[Mowaaba dagaye]
2
« Ken falle o girindindi nan yille katta gunjuran ŋa teŋene Xulunjuumu fanŋe ke yi, xo Tunka Duumanten ga da a ko in da moxo be. O da wucu laate ɲa, o gaa Seyiri gidinjamaane ke yoorini. 2 Tunka Duumanten daali in da nan ti : 3 “ Ke gide yoorinden wase axa da keeta. Xa yille katta saahelin ŋa, 4 an na ke ɲaamarindixanne kini jaman ŋa nan ti : ‘ Axa faayi dangini ti axa waaxi Yesaawu bonsonŋun ya yi, i gaa taaxunu i ɲiiɲen ŋa Seyiri yi. I wa kanna axa yi. Xa, xa da du koroosi siri ; 5 xa maxa duŋe na i gaja, baawo in nta i ɲiiɲe ke kinni axa yi, hari tansaqa, baawo in da Seyiri gide ke kini Yesaawu ya yi xeye. 6 Xa na yiganden xobono ti axa xaalisin ya yi, na hari jin xobono i ya ti axa xaalisin ya yi. 7 Baawo Tunka Duumante, axa kama, a da axa barekindi ti axa kittiragollen su yi, na axa ke terende tuŋu axa da ke gunjura xoore yi ; ke ni a tannaxaten siinen ya yi keeta Tunka Duumanten gaa do axa yi, axa Alla. Fo wo fo ma konto axa yi. ’ ”8 « O da o waaxinun goori, Yesaawu bonsonŋu ku, i taaxunton gaa Seyiri yi. O bogu ti Haraaba do Laati do Cooni-gebeeri killen banŋe. O yille xadi, nan bogu do Mowaaba gunjuran killen ŋa. 9 Tunka Duumanten daali in da xadi : “ Maxa xenu Mowaaba yi, maxa duŋe i gajanŋa, n nta fo wo fo kinni an ŋa a jamaane ke noxon ŋa, an gaa a xayene. Baawo in da Yaari kini Luuti bonsonŋun ya yi. ” » 10 ( Saado ken ŋa, Heemigankon ya n ɲi taaxunu non ŋa, seri senbenton ya ni, i jaman gabe, i dinkanun giilun ya ni xo Hanaaxigankon moxo. 11 I jaatene kapa Lefaayigankon ya yi, xoyi Hanaaxiganko ku moxo, xa Mowaabaganko ku na i xilli Heemigankon ya. 12 Xa saado ken waxati, Hoorigankon ya n ɲi taaxunu Seyiri yi. Yesaawu bonsonŋu ku da non boosi kun ŋa ya, na i buruxa, nan taaxu i batten ŋa, xo Banisirayilaganko ga da i ɲiiɲon kita moxo be, ku ɲiiɲo be Tunka Duumanten ga da i kini i ya xeye yi. ) 13 « Ayiwa Tunka duumanten daali : “ Ken kuŋa saasa, xa giri axa na Jeredi waranlaqe ke kutu. ” O da Jeredi waranlaqe kutu.
14 « Nan giri Xadesi-barineeya yi katta Jeredi waranlaqen waxen ŋa, o da tanjikke do siino segi ya ɲa. Ken waxati noxon ya ni kurayugu fanon danmon su ga kara nan ɲeme, xo Tunka Duumanten ga kuna ti a yi i danŋa moxo be. 15 Tunka Duumanten yinme giri i xanne maxa, kuudo na i ɲama bakka forogon noxon ŋa.
16 « Kurayugon su ga kara nan ɲeme bakka jaman noxon ŋa bire be yi keeta, 17 Tunka Duumanten daali in danŋa nan ti : 18 “ An wa Mowaaba gingen kuttu ti Yaari banŋen ŋa lenki. 19 An ga na joofe Hamoonigankon jonkonmen ŋa, maxa xenu i ya, maxa i gaja, baawo in nta fo wo fo kinni an ŋa bakka Hamoonigankon jamaanen ŋa an gaa a xeyene. N da a kini Luuti bonsonŋun ya yi xeye yi. ” » 20 ( Ken xa jaateene Lefaayigankon ɲiiɲen ya yi. Lefaayigankon ya n ɲi taaxunu a yi nan xaso. Hamoonigankon wa i xilli Samusuumuganko. 21 I jaman gaben ya ni, i dinkanun giilun ya ni xo Hanaaxigankon moxo. Tunka Duumante da i buruxa bakka Hamoorigankon kaane, i da i ɲiiɲen xeye nan taaxu i batten ŋa. 22 Yesaawu bonsonŋu be taaxunton gaa Seyiri, Tunka Duumanten da ken me ya ɲaŋi i da. A da Hoorigankon buruxa bakka i kaane, i da i ɲiiɲen xeye nan taaxu a yi ma lenki ke koota kundu. 23 Haawiganko xa be taaxunton ga ɲi gupun ŋa ma Gaaja, Kireetinkon giri Kireeti na i buruxa, nan taaxu i batten ŋa. )
24 Ken falle Tunka duumanten daali : « “ Xa giri, axa n daga, xa na Harinooni waranlaqe kutu, n faayi ga da Sihoona do i jamaanen ro axa kittun ŋa, Hamoorikaaranke ke, Hesiboona tunka. Xa daga axa kaane maxa, xa n xenu a raganden ŋa, xa da a gaja ! 25 Lenki ke koota kundu, jama su gaa kanmun wure, n wa saagene axa kannun do axa jooten xenundini a su yi ; i ga na axa sefen mugu bire su, i sarallene ya nan hawuje axa kaane. ”
[Sihoona do Wooga niyiye]
26 « N da musulahandigaamun ro faarun raqen gelli Xedemooti gunjuran ŋa katta Hesiboona tunka Sihoona yi, nan ti : 27 “ N wa a mulla nan bogu ti an jamaanen ŋa. N terene do killinbutten ya yi ; n nta selene ti tayen ŋa, n nta selene ti noogen ŋa. 28 An gaa yigande be kinni in ŋa in gaa a yigana, n na a xobono ti in xaalisin ya, an gaa ji be kinni in ŋa in gaa a minni, n na a xobono ti in xaalisin ya. N nan tere in tan ŋa dangini baane tan, 29 xo Yesaawu bonsonŋu be gaa taaxunu Seyiri yi, a do Mowaabanko be gaa taaxunu Yaari, i ga duŋe in da moxo be. Ken ŋa, n na Yaradefanŋe kara katta ɲiiɲe be Tunka Duumanten gaa a kinni o yi, o Alla. ” 30 Xa, Hesiboona tunka Sihoona bara o gaa dangini ti i noqun ŋa, baawo Tunka Duumanten da a kiilun xotondi ya, axa Alla, na a sondomen kaawandi, kuudo na a ro axa kittun ŋa xoyi a gaa du yi moxo be lenki ke koota kundu yi. 31 Tunka Duumanten daali in da : “ An ma a wari ? N da Sihoona do i jamaanen kininden jopa katta axa yi. Xa da a jamaanen raganden jopa keeta. ” 32 Sihoona do i kuren jaman su bogu, nan gemu o yi katta Yahaca banŋe, kuudo na o gaja. 33 Tunka Duumanten da a kini o yi, o Alla, o da a ɲamallexu du kaane, a do i renmun do i jaman danman su. 34 O da a debun su raga ken waxati yinme yi, o da a debun su buruxa bogo-bogo, gelli yugo katta yaxare, a do leminen do xirise. O ma birante toxo. 35 O ga da debu beenu raga, o da i naaburu siginten baane ya wutu du da laxanloxonaabure yi, a do i naaburu jura. 36 Na a wutu gelli Haroweera be gaa Harinooni waranlaqen kanben ŋa, a do debe be gaa waranlaqe ke noxon ŋa, nan daga a wara ma Gilaadi yi, debi baane nta du yi a ga da o kaaɲa. Tunka Duumanten da i su ro o kittun ŋa, o Alla. 37 Ganta Hamoonigankon ɲiiɲe, axa ma tinko ikun ŋa : Ken ni Yaaboxo waranlaqe ke debun su ya, a do giden debu, ken do dingira su Tunka Duumanten ga ma ɲaamarindi ti a yi, o Alla.