[Alla Tafundixannun tanmi]
5
Muusa da Banisirayilaganko su xiri nan ti i da : « Isirayila, terinke, n gaa farilanun do kiitu be koono axa taron ŋa lenki, xa na i xara, axa na i killen tera moxosiri. 2 Tunka Duumante, o Alla, a da tafunden ro o do i naxa Horebu ya yi. 3 Tunka Duumanten ma ke tafunde ro i do o faabanu baane naxan ŋa de. Oku beenu gaa bireene yere yi lenki, a da a ro i do oku xa naxa. 4 Tunka Duumanten digaamu axa da yaaxe ti yaaxen ŋa giden kanma yi yinben noxo. 5 Nke ya n ɲi sikki axa do Tunka Duumanten naxan ŋa ken waxati, na Tunka Duumanten digaamun kiɲandi axa yi, baawo axa kanu yinbe ke yi ya, axa ma sege giden ŋa xa. Alla daali :6 « “ Nke ya ni Tunka Duumanten ŋa, an Alla, ke be ga da an bagandi Misira ɲiiɲen ŋa, bakka komonkonpen ŋa. 7 Maxa allanu tana kafu in ŋa.
8 « “ Maxa sawura su danbe dabari du da, ken gaa kanmun ŋa, kanxotte, ma ke be gaa ɲiiɲen ŋa wureedu, a do fo be gaa jin ŋa ɲiiɲen wure. 9 Maxa sujudi i da, maxa i batu, baawo inke ya ni Tunka Duumanten ŋa, an Alla, nke ni Alla suuxaanan ya. N wa faabe garamajigingollun jaatene do a renmun do a yillayi sikkan do a yillayi naxatan batten ŋa, ku beenu ga da in xoni. 10 Xa sere be ga na in xanu, an ga da in ɲaamarixannu ku tanga, n wa in fonnansiraaxun koyini, na a wutu kun kamannu yi, katta i kisimarun do i kisimarun kisimarun ŋa, ma wujuunun jaatu.
11 « “ Maxa Tunka Duumanten toxon battaraaxu, an Alla, baawo sere be ga na Tunka Duumante an Alla toxon battaraaxu, a nta an toqo no.
12 « “ Sibitinkootan tanga, na a ɲa koota senne yi, xoyi Tunka Duumanten ga da an ɲaamari moxo be, an Alla. 13 An na an gollun su dabari bito tunmi noxo, 14 xa bita ɲerundi, Sibitinkoota, ken ni Tunka Duumanten Tuumayinkootan ya, an Alla. An yinme do an renyugun do an renyaxaru, kafiini an komon do an tunbaarun ŋa, ken do an naanun do faru, a do an naaburusiginten su, kafiini mukke su gaa an debun ŋa, maxa golle su dabari. Ken ŋa, an komon do an tunbaarun na tuuma xoyi an moxo. 15 Sinme, nan ti an ɲi komaaxun ya yi Misira jamaanen ŋa, Tunka Duumante an Alla da an bagandi bakka non ŋa ti i senben do i fankan ya. Ken ya saabu da ni, Tunka Duumante, an Alla ga da an ɲaamari, ti an na Sibitinkootan tuumayen dabari.
16 « “ An ma do an faaba daro xo Tunka Duumanten ga da an ɲaamari moxo be, an Alla. Ken ŋa, Tunka Duumanten gaa ɲiiɲe be kinni an ŋa, an na wuyi gille kita a kanma, an na wulluliŋontaaxu.
17 « “ Maxa sere kari.
18 « “ Maxa jeeni.
19 « “ Maxa fayi.
20 « “ Maxa seede ti an kapanlenman ŋa gaaren kanma.
21 « “ Maxa yaaxarangillaaxu do an kapanlenman yaqen ŋa. Maxa yaaxarangillaaxu do an kapanlenman kan ŋa, a do a soxanten do a kome, do a tunbaare, a do a gunbo, do a fare, ken do fo wo fo su ga ni an kapanlenman xalle yi. ”
22 « Ku digaamu kundu ya ni Tunka Duumanten xan xooren ga da i ko axa jaman danman su da giden kanma yi yinben do tabullen do minaaxen naxaanen ŋa. A ma fo kafu i ya. A da i safa gidinwallaho filli kanma, na i kini in ŋa. 23 Bire be kuŋa axa ga da xanne ke mugu bitan binnen noxon ŋa giden kanma yi yinbinkuman noxo, axa tinko katta in ŋa, axa xabiilan yinmankon do axa xirisun su. 24 Axa ti : “ O faayi yere, Tunka Duumante o Alla da i kallankaaxun do i darontaaxu koyi o yi, o da a xannen mugu yinben naxaanen ŋa. Lenki ke koota, o da a wari nan ti Alla wa sefene seren da, an gaa bireene xa. 25 Saasa kuŋa, manne n sikki o gaa kalla ? Baawo ke yinbi xoore kundu na o yigana ya. O ga na yille Tunka Duumante o Alla xannen mukku xadi su, o kalla ya. 26 Kan fataganke baane n demu Alla ŋalinten mukku digaamunu yinben noxon ŋa xoyi oku moxo, a kaman ga bire ? 27 Anken nan tinko, Tunka Duumante o Alla gaa fo be su koono, an na i mugu ; a ga na fo be su koni an da, anken na i koni o da, o na terinke nan golli ti i ya. ”
28 « Tunka Duumanten da axa mugu bire be axa gaa axa digaamun koono in da. A daali in da kuŋa : “ Ke jama kundu ga da digaamu beenu koni an da, n da i mugu, i digan koninten su siro. 29 Yelli i sondomun gan na kanu in ŋa, na in ɲaamarixannun su tanga duna kootan su yi ! Kuudo i xa do i bonsonŋun na abadanxeerin kita ! 30 Daga a koni i da, i n yille katta i tilliisun ŋa. 31 Anken ken nan sigi yere, an gaa ɲaamarixannun do farilanun do kiitu beenu xaranŋundini i ya, n na i su koni an da ; n gaa ɲiiɲe be kinni i ya i gaa xeyene, i na golli ti i ya ken ɲiiɲe kanma. ” 32 Xa da i tanga, kuudo axa na i dabari xoyi Tunka Duumante axa Alla ga da axa ɲaamari moxo be. Xa maxa ɲenge ti tayen ŋa, xa maxa ɲenge ti noogen ŋa. 33 Tunka Duumante axa Alla ga da axa ɲaamari ti kille su yi, xa na toxo ken terana, axa na toxo bireene, xeerin na ɲaŋi axa da, axa biton na giilo ɲiiɲen kanma axa gaa ɲiiɲe ke be xeyene.