[Ɲaamarindixannun do sariyanu]
[Tawuhiidi]
6
« Ɲaamarindixannun do farilanun faayi, a do kiitu be Tunka Duumante, axa Alla ga ɲaamarindi ti i ya, kuudo na i tuyindi axa yi, axa nan golliɲa ti i ya jamaanen noxon ŋa, axa gaa kareene katta jamaane ke be yi na a ɲa du da xalle yi, 2 ken ŋa, axa na kanu Tunka Duumanten ŋa, axa Alla. N ga da farilanu do ɲaamarindixannu beenu su kini axa yi, xa nan tigiti i ya axa wuyin muuman su yi, axakun yinmenu, do axa renmun do axa kisimaru, kuudo axa wuyinun na giilo. 3 Isirayila, an na terinke, nan duruxoto na i dabari. Ken ŋa, an na xeeri kita, an na jiidi xattin do tamarileeman waranlaqen jamaanen ŋa, xo Tunka Duumanten ga da a laayidun wutu axa da, axa faabanu Alla.4 « Terinke, Isirayila ! Tunka Duumanten ni Tunka Duumanta baane ya, o Alla. 5 An na Tunka Duumanten xanu ti an sondomen su yi, an Alla, an na a xanu ti an yonkin su yi, na a xanu ti an senben su yi.* 6 N gaa ɲaamarindixannu ku beenu kinni axa yi lenki, i wa toqo axa sondomun ŋa. 7 Xa na i xaranŋundi axa renmun ŋa. Axa taaxunton na i koni i da kaanun noxon ŋa. Axa terenton na i koni i da do killun ŋa, a do axa saxunton do axa girinto. 8 Xa na i ɲa taagumanse yi, na i yetu axa kittun do axa taŋon ŋa. 9 Xa na i safa do axa gallaqingondomon ŋa, a do axa debun roraqu.
10 « Tunka Duumante axa Alla ga kuna ti jamaane ke be kuyen ŋa axa faaba Ibirahiima do Isiyaaxa do Yaaxuba danŋa, ti i wa a kinni axa yi, a ga na axa rondi non ŋa bire be, axa wa debi xoora faranparo ɲiini no, axakun ma kun taga. 11 Kaanun fakkon ya ni fo siren danben su yi, axakun ma kun ro non ŋa. Guufon gemunton wa non ŋa, axakun ma kun jaaba, reesetinŋun do jayituunatinŋu, axakun ma i lori, ken kuŋa, axa ga na yige nan fogu, 12 xa maxa mungu do Tunka Duumanten ŋa de ! A ya n da axa bogu komonkacen ŋa Misira jamaanen noxo. 13 Ken bire, axa nan kanu Tunka Duumanten ŋa, axa Alla. Axa na a ya batta, axa kunana ti a ya toxon ŋa. 14 Axa maxa alla tana batu do axa taaxanlenmo ku batten ŋa, 15 baawo Tunka Duumante ke be gaa axa naxan ŋa, axa Alla, suuxaanan ya ni, a butten yanganxatan nan maxa daga xenu axa yi, a gaa axa buruxana bakka ɲiiɲen kanma. 16 Axa maxa Tunka Duumanten xenpe, xoyi axa ga da a xenpe Maasa¤ yi moxo be.* 17 Ɲaamarindixannu be do farilanu be do kiitu be Tunka Duumanten ga da i ko axa da, axa Alla, axa na i tanga moxo siri. 18 Fo be siren ga ni, a gaa genme Tunka Duumanten ŋa, axa na ken dabari, kuudo axa na wulluliɲontaaxu. Tunka Duumanten ga kuna ti jaman sire be kuyen ŋa axa faabanu da, axa na ro, na a ɲa du da xalle yi. 19 A na axa xonnon yonto, na i laatondi bakka axa yi, xoyi a ga da a laayidun wutu axa faabanu da moxo be.
20 « A xunbanen xunbane, axa renmun ga na axa tirindi nan ti : “ Tunka Duumante o Alla ga da ku seedesefo do ku farilanu do ku kiitu taaxu axa yi, ken xa maana ? ” 21 Axa na ti i da kuŋa : “ O ɲi komaaxun ya yi Firawunan maxa Misira, xa Tunka Duumanten da o bagandi non ŋa ti i senben ya. 22 Tunka Duumanten da taagumansi xooron do kaawafi xoora kanunton koyi o yi, kuudo na Misira jamaanen do Firawunan do i kan halaki. 23 A da o bagandi non ŋa, na o riiti ke jamaane be a ga da a laayidun wutu o faabanu da ti kuneyen ŋa, na a kini o yi. 24 Tunka Duumanten da o ɲaamari ti o na ku farilanu su golli, o nan kanu Tunka Duumanten ŋa, o Alla, kuudo o na wulluliŋontaaxu koota su, a na o toxo bireene xoyi o gaa moxo be yi lenki. 25 O nda ku ɲaamarindixannu su golli xo Tunka Duumante o Alla ga da o ɲaamari moxo be, o ɲa seri teleŋonto yi. ”