[Kanaana jamaanen ragemaana]
9
« Terinke, Isirayila ! An wa Yaradefanŋe karana lenki, nan daga xabiilanu xata, i ga n xoora an ŋa, i ga n senbenta an ŋa xa. Debi xooron ya ni, tegeyinbinnun gaa i ya ma kanmu. 2 Jama ya ni, i dinkanun ya ni, i giilun ya ni, Hanaaxiganko ku be axa gaa i tu de, axa ga da a mugu xa i gaa tini : “ Ko n katta sikki Hanaaxigankon kaane ? ” Kun ya ni. 3 Axa na a tu lenki nan ti Tunka Duumanten wa warene axa kaane, axa Alla. Aken ya ni yinben ŋa, a gaa daaramandini, aken ya na ku sero buruxana bakka axa kaane, aken ya na i xaayana axa da. Axa wa i xatana, axa wa i buruxana karaman do karama, xo Tunka Duumanten ga daali axa da moxo be. 4 Bire be Tunka Duumanten ga na i xata bakka axa kaane, axa Alla, xa maxa a sinma axa sondomun ŋa nan ti axa tonŋuntaaxun ya n sigi Tunka Duumanten ga da axa riiti kuudo axa na ɲiiɲe ke xeye de. Ken fe ! Ku xabiilanu yangoburugumaaxun ya n sigi Tunka Duumanten gaa i xatana bakka axa kaane. 5 Axa tonŋuntaaxu fe, axa sondomun teleŋontaaxu fe, nan ti ken ya n da axa riiti kuudo axa na i ɲiiɲe ke xeye, ken fe ! Ku xabiilanu yangoburugumaaxun ya n sigi Tunka Duumante axa Alla gaa a kanma na i xata axa danŋa bakka axa kaane yi. Kuudo a ga kuna ti diganxanne ke be yi axa faabanu da, Ibirahiima do Isiyaaxa do Yaaxuba, a na ken diganxanne xa maxafaga. 6 Xa da tu nan ti axa tonŋuntaaxu ma sigi Tunka Duumante gaa ke ɲiiɲa sire kundu kinni axa yi ti axa na a xeye, axa Alla. Axakun ni jama xandunxoten yinme du ya.[Banisirayilaganko xandunxotaaxu]
7 « Xa sinme axa ga da Tunka Duumante butundi gunjuran ŋa axa Alla. Xa maxa mungu. Gelli koota be yinme axa ga bogu Misira ɲiiɲen ŋa nan ri a wara ma axa gaa riini ke noqu kundu yi, axa murutini Tunka Duumante maxa yi ya tan. 8 Horebu giden ŋa*, axa da Tunka Duumanten butundi, a butu ma a nan ɲi axa buruxana. 9 Laayidu be Tunka Duumanten ga da a wutu i do axa naxa gidinwallaha safanton kanma, in ga sege giden kanma bire be nan daga kun wallaho wutu, n dalla non ŋa ; tannaxate wuro do tannaxate kiye, n ma yigande yiga, n ma ji mini. 10 Tunka Duumanten da gidinwallaho ku filli kini in ŋa, i safandu ku nooninton na ti Alla yinme doronmen ya, Tunka Duumanten ga da fo wo fo ko axa da gide ke kanma yi yinben noxon ŋa axa kafundon koota, kun su safanton wa wallaho ku kanma. 11 Ken tannaxate kiyen do tannaxaten wuron ga tinme, Tunka Duumanten da gidinwallahon filli kini in ŋa, laayidu ke wallaho. 12 Tunka Duumanten daali in da nan ti : “ Giri jawoye, an nan yanqa bakka gide ke kanma, baawo jama ke be an ga da i bagandi Misira yi, i da golli buren ɲa ! I jawo yillene bakka kille be in ga da i ɲaamari ti a yi, i da mexen ya xaja na sawuran dabari du da. ” 13 Tunka Duumanten daali in da xadi ti : “ N da ke jama ɲi jama xandunxoten ya. 14 N wara in na i buruxa, n na i toxon buruxa bakka kanmun wure, n na xabiila bagandi anken ŋa, a ga n senbenta ke yi, a ga n gaba a yi xa. ”
15 « N yanqa bakka giden ŋa kuŋa, nan saage. Ken da a ɲi giden wa kumiini yinben maxa, laayidu ke wallaho ku filli wa in kittun filli yi. 16 N da a wari nan ti axa da Tunka Duumante axa Alla kuta ti mexen xajanden ŋa, na gunbunlensawuran dabari axa du da. Tunka Duumanten ga da axa ɲaamari ti kille be yi, axa jawo yillene bakka a yi de ! 17 N da wallaho ku filli raga na i filila bakka in kittun filli yi, na i kara axa yinmenu siginton jon ŋa.
18 « Ken falle in saage in taŋen roono ɲiiɲen ŋa nan sujudi Tunka Duumanten jon me naxa xo ta fanan moxo : tannaxate wuro do tannaxate kiye, n ma yigande yiga, n ma ji mini, ken su na axa junuubun sababun ya yi, ken ga ni axa ga da fo bure ke be ɲa Tunka Duumanten jon me naxa, na a kuta. 19 Baawo in kanu axa da Tunka Duumanten sunoyen do a butten ŋa ya, a n maxa axa buruxa. Tunka Duumanten da in mugu ke kille xa yi xadi.
20 « Tunka Duumanten demu buttu Haaruna xa wure moxo siri, ma a nan ɲi a karini, ken waxati xa yi xadi, n ɲaage Haaruna xa danŋa. 21 Axa ga da yangon ɲa do gunbunlenme ke be darinden ŋa, n da a wutu na a ro yinben ŋa na a buyi, n da a kara-kara, ma a gaa juriini siri, waranlaqe ke be gaa yanqana gilli giden ŋa, n da jura ke sedi a noxon ŋa.
22 « Tabeera do Maasa* do Kiborooto-hataawa xa yi xadi, axa da Tunka Duumanten butundi. 23 Bire be xadi Tunka Duumanten ga da axa xayi gilli Xadesi-barineeya yi, nan ti i gaa ɲiiɲe be kinni axa yi, axa n daga a xeye axa du da, axa da Tunka Duumanten digaamen kuta ken xa yi xadi, axa Alla. Axa ma toŋondi ti a yi, axa ma a terinka. 24 Gelli in na axa tu koota be, axakun na Tunka Duumanten kutana ya tannu.
25 « Tunka Duumanten ga ti i wa axa halakini, n da sujudin xenundi a jon me naxa tannaxate wuro do tannaxate kiye, 26 n ɲaage katta a yi nan ti : “ Kaman Tunka Duumanten wo, maxa an jaman halaki, kun ga ni an xallu be an ga da i maxawasa ti an darontaaxun ŋa, an ga da i bagandi Misira yi ti an senben ŋa. 27 An komon sinma, Ibirahiima do Isiyaaxa do Yaaxuba. Maxa giri do ku sero kundu batten ŋa ti i xandunxotaaxu ke do i bonontaaxu ke yi, ken do i yangoburugumaaxu ke. 28 N da ken ko ya, kuudo an ga da o bagandi jamaane ke be yi, kun xa nan maxa ti : ‘ Tunka Duumanten ga da a ko nan ti i wa ku sero denne jamaane be yi, a maxa katu i kiɲandini non ŋa. ’ Ma i na ti : ‘ A da i xoni ya, na i bagandi telle gunjuran noxon ŋa, i na i kari. ’ 29 An seron ya ni de ; an xallun ya ni an ga da i bagandi ti an senbe daren do an raniyen ŋa. ”