Tawureeta :
Laayidu fillante
[Roraqe]
1
Muusa ga da digaamu beenu ko Banisirayilaganko su kafumanton da Yaradefanŋe ken kuta yi ɲiiɲanbaayanmen ŋa gunjuran noxo kinbakkan banŋe, Haraaba yi, Suufu fanŋen teŋon ŋa, Paraana do Tufaala do Labaana do Haceroota do Di-jahaabu naxa, i faayi ku. 2 Nan giri Horebu yi katta Xadesi-barineeya ti Seyiri giden killen ŋa, bito tanmi do baane terende ya ni. 3 Xa, Tunka Duumanten ga da Muusa ɲaamari ti ke be su yi katta Banisirayilaganko yi, Muusa da a su koni i da Misira bakken siina tannaxatendin xasu tanmu do baanandin fanan ya yi. 4 Ke ɲa Hamoorikaarankon tunka Sihoona raganden falle ya, ken ga ɲi taaxunu Hesiboona yi, a do Basaani tunka Wooga, ken ɲi taaxunu Sitarooti yi, Yedeeri noxon ŋa. 5 Muusa jope ke sariya fatanpansini Yarade ken kuta ya yi, Mowaaba ɲiiɲen ŋa, nan ti :[Annabi Muusa waajundi fana 1.6 - 4.40]
[Girindinden moxosironde]
6 « Tunka Duumante o Alla daali o da Horebu yi nan ti : “ Ke gide taaxen wase axa da keeta. 7 Xa yille girindindini dagana Hamoorikaarankon gidinjamaanen ŋa, i do i taaxanlenmon su, ku gaa Haraaba yi ɲiiɲanbaayanmen ŋa gunjuran noxo, ken do gidinjamaanen do gidinta, kafiini banboxunkitten do geejinlaqen ŋa, ken ni Kanaana ɲiiɲen ya. Kafiini do Libaano, nan daga a wara ma Furaata fan xoore ke yi. 8 Ayiwa in faayi ga da ɲiiɲe ke kini axa yi, Tunka Duumanten ga kuna ti ɲiiɲe ke be kuyen ŋa axa faabanu da, Ibirahiima do Isiyaaxa do Yaaxuba, kafiini i bonsonŋu be gaa riini ikun falle. Ken kuŋa xa daga a xallaaxu. ”
9 « N da a koni axa da ken waxati yi, nan ti : “ Inke baane ra nta axa wuttu. 10 Tunka Duumante axa Alla, a da axa gabondi, axa faayi xo kanmun saanun ya yi lenki, gaboyen ŋa. 11 Tunka Duumante, axa faabanu kama, a gan na axa me kafu axa yi wujune ta, na bareke ro axa yi, xo a yinme ga da a koni axa da moxo be. 12 Nke baane katta axa likken do axa tooran do axa gajanmison wuttu kan moxo ? 13 Xa da yugu sagara riini, seri faamunto ga ni, haqilanto, toxonto ga ni axa xabiilanun noxon ŋa. N na i wutu na i wara axa yinmen ŋa. ” 14 Axa da in jaabi nan ti : “ An ga da ke digaame be ko ti o na a ɲa, a siren ya ni ”. 15 N da axa xabiilanun yinmankon wutu, seri faamunto, a do toxonto. N da i ɲa yinmanko yi axa kanma, wujununsapon xirisu, kamansapon xirisu, tankaragensapon xirisu, a do tanmunsapon xirisu, kafiini xabiilan figumun ŋa. 16 N da axa kiitaanon ɲaamari ken waxati yi kuŋa, nan ti : “ Axa na axa waaxinun terinka, seren do i waaxin naxa, ma seren do i mukken naxa, axa na kiiti ti tonŋun ŋa. 17 Xa maxa yaaxe faayi kiiten ŋa. Seri maxayanqante xo seri wuruginte, xa terinkene ya. Xa maxa kanu sere su yaaxen ŋa, baawo kiiten ni Alla ya xalle. Xibaare be ga na xoto axa maxa, xa na a joofa in ŋa, n na a faayi. ” 18 Axa ga n xawa fiinu beenu su dabarini, n da axa ɲaamari ti i ya ken waxati yi.
[Murutiye Xadesi-barineeya yi]
19 « O saage nan girindindi gilli Horebu yi, axa ga da ke gunjura xoora kanunte be wari, o da a kutu katta Hamoorikaarankon giden banŋe. O ri Xadesi-barineeya yi xo Tunka Duumante o Alla ga da o ɲaamari moxo be. 20 Ken falle in ti axa da : “ O ri Hamoorikaarankon giden ŋa, Tunka Duumanten gaa ke be kinni o yi, o Alla. 21 Ayiwa ɲiiɲe ke be faayi gaa axa wure kundu, Tunka Duumanten da a kini axa yi ya ! Xa da a wutu kuŋa, axa na a xallaaxu xo Tunka Duumanten ga da axa ɲaamari moxo be, axa faabanu Alla. Xa duruxoto, xa maxa kanu ! ” 22 Axa su danmon ri katta in ŋa kuŋa nan ti : “ O na sero xayi dagana o kaane, i na jamaanen sonsolo, ken ŋa i na katu o xibaarini ti killu be o gaa bakka ti i ya, ken do o ga n xawa bakka do debu beenu yi. ” 23 Axa ken sinmaye liŋo in da ; n da yugu tanmi do fillo sugandi bakka axa yi kuŋa, fonlaqe su yugu baane-baane. 24 I taŋe gidinjamaanen ŋa, nan joofe ma Hasikooli waranlaqen ŋa, na non sonsolo. 25 I da jamaane ke yittirenmun wutu na i falla o yi. I ti o da : “ Jamaane ke be Tunka Duumante o Alla gaa a kinni o yi, jaman siren ya ni. ”
26 « Xa, axa bara dagana. Axa bara Tunka Duumanten ɲaamarixannen ŋa, axa Alla. 27 Axa da a xuumu-xuumu axa tilliisun wure nan ti : “ An ga da a wari Tunka Duumanten ga da o bagandi Misira jamaanen ŋa na o riiti yere, fo tana fe de, a da o xoni ya. A na a mulla na o ro Hamoorikaarankon kittun ya yi, i na o buruxa ! 28 O dagana minne yi keeta ? Baawo o maarenmun da o buttun roxondi ya nan ti : ‘ Ke jamaane seron dinkanun giilun ya ni diinanta oku yi. I debun xa ni debi xooron ya, tageyinbinnen wa koorini i ya gelli ɲiiɲe ma kanmu. O da hari Hanaaxigankon xa wari non ŋa, dinka giilu ku ! ’ ” 29 Xa in ti axa da : “ Xa maxa kanu, xa maxa jooti i kaane ! 30 Tunka Duumanten yinme ya n warene axa kaane, axa Alla, a wa gajanŋa axa da xo axa ga da a wari Misira yi moxo be. 31 Ayiwa gunjura ke xa noxon ŋa, a do axa terekille ke muuman su yi, axa yinmenu da a wari Tunka Duumanten ga da axa banbu moxo be, axa Alla, xo seren gaa i renmen banbunu, ma axa gaa joofene yere kundu yi. ” 32 Xa ke fi su kanma, axa ma toŋondi ti Tunka Duumanten ŋa, axa Alla. 33 Kuudo na daaxera muuru axa da, wuron ŋa, aken ya n warene axa kaane yinbingondoman noxon ŋa, na killen koyi axa yi. Kiyen ŋa, a na ware axa kaane tabullen noxon ŋa.
34 « Tunka Duumanten ga da axa diganxannun mugu kuŋa, a butu axa wure nan kuna ti : 35 “ Ke jaman sire be in ga kuna nan ti in wa a kinni axa faabanu yi, axakun seri bononto du baananbe su nta a walla ti axa yaaxen ŋa, 36 ma ganta Yefunne renme Kaalebu baane, aken wa roono jamaane ke yi. A tanbekkon filli ga tere ɲiiɲe ke be yi, in wa a kinni a do i bonsonŋun ŋa, baawo a toŋondi ti Tunka Duumanten ŋa ya. ” 37 Hari inke yinme xa be ga ni, Tunka Duumanten butu in wure na a sababun ɲa axa yi, ma a gaa tini in danŋa : “ Anken yinme xa nta roono jamaane ke yi. 38 Xa an battamaxe Nuunu renme Yuusawu, ken wa roono. A butten xotondi, baawo a ya na Isirayilagankon joofandini, kuudo i na jamaane ke xallaaxu. 39 Axa leminu ku be axa ga ti i wa i ɲaana kittidufoonu yi de, axa renmu ku beenu ga nta fo sire do fo bure bakka me yi lenki ke koota yi de, n na jamaane ke kinni kun ya yi, i ya n roono non ŋa na a xallaaxu. 40 Xa, xakun nan yille do axa taabattun ŋa katti Xulunjuumu fanŋen ŋa. ”
41 « Axa jaabindi nan ti in da : “ O da Tunka Duumanten kuta, ken kuŋa o wa dagana gaja xo Tunka Duumante o Alla ga da o ɲaamari moxo be. ” Ken kanma, axa du baananbe su da i gajanyokkun wutu, na a sinma ti axa ra wa segene gide ke yi newoye yaaxe maxa. 42 Tunka Duumanten daali in da kuŋa : “ A koni i da ti i n maxa sege giden ŋa ti i wa telle gaja, i n maxa daga du ro i xonnon kittun ŋa, baawo inke nta do i batten ŋa. ” 43 N da a ko axa da, axa ma in terinka ; axa muruti Tunka Duumanten daalen maxa, axa kaawa du yi, nan sege telle gidinjamaanen ŋa. 44 Hamoorikaaranko ku beenu gaa taaxunu gidinjamaane ke yi kuŋa, i bogu katta axa yi, yelleeni an tini tullunbayan ya ni, na axa juri, gelli Seyiri ma Harima. 45 Axa saaganton ŋa, axa wu katta Tunka Duumanten ŋa, xa Tunka Duumanten da axa lungu, a ma axa terinka. 46 Ken ya n sigi axa ga toxo Xadesi-barineeya yi wucu laate.