[Alla ɲangolli sire, a seron da]
11
« An na Tunka Duumante an Alla xanu, na a farilanun do a sariyanun tanga duna kooton su yi, a do a kiitun do a ɲaamarindixannu. 2 Axa na a tu lenki nan ti in nta do axa renmun ŋa, ikun beenu ga ma Tunka Duumante axa Alla jikkundikitten wari, i ga nta a tu xa. Baawo a darontaaxun do senben do a fanka, 3 ken do a taagumansun do a ɲangollu be a ga da i ɲa Misira tunka Firawuna do i jamaanen su yi Misira noxon ŋa, axa renmu ku ma kun wari. 4 Bire be Misira kuren do i siinun do i wotoronun ga ɲi axa faraxatunu, a ga da Xulunjuumu fanŋen jin wara i kanma yi, axa renmu ku ma ken xa wari. Tunka Duumanten da i buruxa, hari an dan ke lenki. 5 A ga da ke be dabari axa da gunjuran ŋa ma axa gaa riini ke dingira kundu yi, i ma ken xa wari. 6 A ga da ke be ɲa Dataani do Habiraama yi, Heliyaabu renmu, kun ga ni na Rubeenikaaranko ku be ɲiiɲen ga da i raqen wuɲi na i toni, i do i kaadunkon do i tilliisu, kafiini i sukkanlenmo beenu su ga ɲi do i batten ŋa, ken ɲa Isirayila su jon ya yi, axa renmu ku ma taye ken xa yi. 7 Ikun ma ku fo koninto su wari i yaaxen ŋa ; axakun ya n da Tunka Duumanten ku fi xoora ɲaŋunton wari ti axa yaaxen ŋa.[Allanbatten xeeri]
8 « N ga da axa ɲaamari ti ku ɲaamarindixannu beenu su yi lenki, xa da du koroosi i noxon ŋa, ken ŋa axa na xoto ; axa gaa karene katta ɲiiɲe ke be yi, axa na ro non ŋa na a xallaaxu. 9 Ken ŋa axa biton na giilo ɲiiɲen kanma, ke ɲiiɲe be Tunka Duumanten ga kuna ti a yi axa faabanu do i bonsonŋun da, nan ti i wa a kinni i ya, xattin do tamarileeman waranlaqen jamaane. 10 Baawo an gaa dagana ɲiiɲe ke be yi ken noqu kuudo na a xallaaxu, a nta xo Misira ɲiiɲen moxo, ken ga ni an ga giri noqu ke be yi. Misira yi non ŋa, an ɲi an soxanfon soxono ya, an ɲi a xumaarini do an tan ya yi xo naaxon gaa xumaariini moxo be. 11 Xa ganta ke ɲiiɲe be axa gaa karene katta a yi na a xallaaxu, ken ni gidinɲiiɲen ya, a do baayanme, kanmen ya na a xumaarini. 12 Tunka Duumante, an Alla yinme ya na ken ɲiiɲe koroosini waxatin su yi, gelli siinen joŋaarun ŋa ma siinen lagaru. 13 Ken kuŋa in gaa ɲaamarindixannu ku be kinni axa yi lenki, axa ga na i terinka na i mugu, na Tunka Duumante axa Alla xanu, na a batu ti axa sondomun su yi, a do axa yonkinun su, 14 a daali i wa kanmen riitini axa ɲiiɲen kanma i waxatin ŋa, kandaaran do kawulen su. Axa na axa sanjanfon xoorono ya, a do axa reesendolo kurunban do axa yigete kurunba. 15 N na sokken kini axa naaburun ŋa axa gunnen noxo, axa wa yigene nan baabuwase.
16 « Xa da du koroosi, axa sondomun nan maxa miile, axa gaa jaarabini nan saage alla tananu batta, nan sujudi i da ! 17 Ken ŋa Tunka Duumanten butten yanganxatan na axa ragana ya, a na kanmun raqen texe, kanmen ntaxa riini, ɲiiɲen ntaxa i funtifon kinni, axa na buruxe jawoye yaaxe maxa bakka ɲiiɲa sire ke yi, ke ɲiiɲe be Tunka Duumanten gaa a kinni axa yi. 18 Xa da in ku digaamu wara axa sondomun do axa yonkinun ŋa, axa na i ɲa taagumanse yi, na i yetu axa kittun do axa taŋon ŋa. 19 Axa na i xaranŋundi axa renmun ŋa ; axa taaxunton na i koni i da kaanun noxon ŋa, axa terenton na i koni i da do killun ŋa, a do axa saxunton do axa girinto. 20 Axa na i safa do axa gallaqingondomon ŋa, a do axa debun roraqu, 21 ken ŋa ɲiiɲe ke be Tunka Duumanten ga kuna ti a yi axa faabanu da nan ti i wa a kinni i ya, na kanmun toxo ɲiiɲen kanma, axa wuyinun do axa renmun wuyinun xa giilono ɲiiɲe ke kanma yi ya. 22 Baawo ɲaamarindixannu ku be in gaa axa ɲaamarini ti i ya, axa ga na i su tanga na i dabari, na Tunka Duumanten xanu ti i dagakillen su yi, axa Alla, nan mali a yi, 23 ku xabiilanu kundu be ga n gaba axa yi, i ga n fuŋu axa yi senbe, Tunka Duumanten wa i xatana gilli axa kaane, axa na i xeye. 24 Axa tanbekkon ga sigi noqu su yi, non wa ɲaana axa xalle yi. Na a wutu gelli gunjuran ŋa banboxu, katta Libaano yi saahelin ŋa, na a wutu Furaatafanŋe xa yi kinbakkan ŋa ma Mediteraanigeeji yi kinxennan ŋa, ken su ɲaana axa kutiyen ya yi. 25 Sere su ra nta sikki axa kaane. Tunka Duumante axa Alla wa axa kannun do axa xaaxantaaxun roono jamaane ke su yi, ke jamaane be axa gaa a baaxumana, xoyi a ga koni axa da moxo be.
26 « Ayiwa in faayi gaa duwanŋen do langanden ya walla axa jon me naxa lenki : 27 Tunka Duumante axa Alla ɲaamarindixannu be in gaa i kinni axa yi lenki, selli axa ga na i mugu, ken ɲaana axa da duwanŋen ŋa. 28 Xa, selli in gaa axa ɲaamarini ti ɲaamarindixannu ku be yi lenki, axa ga ma i mugu, axa nda saage bakka i ya, na alla tananu batu, axa ga nta ku beenu tu, ken ɲaana axa da langanden ya yi.
29 « Axa gaa telle ɲiiɲe ke be xallaaxu, Tunka Duumante axa Alla ga axa rondi bire be, axa na duwa Gerijiimu giden ŋa, na langandi Heebali giden ŋa. 30 Kun gidu nta Yaradefanŋe waxen ya yi geni, kinxenna killen banŋe, Kanaanaganko be gaa taaxunu Haraaba yi, i jamaane, Giligaali teŋon ŋa, Moore allanyitten kaaran ŋa ? 31 Baawo axa faayi Yaradefanŋe ya karana, Tunka Duumante axa Alla gaa ɲiiɲe be kinni axa yi nan daga a xeye. Axa na a xallaaxu nan taaxu a yi. 32 N gaa ku farilanu do ku kiitu be walla axa wure yi lenki, xa da du koroosi na i tanga.