[Fure be kallaanan ga ma tuyi]
21
« Tunka Duumante axa Alla gaa ɲiiɲe be kinni axa yi xeye, axa ga na seri karinte ɲi saqa gunnen ŋa, a ga ma tuyi i be ga da a kari, 2 axa xirisun do axa kiitaano na bogu, i na fure ke do debun naxan xense. 3 Debe be do furen ga n tinka, xirisun na nanyeerenlenme raga, ke be i ga ma demu gollini ti a yi abada, xandunsolle ga ma demu saqa ke be xannen ŋa abada. 4 Jinyaaxe be gaa wurunu abada, ken debe xirisun na yeere ke yanqandi a noxon ŋa, a noqu be ga ma soxe, a ga ma tifi. I na yeerenlenme ke xannun xoso waranlaqe ke noxon ŋa. 5 Leewikaaranko, kun ga ni sadaxakiɲandaanon ŋa, i na tinko a yi, baawo Tunka Duumante axa Alla da i ya sugandi, kuudo i n xidime ike Alla da, i nan duwa ti i toxon xa yi, ikun diganxannen ya n jereene gajanŋun do joogindun yaaxamuuriyen ŋa. 6 Fure ke ga n tinka debe ke be yi, non xirisen su na i kittun wanqi nanyeerenlenxanxosonte ke kanma yi jinyaaxe ke noxon ŋa. 7 I na jaabi nan ti : “ Oku kittun ma ke foron joxi, o yaaxon ma a wari du. 8 Tunka Duumanten wo, an ga da an jama Isirayila be maxawasa, yanpa a maxa, maxa fori senne joqen yangon taaxu an jama Isirayila yi. ” Foro ku yangon na xosi xafari Banisirayilaganko danŋa. 9 Ken ŋa, axa na fori senne ke yangon na wutu bakka du kanma, na a sababun ɲa axa ga da fi teleŋonten dabari Tunka Duumanten jon me naxa.[Meneguuriyaxaren sariya]
10 « Axa ga na bogu axa xonnon gajanŋen xanne maxa, Tunka Duumante axa Alla ga na i ro axa kitten ŋa, axa ga na sero raga na i ɲa kittidufoonu yi, 11 axa du baananbe xosi yaxarin giya faranpare wari kafiini i ya, a da a xanu, a da a yaxi. 12 A ga na a rondi i kan ŋa bire be, a na i yinmen siyi, a na i segenon kutu. 13 Yiraamu be ga ɲi a yi, a na i boora bakka du yi, a na taaxu yigo ke kan ŋa, a na i ma do i faaba wu xaso. Ken falle kiinen na ro ti a yi, a na ɲaŋi a kiina, a xa na ɲaŋi a yaqe. 14 Selli a ga na ɲa keeta a ga da i tu bogu a yi, a na a wara dagana ti i yinme yi. Xa, a ra ntaxa a gaagana keeta, a ra ntaxa a komaaxunu xa, na a sababun ɲa a ga da a maxayanqa.
[Leminun sariya]
15 « Selli yaxaru filli ga na ɲi yugu baane maxa, a ga na baanen xanu na baanen xoni, xanunte ke do xoninte ke su xa da renmun saara a da, ren yugu sooman xosi ɲa fo xoninte ke ya xalle yi, 16 a ga na ɲi i xeyen taxandimoxon koono, a ra nta xanunte ke ren yugu sooman kandana xoninte ke ren yugu sooman kanma de, 17 an n xawa soomaaxun tuunu xoninte ke ren yugu sooman ya da. A ga da fo wo fo kita i kitten ŋa, a na a taxandun filli kinni a yi ya, baawo a ya ni a funtindo fanan ŋa, soomaaxun haqen ni a ya xalle yi.
18 « Yugo be ren xatante gaa a maxa, walla xa ren maranbali, a ga nta i ma digaamen mukku, a nta i faaba digaamen mukku, i nda a toŋo a nta i terinkana, 19 saaxe ke do faabe ke n xawa a ragana ya, nan daga ti a yi katta i deben xirisun ŋa debe ke bulunŋen ŋa. 20 I na ti debe ke xirisun da : “ O renme ke ni xatanten ya, maranbalin ya ni, a nta o diganxannun terinkana, yiganfaren ya ni, minnanfaren ya ni. ” 21 Deben yugon su na a gididunwara na a kari, axa na fo buren buruxa bakka axa noxon ŋa, Isirayila su na a mugu, i na kanu.
[Serijonginden sariya]
22 « Selli kiiten ga na sere raga, a kaman ga n xawa kalla ya, an ga na a jongi yitten ŋa, 23 a fure ke ma xawa wuron muuman wuyini yitten kanma, a n xawa buliini a koota su ya yi, baawo seri jonginten langanten ya ni Alla noqu. Tunka Duumante an Alla ga da an ɲiiɲe be kini an ŋa taqe yi, maxa a sobindi.*