[Farilanun do kiitu tangande]
4
« Saasa kuŋa Isirayila ! Farilanun do kiitu be in gaa an xaranŋundini i ya, i terinka, an na i dabari, ken ŋa an na bire. Ɲiiɲe ke be Tunka Duumante gaa a kinni axa yi, axa faabanu Alla, axa na a xeye. 2 N gaa axa ɲaamarini ti ku digaamu be yi, xa maxa fo jiidi kafini i ya, xa maxa fo naqasi bakka i ya. N gaa axa ɲaamarini ti Tunka Duumante axa Alla ɲaamarindixannu ku be yi, xa da i tanga ya. 3 Tunka Duumanten ga da ke be ɲa Baali-poora yi, axa da a wari ti axa yaaxen ŋa. Sere su ga sukke do Baali-poora batten ŋa, Tunka Duumanten da ken su buruxa bakka axa noxon ŋa, axa Alla. 4 Xa axakun beenu ga toxo tuugeene Tunka Duumanten ŋa axa Alla, axa su biranton ya ni lenki. 5 Axa da a wari de ! Tunka Duumanten ga da in ɲaamari ti farilanun do sariyanun ŋa moxo be, n Alla, n xa da i xaranŋundi axa yi ken moxo ya yi, kuudo axa gaa roono ɲiiɲe ke be yi na a xeye, axa na golli ti i ya non ŋa. 6 Xa da i tanga, axa na i golli, baawo jamo beenu ga na ku farilanu kundu mugu, i wa tini : “ Tonŋu tonŋu, ku sero ni fontuwaanon do seri faamunton ya, ke xabiila kundu ni xabiila daren ya. ” Axa fontuwaaxun do axa faamuyen ni ken ya yi kun jamo do me naxa. 7 Kan jama dare na du yi, kamane gaa a maxa, ken gaa tinkoono i ya xoyi oku ga na Tunka Duumanten xiri waxati su a gaa tinkoono o yi moxo be, o Alla ? 8 Kan xabiila xoore tana na du yi, Farilanun do kiitun gaa a maxa, i teleŋonto ga ni xo ke sariya kundu be in gaa a kinni axa yi lenki ?9 « Ganta xa da du koroosi moxosiri, xa da duruxoto axa n maxa mungu do ku fiinu be axa yinme yaaxen ga da i wari, kuudo axa birantaaxu ke wucen danman su yi, i n maxa bogu axa sondomun ŋa koota yi. Axa na i tuyindi axa renmun ŋa, a do axa renmun renmu. 10 Koota be axa ga sigi Tunka Duumante axa Alla jon me naxa Horebu yi, a ga daali nan ti in da : “ Jaman kafu me yi in da, n na in daalen mugundi i ya ; n gaa ke be xaranŋundini i ya, kuudo i n kanu in ŋa i bireyen wucen su yi ɲiiɲe ke kanma, i xa na i xaranŋundi i renmun ŋa. ” 11 Axa tinko nan sigi gide ke wure, yinben wa xolono gide ke yi tiidinbinnen noxon ŋa ma kanxotte, fon minaaxi. 12 Tunka Duumanten da du toxo yinben naxaanen nan digaamu axa da. Diganxannen ri axa yi, axa da a ken diganxanne baane ya mugu, xa axa ma sawura su wari. 13 A da axa xibaari ti i laayidun ŋa, ken ga ni digaamu ku tanmi be a ga da axa ɲaamari ti axa na i dabari, a da kun ya safa gidinwallahon filli kanma. 14 Nke xa be ga ni, Tunka Duumanten da in ɲaamari ken waxati yi ti in na axa xaranŋundi farilanun do kiitun ŋa, kuudo axa na golli ti i ya jamaane ke yi, axa gaa kareene katta jamaane ke be yi kuudo na a xeye.
[Dukoroosiye munubatiyen ŋa]
15 « Xa da du koroosi axa yinmenu yi moxo siri, baawo koota be Tunka Duumante axa Alla ga da axa daalanlenmaaxu Horebu yi yinben noxon ŋa, axa ma sawura su wari. 16 Xa maxa du bonondi, axa gaa sawura dabarini du da muno yi yaaxe su kanma, ken ga ɲa yugunsawura ya yi ma yaxarinsawura. 17 A n maxa ɲa daaban noone su yi ɲiiɲen kanma, a n maxa ɲa yelinkanpinten noone su yi, ken gaa kanpini kanmun ŋa. Xa maxa kun me dabari. 18 Fo wo fo danbe, ken gaa minixi-manaxana ɲiiɲen kanma, ma ɲexe su danbe, ken gaa ji jupun ŋa ɲiiɲe ke wure, xa maxa i sawura dabari. 19 Xa maxa axa yaaxon wutu kanmun ŋa, na kiyen do xason do saanun faayi, kun ga ni kanmun kurun ŋa, axa gaa du walla jaaraben ŋa, nan sujudi i da, ma nan golli i da. Tunka Duumante axa Alla, a da kun kini seri tananu ya yi batifo yi ɲiiɲe ke yaaxen kanma. 20 Xa, axakun kuŋa, Tunka Duumanten da axa wutu, na axa bagandi tooran noxo Misira jamaanen ŋa, non ga ɲa axa maxa xo tuntunraqe¤, a da ken ɲa ya kuudo axa nan ɲa ike yinme xeyimaxantanlenmon ŋa, xo axa gaa moxo ke be yi lenki.
21 « Xa, Tunka Duumanten butu inke wure ti axa sababun ŋa. A kuna nan ti inke nta Yaradefanŋe karana, Jiiɲa sire ke be Tunka Duumante axa kaman gaa kinni axa yi taqe, n ta roono. 22 Ken kuŋa, nke kalla ke ɲiiɲe ya yi yere. N nta Yaradefanŋe karana. Xa, axakun wa karene na ɲiiɲa sire ke xeye. 23 Xa da du koroosi, axa n maxa mungu do Tunka Duumante axa Alla laayiduxannu be a ga da i tafu i do axa naxa, axa gaa sawura su danbe dabarini du da, ke be Tunka Duumante axa Alla ga da axa kaba a yi. 24 Baawo Tunka Duumante axa Alla, yinben ya ni, a gaa xurumindindini, aken ni Allasuuxaanan ya.*
25 « Axa ga na renmun do kisimarun kita, axa ga kiito jamaane ke taaxen ŋa, axa nda du bonondi, na sawura su danbe dabari, na Tunka Duumanten xosen dabari, axa Alla, na a butundi, 26 n na kanmun do ɲiiɲen ɲa seedaano yi axa xanne maxa lenki ke koota, nan ti axa gaa Yaradefanŋe karana nan daga ɲiiɲe ke be xeye, axa wuyinun ntaxa giiloono ɲiiɲe ke kanma yi. Axa buruxeene bogo-bogonburuxeyen ya yi nan sanku. 27 Tunka Duumanten na axa sanqi do xabiilanun naxa. A gaa axa denne xabiilanu ku be yi, axa jaatun na roxo i naxan ŋa. 28 Axa na kamanu batu non ŋa, seron kittun ga da kun dabari ti sollun do gidun ŋa, ku beenu ga nta warini, i nta mugini, i nta yigene, i nta timinlegene. 29 Xa ganta, axa na Tunka Duumanten muuru gelli non ŋa, axa Alla. Axa ga na a muuru ti axa sondomun do axa yonkinun su yi su, axa na a kitta ya. 30 Liixiye nda ri axa yi, ku fiinu kundu su ga da axa kita, axa wa lagarini saagene katta Tunka Duumanten ŋa axa Alla, axa wa a terinka xa. 31 Na a tugu ti Alla ken ni hinnaanan ya, Tunka Duumante axa Alla, a nta axa sedde, a nta axa buruxana, a ga kuna ti laayidu ke xa be yi i do axa faabanu naxa, a nta mungunu do a yi.
32 « Xa tirindindi gelli ganni, kiyi fano be ga dangi axa kaane, gelli koota be Alla na haadamarenmen taga ɲiiɲen kanma, gelli kanmun ke kanbe ma a ken kanbe ; yaala ke fi xoore kundu me demu ɲaana ba, ma a me mugi ba ? 33 Sero demu Alla xannen mukku abada a gaa sefene yinben noxo, xoyi axa ga da a mugu moxo be, i kamannu ga toxo bireene ? 34 Ma walla xa Alla demu riini jama wutu ti i du yi kundun ŋa bakka jama tana noxon ŋa, ti kasaaran do taagumansun do kaawafiinun ŋa, a do gajanŋu, ken do senben do fanka, a do kanuyi xoore, xoyi Tunka Duumante axa Alla ga da ke be su ɲa axa da Misira noxon ŋa axa yinme yaaxon ŋa ? 35 Axakun yinmenu da a wari keeta na a tu ti Tunka Duumanten ya ni Alla yi, fo tana su nta du yi a ga fe. 36 A da i xannen mugundi axa yi gilli kanmun ŋa, kuudo na axa toŋo ; a da i yinbi xooren koyi axa yi ɲiiɲen kanma, na a diganxannen mugu yinbe ke noxo. 37 Axa faabanu xanuyen ya na a yi, ken ya n sigi a ga da i bonsonŋun sugandi i falle, na axa wara du kaane bakka Misira yi ti i senbe daren ŋa, 38 kuudo axa na jama xoora senbenton xata bakka du kaane, ku beenu ga n fuŋu axa yi senbe, na i ɲiiɲon kini axa yi taqe, xo axa yaaxen gaa a yi moxo be lenki ke koota. 39 Axa na a tu lenki nan yille a sinmana axa sondomun ŋa, nan ti Tunka Duumanten ya ni Alla yi kan faton ŋa kanmun di, a do ɲiiɲen kanma yi wureedun ŋa. Fo tana su nta du yi. 40 Xa na a farilanun do a ɲaamarindixannun tanga, ku be in ga da axa ɲaamari ti i ya lenki, axa jamun danŋa, a do axa renmun jamun danŋa axa falle, ken ŋa axa na axa bireyen kooton giilondi ɲiiɲe ke kanma, ke be Tunka Duumante axa Alla gaa a abadankinni axa yi. »
[Xaliifedebu Yarade kinbakkan ŋa]
41 Ken falle Muusa da debu sikki sugandi Yarade ken kuta yi kiyen boguran ŋa. 42 Sere be nda i kapanlenman kari futuxiye yi, xonnaaxu ma ɲi i naxa daaru, a ma ɲi i naxa daarume, a ra wa wurunu telle ku debu yi, a na kisi. 43 Kun debu ni Beceere, a gaa gunjuran noxo, siŋanbaayanmen ŋa, Rubeenikaarankon ya fo ni, ken do Lamooti gaa Gilaadi yi, Gaadikaarankon xalle, nan kafi Golaana yi Basaani, ken ni Manaasekaarankon ya fo yi.*
[Annabi Muusa waajundi fillande 4.44-26.19]
[Alla digaamu, nan giri Tuurisiina giden ŋa 4.44-11.32]
44 Ke ya ni sariyan ŋa Muusa ga da a wara Banisirayilaganko wure. 45 Banisirayilaganko bakken falle Misira yi, seedesefon do farilanun do kiitu beenu Muusa ga da i koni i da, kun ya ni ku. 46 Ke su ɲa na Banisirayilaganko toxo Yaradefanŋe kutan ya yi Beeti-poora guufuren teŋon ŋa, Hamoorikaarankon tunka Sihoona ɲiiŋen ŋa. Ken taaxunten ɲi Hesiboona ya yi. Muusa do Banisirayilaganko bogu falle Misira, i da a ɲamallexu, 47 na a ɲiiɲen do Basaani tunka Wooga ɲiiɲen foyaaxu. Kun filli su ni Hamoorikaarankon tunkanun ya yi Yaradefanŋe ken kuta yi kinbakkan banŋe. 48 Gelli Haroweera be gaa Harinooni waranlaqen kanben ŋa, ma Siwoona gide, ken ga ni Herimoona yi, 49 ken do ɲiiɲanbaayanmen danman su yi Yarade waxen ŋa kinbakka, ma Haraaba geejin ŋa Pisiga jipandan wure, i da a su foyaaxu.