3
« O yille ken falle nan sege do Basaani killen ŋa, Basaani tunka Wooga bogu nan gemu o yi Yedeeri, a do i kurayugon su, kuudo na o gaja. 2 Tunka Duumanten daali in danŋa : “ Maxa kanu a yi de, baawo in da a ro an kitten ŋa, a do i jaman su, kafiini a ɲiiɲen ŋa, an na a ɲa xoyi an ga da Hamoorikaarankon tunka Sihoona ɲa moxo be, ke taaxunten ga ɲi Hesiboona. ” 3 Tunka Duumante, o Alla, a da Wooga xa kini o yi, Basaani tunka ke, a do i jaman su. O da i kari, hari yonki baane ma toxo bireene. 4 O da a debun su raga ken waxati. Debe nta, o ga ma ke be raga i ya, tandume debe, Harigooba maran danman su, ken ga ni Wooga tunkaaxun ŋa Basaani noxo. 5 Ku debu kundu su koorinton ya ni ti tageyinbinni giilun ŋa, baafun do garunun gaa i fonlaqun ŋa. Ken do debi gabi-gabe tana, kun gaa i duran ŋa, i koorinto ga fe. 6 O da a su ɲa fo buruxante yi, xoyi o ga da Hesiboona tunka Sihoona buruxa moxo be ; o da deben su buruxa, gelli yugo katta yaxare, a do leminen do xirise. 7 Fo be ga ni xo debu ku naaburu siginten ŋa, a do naaburu jura, o da kun wutu laxanloxonaabure. 8 Ken waxati, o da Hamoorikaarankon tunkanun filli ɲiiɲon raga i ya Yarade ken kuta yi, gelli Harinooni waranlaqe, ma Herimoona gide, 9-10 siŋanbaayanmen debun su, a do Gilaadi danman su, kafiini Basaani su yi, ma Salika, a do Yedeeri, ken do Wooga tunkaaxun debun su, Basaani noxon ŋa, o da a su raga. (Sidoonikaarankon na Herimoona gide ke xilli Siroona giden ya, xa Hamoorikaarankon na a xilli Seniiri giden ya.) 11 Basaani tunka Wooga baane ya n toxo kisinte yi Lefaayigankon batten ŋa tannu. A saxusaxan ni mexensaxan ya. Anken ti ken saxa nta Hamoonikaarankon Raaba yi sa ? Saxa ke tan ni sogone kabu, a noxon ni sogone naxato, yuguxooransogone.[Yarade kinbakkan taxandinde]
12 « O da ku ɲiiɲo ya gaja na i raga ke waxati kundu yi. Na a wutu Haroweera be gaa Harinooni waranlaqen ŋa, a do Gilaadi gidinjamaanen taxanden do i debu, n da kun kini Rubeenikaarankon do Gaadikaarankon ŋa. 13 Gilaadi kutte ke, a do Basaani muuman su, Wooga mareyen noxon ŋa, n da a kini Manaasekaara fonlaqi taxanden ŋa. (Harigooba maran danman su, ken ga ni Basaani muuman ŋa, i wa tini non da xadi Lefaayigankon ɲiiɲe. 14 Manaase renme Yahiiri, ken da Harigooba mara ke su wutu, nan daga a wara ma Gesuurulankon do Maxaatigankon gingu. A da Basaani toxora i du yi, hari ke lenki, i na non xilli Haboota-yahiiri ya.) 15 N da Gilaadi kini Maxiiri yi. 16 Na a wutu Gilaadi yi ma Harinooni waranlaqen ŋa, n da ken kini Rubeenikaarankon do Gaadikaarankon ya yi. Gingen na a wuttu ken waranlaqe noxon ya yi, nan daga a wara ma Yaaboxo waranlaqen ŋa Hamoonikaarankon ginge. 17 Haraaba ɲiiɲanbaayanme ke do Yaradefanŋe xa ni gingen ya, ken wa a wuttu Kinereetixaare yi katta Haraaba sapinxaare ke yi, ken gaa Pisiga jipandan wure yi kinbakkan ŋa.
18 « N da axa ɲaamari ken waxati yi, nan ti : “ Tunka Duumante, axa Alla, a da ku ɲiiɲo kini axa yi ya kuudo axa na i xeye. Ken kuŋa, axakun kurayugu su, xa da axa gajanyokkun wutu, na Yaradefanŋe kara, axa n ware axa waaxinun kaane, kun ga ni Banisirayilaganko yi. 19 Axa yaqun do axa renmu, kafiini in gaa ke naaburu siginta gabe be tu axa maxa, kun baane ya n toqo debu ku noxon ŋa, ku debu be in ga da i kini axa yi. 20 Axakun yinmenu dagana gaja ya, ma Tunka Duumanten ga na axa waaxinun tuumandi xoyi axa moxo, ɲiiɲe ke be Tunka Duumante, axa Alla gaa a kinni i ya Yaradefanŋe ken kuta yi, ma i ga na a xallaaxu, ken bire sere su na saage katta i xeye be in ga da a kini a yi. ”
21 « N da Yuusawu ɲaamari ken waxati ya yi nan ti : “ An yinme yaaxen da a wari Tunka Duumante, axa Alla ga da fo be su ɲa ku tunkanu filli yi. An gaa riini kare katta ku tunkaaxunu be su yi non ŋa, Tunka Duumanten na ken me ya ɲaana i ya. 22 Maxa kanu i ya, baawo Tunka Duumanten yinme ya n gajanŋa axa da, axa Alla. ”
[Kanaana royen kabeye Annabi Muusa maxa]
23 « N laxaraxaasa katta Tunka Duumanten ŋa ken waxati yi nan ti : 24 “ N kaman wo, Tunka Duumante, an jope darontaaxun do an senben raniyen koyini an komen ŋa. Kan kamane na kanmun do ɲiiɲen ŋa, an senbe daren me gaa a yi, a gaa an gollun me dabarini ? 25 N da an ɲaaga, duŋe in da, n nan kare katta Yaradefanŋe ken kuta yi, jaman sire ke be gaa non ŋa, n na a faayi, ke gidi sire kundu, a do Libaano. ” 26 Xa Tunka Duumanten butu in wure ti axa sababun ŋa, a ma in terinka. Tunka Duumanten daali in danŋa ya : “ An fin wase kundu, maxa ke roye digaame koni in danŋa keeta. 27 Sege Pisiga giden tonben ŋa, an na an yaaxon wutu katta kinxennan do saahelin do banboxun ŋa, a do kinbakka, an na a wari ti an yaaxen ŋa, baawo anken nta ke Yarade kundu karana. 28 Yuusawu ɲaamari, an na a butten xotondi, na a saakondi, baawo a ya n karene ke jama kundu kaane, an gaa ɲiiɲe ke be walla, a ya na a xallaaxunu i da. ” 29 O toxo Beeti-poora guufuren teŋon ŋa.