[Bireyen sariyanu Kanaana yi 12.1 - 23.14]
[Tunka Duumanten batinoqu sugandinte]
12
« Tunka Duumante axa faabanu Alla, a gaa ɲiiɲe be kinni axa yi, na axa toxo bireene ken ɲiiɲe kanma, farilanun do kiitu beenu axa ga n xawa i tangana na i golli, i faayi ku : 2 Axa gaa xabiilanu ku be ɲiiɲen xallaaxunu, i gaa i munonun batta dingira su yi, gidi giilun kanma, a do tintiŋo, ken do yitti nirinte su wure, axa na ken su gurujana ya. 3 Xa na i sadaxindinoqunun guruja, na i gidi siginton kara, na yinben ɲa na i Haseera gondomon buyi, na i mununsawuron kutu, na i toxonun buruxa bakka ken dingira yi. 4 Xa maxa i batimoxon me dabari Tunka Duumante axa Alla da.5 « Ganta Tunka Duumante axa Alla, a yinme ga na noqu be sugandi axa fonlaqu ku du baananbe su yi kuudo i toxon nan ro non ŋa, a gaa hadarini non ŋa, xa telle a batu non ya yi. 6 Axa na axa sadaxa xuruminton do axa sadaxon kuttun su wuttu telle non ya, a do axa jakko, axa kittidunkuyu, axa tekkun do axa yonkiliŋunsadaxo, ken do axa naanun do axa tanmison ren fano. 7 Axa do axa kaadunkon yigene non ya yi Tunka Duumante axa Alla jon me naxa, axa na sewo ti axa kittiragollun ŋa Tunka Duumante axa Alla ga da ku beenu barekindi axa da.
8 « Be su gaa i liŋun batta moxo be yi yere lenki, xa maxa Tunka Duumanten batu ken moxo yi. 9 Baawo harisa axa ma kiɲe tuumanoqun do taqe be Tunka Duumante axa Alla gaa a kinni axa yi. 10 Axa wa Yaradefanŋe karana, nan daga taaxu jamaane be Tunka Duumante axa Alla gaa kinni axa yi faabanxeye. A na axa tuumandi axa xonnon danmon su maxa do axa kaaron ŋa. Axa na taaxu jamaane ke yi haqilitaaxe noxon ŋa. 11 Ken kuŋa Tunka Duumante axa Alla ga na dingira be sugandi kuudo i toxon nan hadari non ŋa, n ga da axa ɲaamari ti sadaxa su yi, axa do i telle non ya yi : axa sadaxa xuruminto, a do axa sadaxon kuttun su, axa jakko, axa kittidunkuyu, ken do sadaxantekki sugandinto be axa ga tegu ti ya Tunka Duumanten da, kuudo na axa teguxannun maxafaga ti i ya. 12 Xa na sewo non ŋa Tunka Duumanten jon me naxa, axa Alla, axa do axa ren yugun do axa ren yaxarun do axa komon do axa tunbaaru, ken do Leewikaaranko ku be gaa kafiini axa yi axa debun ŋa. Baawo taxandixalle nta ikun maxa, taqe nta i maxa kafiini axa yi. 13 Axa da du koroosi. Xa Maxa ɲa axa ga da noqu su wari axa gaa sadaxa xuruminten sadaxini non ŋa. 14 Tunka Duumanten ga na dingira be sugandi axa fonlaqu ku du baananbe noqun ŋa, axa na axa sadaxa xuruminton sadaxini non baane ya yi. N gaa axa ɲaamarini ti fo wo fo yi, axa na a ɲaana non ya.
15 « Ganta tannu, Tunka duumante axa Alla ga da axa barekindi ti naabure su yi, axa ra wa a karini na tiyen yiga axa debu ku noxon ŋa. Seri sennen do seri sobinten su ra wa ken yigana, xo axa gaa siine do xeeran yigana moxo be. Tunka Duumante axa Alla xeeri kininten ya ni ken ŋa axa da. 16 Xa fo be ga ni xo fore, axa maxa ken yiga. Axa na a joqo ɲiiɲen ya yi xo jin moxo. 17 Axa ra nta axa soxanfoonun jakkon yigana axa debun noxon ŋa, a do reesenjin jakka, do te, ken do axa naanun ren fanon do axa tanmison ren fano, a do axa tekku be axa ga tegu ti i ya, a do axa yonkiliŋunsadaxon do axa kittidunkuyu. 18 Axa na kun yigana Tunka Duumanten jon me naxan baane ya, axa Alla. Non ni a yinme ga na dingira be sugandi ya. Axakun do axa ren yugun do axaren yaxaru, a do axa komon do axa tunbaaru, ken do Leewikaaranko ku be gaa axa debun ŋa, axa na sewo ti axa kittiragollun xeerin su yi Tunka Duumanten jon me naxa, axa Alla. 19 Xa da du koroosi, na axa toxo axa ɲiiɲen kanma axa bireye ke wucen noxo, axa nan maxa axa haaju bogu Leewikaaranko ku maxa.
20 « Bire be Tunka Duumante axa Alla ga na axa kutiye ke yuruwandi xo a ga da a ko moxo be, axa xa ga ti axa lafi tiyen ya yigana baawo a tun wa axa yi, axa ra wa yigana moxo be ga n liŋa axa yinme da. 21 Tunka Duumante axa Alla yinme ga da dingira be sugandi nan ti i toxon nan hadari non ŋa, selli axa do non ga n laatu, axa tanmise walla xa axa na be Tunka Duumanten ga da a kini axa yi, axa na a xurusi xo moxo be in ga da axa ɲaamari. Axa ra wa a yigana ti axa sagon ŋa axa debun noxo. 22 Axa na a yigana tiye kundun ya yi tannu xo axa gaa siinen do xeeran yigana moxo ke be. Seri sennen do seri sobinten su wa a yigana. 23 Xa duruxoto axa nan maxa a foren yiga, baawo yonkin ya ni. Xa maxa yonkin yiga do tiyen batten ŋa. 24 Xa maxa a yiga. Axa na a joqo ɲiiɲen ya yi xo ji. 25 Xa maxa a yiga de ! Ken moxo ya ni axa gaa wulluliŋontaaxu, axa renmun xa na wulluliŋontaaxu axa falle, ken ni ya, axa ga da fo teleŋonten dabari Tunka Duumanten jon me naxa. 26 Xa ganta sadaxa sennu be gaa axa maxa, a do axa tekkinsadaxo, axa na i wuttu telle dingira ke be Tunka Duumanten ga na a sugandi ya. 27 Axa na axa sadaxa xuruminton dabari Tunka Duumante axa Alla sadaxindinoqun ŋa, kun ga ni tiyen do foren ŋa ; axa na axa allatiigeyinsadaxon foron joxi Tunka Duumanten sadaxindinoqun kanma, axa Alla. Axa na i tiyen yiga. 28 Xa da axa moxo tu, axa na ku digaamu danmon su mugu, n gaa axa ɲaamarini ti ku beenu yi, kuudo i na ɲa axa da xeeri ya, nan ɲa axa renmun da xeeri ya axa falle ma abada, ken ni axa ga da fo siren do fo teleŋonten dabari na a gemundi Tunka Duumante axa Alla liŋun ŋa ya de !
[Munubatten gongondu]
29 « Axa gaa taŋene xabiilanu ku be yi, bire be Tunka Duumante axa Alla ga na i buruxa gilli axa kaane kuudo axa na i kittu kaawandi, axa ga na i kittu kaawandi axa ga taaxu i ɲiiɲen ŋa, 30 xa da du koroosi, axa n maxa yaaxe do i ya, i gaa ɲaana axa da selleqen ŋa i buruxe falle bakka axa kaane. Axa nan maxa daga i munonun fi tirindi nan ti : “ Ku xabiilanu na i munonun batta kan moxo yi de, n xa na a ɲa kundun ŋa ? ” 31 Xa maxa Tunka Duumante batu ken moxo yi, axa Alla, baawo ken kille haraamunten ya ni Tunka Duumanten noqu, ayiwa a ga da fo wo fo xoni, ikun na ken su ya dabarini i munonu ku da. I da hari yinben kumu na i ren yugun do i ren yaxarun buyi i munonu ku da !