[Alla seri sugandinte]
7
« Ɲiiɲe ke be axa gaa a xeyene, Tunka Duumante axa Alla ga na axa deni non ŋa bire be, a wa Heetigankon jamon gabun sellana bakka axa kaane, a do Girigaasinun do Hamoorikaaranko, kafiini Kanaanagankon do Perijinun ŋa, a do Hiiwikaarankon do Yebuusikaaranko. Xabiilanu ɲeri ya ni, i n gaba axa yi, i n senbentan axa yi. 2 Tunka Duumante axa Alla wa i kinni axa yi, axa na i kari du kaane na i buruxa, buruxande su xenpa. Xa maxa laayidu tafu axa do i naxa, xa maxa hinne i ya xa. 3 Xa maxa yaxu ro axa do i naxa : xa maxa axa ren yaxarun kini i ren yugun ŋa ; xa maxa i ren yaxarun yaxi axa ren yugun da. 4 Ken ga fe, i ra wa axa renmun yillandini bakka in ŋa, i gaa alla tananu batta ; Tunka Duumanten butten yanganxatan na xosi axa raga, a na axa karamanburuxa. 5 Xa, axa ga n xawa ke be ɲaana i ya, a faayi ke : xa na i sadaxindinoqunun guruja, xa na i gidi siginton kutu, na i munu yaxare Haseera gondoma siginton xoso, na i sawura segunton buyi. 6 Baawo axakun ni jama sennen ya yi Tunka Duumante axa Alla maxa. Tunka Duumante axa Alla da axa ya sugandi kuudo nan ɲaŋi a da duran taqe yi bakka duna jamon danmon naxan ŋa ɲiiɲen yaaxen kanma. 7 Tunka Duumanten ga mali axa yi na axa sugandi, ken feti nan ti axa n gaba duna jamon kuttun su yi de, axa ya n lamaanu duna jamon danmon su yi yinme. 8 Xa ganta, axa xanuyen ya na Tunka Duumanten ŋa, a ga kuna ti ke laayidu be yi axa faabanu da, a da ken laayidu ya tanga. Ken ya n sigi Tunka Duumanten ga da axa maxawasa ti i senben ŋa bakka komonkacen ŋa Firawuna maxa, ken ga ni Misira tunkanyugo ke yi. 9 Xa da a tu nan ti Tunka Duumante axa Alla, a ya ni Alla, Alla duntenŋe, a gaa i laayidun tangana, a wa fonnansiraaxunu i xannaanon do i ɲaamarindixannen tangandaanon da, ma wujunun jaatun yilleyu. 10 Xa ku beenu ga da a xoni, a wa i tugana na i buruxa. Ku be ga na a xoni a nta i dukku ti a yi ; a na i tugana ya xoyi i ga a xoni moxo ke be. 11 N gaa axa ɲaamarini ti ku ɲaamarindixannu do ku farilanu do ku kiitu be yi lenki, xa na i tanga, nan golli ti i ya.12 « Xa ga na ku kiitu mugu, axa ga da i tanga, axa ga da du koroosi nan golli ti i ya, Tunka Duumante axa Alla, a wa i laayidun tangana axa danŋa, a do fonnansiraaxu ke be a ga kuna ti a yi axa faabanu da. 13 A wa axa xanna na axa barekindi, na axa jiidi ɲiiɲe ke kanma, ke ɲiiɲe be a ga kuna ti a yi axa faabanu da, ti i wa a kinni axa yi, a na axa saarenuxunlenmun barekindi, na axa ɲiiɲen funtifoonun do soxanfon barekindi, a do axa reesenjiinun do axa yigeteenu, axa nan do axa tanmisen na jiidi. 14 Bareke na ro axa yi diinanta jamon su yi ; yugon do yaxaren do naaburu siginte, boroke nta ɲiini axa yi. 15 Tunka Duumanten wa watten su laatondini bakka axa yi. Misira watti burun su, axa gaa ku beenu tu, a nta xenundini axa yi ; i be nda axa xoni, a na kun wattu janbana ken kaman ya yi.
16 « Tunka Duumante axa Alla gaa xabiila su roono axa kittun ŋa, axa na a su buruxa, xa maxa hinne i ya ti axa yaaxen ŋa, xa maxa i allanun batu, baawo i ɲaana sellequn ya yi axa danŋa. 17 Axa ra wa a sinmana nan ti : “ Ke xabiila ya n gaba o yi, o katta i xatana kan moxo ? ” 18 Xa maxa kanu i yi de ! Tunka Duumante axa Alla ga da ke be ɲa Firawuna do Misira jamaanen su yi, xa sinme ken du ya yi, 19 ken ga ni axa ga da kasaara xoore ke be wari ti axa yaaxen ŋa, a do taagumansun do kaawafiinu, kafiini senbe xoten do fanka wuruginte, kun be Tunka Duumanten ga da axa bagandi ti i ya, axa Alla. Ku xabiilanu be axa gaa kanna i ya, Tunka Duumante axa Alla na ken me ya ɲaana kun xa danmon su yi. 20 Tunka Duumante axa Alla, a wa hari jaamen xa xayini i ya, ku beenu kuttun ga toxo muqu, ma a ga nda kun xa buruxa bakka axa kaane. 21 Xa maxa kanu i kaane, baawo Tunka Duumante axa Alla wa kafiini axa yi, tunka xoora kanunte. 22 Tunka Duumante axa Alla, a wa ku jamo sellana bakka axa kaane fonne fonne. Axa ra nta i ɲamana batti baanen ŋa, baawo axa ga na i ɲama batti baanen ŋa, jamaanen ra wa ɲaana gunne yi, gundufoonun gaa riini axa xanne maxa. 23 Tunka Duumante axa Alla wa i roono axa kitten ŋa ; i wa hawujeene axa kaane moxo buru, ma i ga buruxe. 24 A wa i tunkanyugun kinni axa yi, axa na i toxonun buruxa bakka kanmun wure ; sere nta sikki axa kaane axa ga nta a kaman buruxana. 25 Axa na i munonu ku sawuron buyi, xa, kanŋe ke do xaalisixulle ke be gaa i kanma, xa maxa nate do a yi, axa gaa a wuttu du da, a n maxa daga ɲa selleqen ŋa da ; a haraamunten ya ni Tunka Duumanten noqu, axa Alla. 26 Xa maxa fo sobinte riiti axa kan ŋa axa gaa buruxeene xoyi a moxo. Xa bara ken ŋa ya, axa na a xoni bogo-bogo, baawo a haraamunten ya ni.