[Gajanŋen sariya]
20
« Axa ga na bogu xonnon gajanŋen xanne maxa, axa ga da siinun wari, ma wotoronu, jama be ga n gaba axa yi, xa maxa kanu i ya, baawo Tunka Duumante axa Alla wa do axa batten ŋa, ken ga ni axa bagandindaana bakka Misira ɲiiɲen ŋa. 2 Bire be axa ga na ɲi roono gajanŋen ŋa, sadaxakiɲandaanan na tinko, nan ti jaman da : 3 “ Terinke, Isirayila ! Axa faayi tinkoono axa xonnon gajanŋen xanne maxa lenki : xa buttun nan maxa lanpu, xa maxa kanu, xa maxa hawuje, xa nan maxa saralle i kaane, 4 baawo Tunka Duumante axa Alla dagana do axa yi ya na axa xonnon gaja, na waalen kini axa yi. ” 5 Yinmankon na digaamu jaman da nan ti : “ Kan sere baane n da ka kurunba taga, a ga ma a laaja fina ? A kaman nan yille dagana katta i kan ŋa, a n maxa daga kara gajanŋe ke yi seri tana gaa a kan laajana. 6 Sere be xa ga da reesengoore lori, a ga ma a fateyen jopa, a kaman nan saage dagana i kan ŋa, a n maxa kara gajanŋe ke yi seri tana gaa telle a reesengooren fateyen jopa. 7 Sere xa be ga da yaxare muuru, an ga ma a rondi fina, ken kaman nan saage dagana i kan ŋa, a n maxa daga kara gajanŋe ke yi, seri tana gaa telle a yaqen wutu. ” 8 Yinmanko ku na saage digaamunu katta jaman ŋa xadi nan ti : “ Kan yugo baane n kanna, butturanloxe ga ni ? A kaman nan saage katta i kan ŋa, a n maxa daga i waaxinun lanpundi xoyi i yinme moxo. ” 9 Yinmanko ku ga na duguta sefen ŋa jama ke da bire be keeta, i na kurunsapon yinmankon sugandi jaman yinmen ŋa.10 « Axa ga na tinko debe be yi kuudo na a gaja, xa na genmen digaame koni a da fina. 11 Selli a jaabun ga ɲa genmen ya yi, a ga da fonlaqen wuɲi axa da, jama be nda kite non ŋa, i wa ɲaana axa da soxokomo yi, i na golli axa da. 12 Selli a ga ma duŋe i do axa genmen ŋa kuŋa, a ga da a ɲa gajanŋen ya yi axa maxa, axa na taaxu i raqen ŋa. 13 Tunka Duumante axa Alla wa i roono axa kitten ŋa, axa na yugon su sanpa ti kaafan neenen ŋa. 14 Ganta yaxarun ku, a do leminu, kafiini fonmuumen ŋa, ken do fo wo fo gaa debe ke yi, fo kitanten su, axa na a su ɲa laxanloxonaabure yi axa du da. Tunka Duumante axa Alla ga na axa xonno be kini axa yi, axa na i naaburen yiga. 15 Ku debu beenu ga n laatu axa taqidebun ŋa buru, axa na ken moxo ya ɲaana i danmon su yi.
16 « Xa, kun xabiilanu debu be Tunka Duumante axa Alla gaa i kinni axa yi taqe, xa maxa yonkinte toxo bireene. 17 Ganta axa na a su buruxa tannu : Heetiganko, Hamoorikaaranko, Kanaanaganko, Perijinu, Hiiwikaaranko a do Yebuusikaaranko, xo moxo be Tunka Duumante axa Alla ga da axa ɲaamari. 18 Ken ŋa, i fi sobinto ku beenu su i gaa i ɲaana i munonun da, i ntaxa axa xaranŋundini nan ti axa xa na i me ɲa, axa gaa yangon kitana katta Tunka Duumante axa Alla yi. 19 Axa ga na bita gabu ɲa taaxunu debe be raqen ŋa, kuudo na a gaja, na a raga, xa maxa yide ro yitte yi axa gaa a karini, baawo axa yigene bakka i ya yi, ken kuŋa xa maxa i kutu, baawo gunnen yitten feti sere axa gaa taaxunu a raqen ŋa. 20 Xa ganta yitte be an gaa a tu nan ti a nta yigeene, axa ra wa ken kuttu na a kari, na gajanyokkun dabari ti a yi na debe ke raqen raga ti a yi, ma a ke ga n xenu.