[Gongondu, teŋene Tunka Duumante siroyen munguyen ŋa]
8
« Ɲaamarindixannu ku danmon be su in gaa axa ɲaamarini ti ya lenki, xa da i tanga moxosiri, kuudo axa na bire nan jiidi. Ken ŋa Tunka Duumante ga kuna ti ɲiiɲe ke be yi axa faabanu da, axa wa riini a kamanaaxu. 2 Tunka Duumante axa Alla ga da axa bagandi ti kille ke be yi do gunjuran ŋa ke tannaxate siine noxo, na axa roxondi, na axa jaarabi, xa sinme do ken ŋa. A da ken ɲa ya, kuudo ke be gaa axa sondomun ŋa, i na a tu, selli axa gaa a ɲaamarindixannu ku tangana ma axa ga nta i tangana. 3 A da axa roxondi, na axa dullundi, na axa yigandi ti mannan ŋa, ke be axa ga ma ɲi a tu, axa faabanu ga ma ɲi a tu, kuudo na a tuyindi axa yi nan ti haadamarenme nta bireene ti buurun baane yi, ganta fo wo fo gaa bakka Tunka Duumanten daalen ŋa, ken wa seren birandini. 4 Ke tannaxate siine kundu, axa yiraamun ma xaso axa faton ŋa, axa taanun xa ma yiti. 5 Axa na a tu ti axa sondomun ŋa, nan ti seren gaa i renmen jikkundini moxo be yi de, Tunka Duumante axa Alla xa na seren jikkundini ken moxo ya. 6 Tunka Duumante axa Alla, axa na a ɲaamarindixannun tanga ti a killen terenden ŋa, nan kanu a yi xa. 7 Baawo Tunka Duumanten na axa denne ɲiiɲa siren ya yi, axa Alla. Jinkillun do waranlaqun ɲiiɲe, ken do terinyaaxa jupun gaa dullana ɲiiɲanberan do gidun noxon ŋa. 8 Alikaaman do yillen ɲiiɲen ya ni, ken do reesen do turon do runmaani. Jayituunanten ɲiiɲen ya ni, a do yaage. 9 Ɲiiɲe ya ni, axa nta korini axa logoman ŋa axa gaa a yigana, fo wo fo nta kontono axa yi. Ɲiiɲe ya ni, mexen gaa giden ŋa, an ra wa jaxawallen sokkotini bakka a giden ŋa. 10 Ke ɲiiɲa sire be Tunka Duumante axa Alla ga da a kini axa yi, axa wa yigene nan fogu ken ɲiiɲe kanma, na barikan saxundi aken Tunka Duumanten da, axa Alla.11 « Xa da du koroosi, nan maxa mungu Tunka Duumante axa Alla yi. A ɲaamarindixannun do a kiitun do a farilanu ku tanganden be in ga da axa ɲaamari ti i ya lenki, xa maxa i toxo no. 12 Bire be axa ga na yige nan fogu, axa ga da tagandi sirun taga nan taaxu, 13 axa nan do axa tanmisen ga jiidi, xaalisixullen do kanŋen xa ga gabo, kitaye su gaa axa maxa a su ga kugu, 14 xa maxa kaawa du yi, axa gaa mungunu do Tunka Duumante axa Alla yi. Aken ya n da axa bagandi Misira ɲiiɲen ŋa bakka komonkacen di. 15 Aken ya n da axa geesu gunjura xoora kanunten noxon ŋa. Xa maxa mungu do a yi. Non ni saman tooxinton do ɲantonun ɲiiɲen ya, a do daqu ɲanŋun ɲiiɲe, ji nta non ŋa, xa a ya n da jin xaarandi axa danŋa bakka gidi saaken ŋa ken noqu yi. 16 A ya n da mannan yigandi axa yi gunjura ke noxo, axa faabanu ma ɲi manna tu. A da ken ɲa ya na axa roxo, na axa jaarabi, ke su do ya axa na xeerikite. 17 Ayiwa xa maxa a sinma nan ti : “ O senben do o raniyen ya n da ke bannaaxu kini o yi. ” 18 Xa da Tunka Duumanten ya sinma, axa Alla, baawo a ya na senben kinni axa yi, axa na bannaaxu, kuudo a ga kuna ti laayidu ke be yi axa faabanu da, a na ken laayidu tinmandi, a faayi ga da ken ya ɲa lenki ke koota kundu yi. 19 Ayiwa axa ga na ri mungu do Tunka Duumante axa Alla yi, nan sukke do alla tananu ya batten ŋa na i batu, nan sujudi i da, n wa a koono axa da sooben ŋa lenki nan ti axa buruxeene ya. 20 Tunka Duumanten gaa a kanma na ku xabiilanu buruxa bakka axa kaane moxo ke be yi de, axa xa buruxeene ken moxo baane ya, na a sababun ɲa axa ga ma Tunka Duumanten terinka, axa Alla.