[Sariyanwallahon kurunbaaxunde]
10
« Tunka Duumanten daali in da ken waxati : “ Gidinwallaho filli tana seku du da, xo wallaha fano moxo, an nan ri katta in ŋa giden kanma, an na sollinwaxande xa dabari du da. 2 An ga da wallaha fano ku beenu kara, n na i digaamun me safa kun xa kanma, an na i ro waxande ke noxon ŋa. ”3 « N da waxanden dabari ti saayinsollen ŋa kuŋa, na gidinwallaha fano ku filli me seku, n sege giden ŋa, wallahon filli wa in kitten ŋa. 4 Tunka Duumanten da wallaha fano ku digaamun me safa ku wallaho xa kanma. Kun digaamu ni laayiduxannu ku tanmi be a ga da i koni axa da kafundon koota, na a toxo giden kanma yi, yinben noxon ŋa. A da wallaho ku kini in ŋa. 5 Ken falle in saage yanqana gilli giden ŋa, n ga da waxande ke be dabari, n da wallaho ku ro a noxon ŋa xo Tunka Duumanten ga da in ɲaamari moxo be. I wa non ŋa hari ke lenki. »
[Girindindi lagaren xibaare]
6 Banisirayilaganko girindindi gilli Yaxaanigankon gedun ŋa nan daga Moseera yi. Sadaxakiɲandaana Haaruna faati non ya, nan buli non ŋa. A renme Lajaari ro a batten ŋa. 7 I girindindi gilli non ŋa katta Gudigooda, nan giri Gudigooda nan ri Yotiiba yi, jinwaranlaqun jamaane.
8 Tunka Duumanten da Leewi soxoodin duran sugandi ken waxati ya yi kuŋa, kuudo i na Tunka Duumanten laayidunwaxanden wutu, i na toxo sikki Tunka Duumanten jon me naxa, nan golli a da, nan duwa jaman da ti a toxon ŋa, ken ya ni i gollun ŋa ma lenki ke koota kundu. 9 Ken ya saabu da ni taqixalle do faabankutiye ga nta Leewikaarankon maxa xo i waaxinun kuttun moxo ; Tunka Duumanten ya ni ikun taqen ŋa, an Alla, xo a yinme ga da a koni da moxo be.
10 « Nke Muusa toxo gide ke kanma yi kuŋa, xo ta fanan moxo, tannaxate wuro do tannaxate kiye. Ke ta yi xadi Tunka Duumanten da in terinka, a maxa axa halaki. 11 Ken falle Tunka Duumanten daali in da : “ Giri an nan daga, an nan girindindi warene jaman kaane na i geesu, n ga kuna ti jamaane be yi nan ti in wa a kinni i faabanu yi i da, i n daga a xeye. ”
[Batiyen do allankanne]
12 « Banisirayilaganko, saasa wo, Tunka Duumante axa Alla, a da man muuru axa maxa a ga feti axa nan kanu i ya tannu, na i killun su tera, na i xanu do na i batu ti axa sondomun su do axa yonkinun su yi ? 13 N ga da axa ɲaamari ti Tunka duumanten ɲaamarindixannu be do a farilanu be yi axa jamun danŋa lenki ke koota, axa na i tanga ? 14 Kanfato ku do i kanma su ni Tunka Duumanten ya fo yi mene, axa Alla, ken do ɲiiɲen do fo wo fo gaa a yi. 15 Xa, Tunka Duumante axa Alla da axa saaraano ku baane ya xanu nan mali i ya. Axakun be ga ni i bonsonŋun ŋa, a da axa ya sugandi i falle bakka xabiilanun kuttun su yi xo a gaa du yi moxo be lenki ke koota kundu. 16 Ken kuŋa xa da axa sondomun senondi, xa maxa xandunxotaaxu xadi. 17 Baawo Tunka Duumante axa Alla, a ya ni tunkanun Tunkan ŋa, kamanun Kama, Kaman dare, Senbente, Kanufo xoore, ke be ga nta sere ragana ti waritiyaaxe yi, a nta logonbure ragana. 18 A wa kiitini faabantanŋen do wundunbaaren da ti teleŋontaaxun ŋa, a wa mukken mulla, a wa biraadon do feetufataaden kinni a yi. 19 Ken kuŋa axa n xawa mukken xanna ya, baawo axa ɲi mukkunun ya yi Misira jamaanen ŋa. 20 Xa kanu Tunka Duumanten ya yi, axa Alla ; axa na a ya batta, xa tuugene ti a ya yi, axa kunana ti a baane ya toxon ŋa. 21 A ya ni axa tiigekamanen ŋa, a ya ni axa Alla be ga da ku fi xooro do ku kanufiinu dabari do axa batten ŋa, axa yinme ga da ku be wari ti axa yaaxen ŋa. 22 An seri fanon gaa yanqana Misira yi bire be, i tanɲere sere ya ni ; saasa kuŋa, Tunka Duumanten da axa gabondi xo kanmun saanun moxo, axa Alla.*