! A girindi ya, an nan sigi do a yi.5 « Yaxare n maxa yugunyiraame rondi ; yugo xa n maxa yaxarinyiraame rondi mene, baawo sere su gaa ken ɲaana, an xoninten ya ni Tunka Duumante an Alla maxa.
6 « An ga na yelinsonka ɲi du kaane killen ŋa, a gaa yitte kanma, ma a gaa ɲiiɲen ŋa, renmun gaa a yi, ma xabaanu, saaxen wa saqa renmu ku kanma, ma xabaanu ku, maxa saake ke do renmu ku su wutu de. 7 Saaxe ke wara dagana, xa, an ra wa renmu ku kun wuttu, ken ya ni an na wulluliŋontaaxu, an wuyin biton na giilo.
8 « An ga na ka kurunba taga, an na jubaqen ro do bilin kaaron ŋa kanmu, sere n maxa daga xenu gilli a kanma, an gaa telle ɲa foron sababun ŋa.
9 « Maxa yittinsoxoodi tana lori kafiini reesen ŋa an reesengooren noxo. Ken ga fe i filli su sugandini Alla ya da : soxoodi tana ke be an ga da a soxo, a do reese ke fatefon su. 10 Maxa soxo ti faren do nan ŋa doome. 11 Leenin do xaasan walaxinte me yi, maxa ken yiraamen ro du yi.* ¤
12 « An na kacun dabari do an rondindiraamen kanpon naxati yi.*
[Xusaaxun kiite]
13 « Yugo yogo ya n da fonnanxaye yaxi, a ro ti a yi, a xosi yille balla a yi, 14 ken falle a da digaamu danbinsafu katta a yi, na a toxon bonondi nan ti : “ Ke yaxare kundu be in ga da a wutu, n ga kiɲe a yi, n ma a xusaaxun ɲi a yi. ” 15 Ken ŋa kuŋa yaxarin fonnanxaye ke ma do a faaba na daliilu riiti, fo be gaa a koyini nan ti yaxanne ke xusaaxun ɲi a yi. I do daliilu ke na daga katta deben xirisun ŋa, bulunxooren di. 16 Fonnanxaye ke faaba na ti xirisu ku da : “ N da in ren yaxaren ya kini ke yugo yi yaqe, a bara a yi. 17 A da bonondindidigaamun koni a da, nan ti : ‘ N ma xusaaxun ɲi an ren yaxaren ŋa. ’ Ayiwa in ren yaxaren xusaaxun daliilu faayi ke ! ” I na a biriganyiraamen boyi deben xirisun wure. 18 Debe ke xirisun na yugo ke raga, i na a roxondi. 19 I na a yelumaani ti kame godoxulle, na a kini yaxare ke faaba yi, baawo a da Isirayilankaxuson ya toxon bonondi. A wa ɲaana a da yaqe yi, a bireye ke wucen su yi, a ra ntaxa a walla xa.
20 « Xa selli ku digaamu kundu ga na daga saha, i ga ma yaxarinne ke xusaaxun daliilun wari, 21 i na aken yaxarinne raga na bagandi katta faaben kan ganlaqen ŋa, debe ke seron na a gididunwara, a na kara. Baawo a xa da yaagufin ya dabari Isirayila noxon ŋa, nan jeeni i faaba kan ŋa. Axa na fo buren buruxa bakka axa noxon ŋa.
[Jeeniyen sariya]
22 « O ga na yugo be do yaxare wari saqa, yaxarin yaxinte, a gaa i kiina maxa, o na i filli su karini ya : yugo ke do yaxare ke su. Xa na fo buren buruxa bakka Isirayila yi.
23 « Selli yugo yogo ga na yaxarin xuso muuru, yugo tana do xuso ke xosi me wari debinnoxon ŋa do a nan saxu, 24 o na i filli su bagandi katta deben bulunŋen raqen ŋa, na i gididunwara, na i kari. Yaxanne ke karamaanan ni ya : a ga ma xaaru debinnoxon ŋa seron ga da a mugu ; yugo ke xallen ni ya : a ga da i kapanlenman yaqen maxayanqa. Xa na fo buren buruxa bakka axa noxon ŋa. 25 Xa selli yugon ga na daga yaxanne ke ɲi gunnen ya yi a ga da a senbe do a n saxu, aken yugo be ga saxu do a yi de, o na a baane ya karini. 26 O nta fo wo fo ɲaana yaxarinne ke yi, a ma fo bure su dabari a ga n xawa kalla. Ke kiite do sere nda xenu i kapanlenman ŋa na a kari, kun ya n baana. 27 Ken ni ya selli yugo ke do yaxanne ke ga gemu gunnen ya yi, a ga xenu a yi, a xaaru, xa a ma deemanda kita fo be gaa a kisini.
28 « Yugo ga na yaxanne wari, a xosi xenu a yi, yaxanne ke ma duŋe, xa a da a raga nan saxu do a yi, na a kita xa, 29 aken yugo be ga saxu do yaxanne ke yi, a n xawa tankarage godoxulle ya kinni yaxanne ke faaba yi, yaxanne ke na ɲaŋi a yaqen ŋa, na a sababun ɲa a ga da a maxayanqa. A bireyen wucen su yi a ra nta a walla.