[Jaarabinde katta munubatiye]
13
« In ga da axa ɲaamari ti ku digaamu danmon be su yi, xa da i tanga ya de, kuudo axa na i golli. Xa maxa i jiidi, xa maxa i naqasi.2 « Selli du annabinyinme nda bange axa noxon ŋa, ma kuyaana, nan ti ike kuyi kuyi yogo yi, a xosi taagumanse yogo kini an ŋa, ma kaawafi, 3 ken taagumanse ga na xosi ri, ma ken kaawafi be a ga da a ko an da, nan ti axa n sukke do alla tananu batten ŋa na i batu, ku beenu an ga nta i tu, 4 maxa ken du annabinyinme ma ken kuyaana ken kuyi terinka, baawo Tunka Duumante axa Alla na axa jaarabini ya na axa faayi, kuudo i na a tu selli tonŋun tonŋu axa gaa Tunuka Duumante axa Alla mulla ti axa sondomun su do axa yonkinun su yi. 5 Xa sukkene do Tunka Duumante axa Alla baane ya yi, xa kanu a ya yi, xa da a ya ɲaamarindixannun tanga, xa na a ya digaamun terinka, xa na a ya batu, xa tuuge ti a ya yi. 6 Ken du-annabinyinme, ma ken kuyaana, a n xawa kalla ya, baawo Tunka Duumante axa Alla ke be ga da axa bagandi Misira ɲiiɲen ŋa, na axa maxawasa bakka komaaxun ŋa, ken Tunka Duumante ga da axa ɲaamari ti kille be yi, ke sere da a muuru i na axa murutindi katta ken Tunka duumante ya yi, na axa sankundi bakka ken kille yi. Xa da fo buren buruxa bakka axa noxon ŋa.
7 « A ra wa ɲaana an maarenme ma an ren yugo walla xa an ren yaxare ma an yaqe be an gaa a mulla, walla xa an xana liŋe, a gaa xo an yinme moxo, ken ga na ri katta an ŋa gundon ŋa, nan ti i wa an yillandini, nan ti axa n daga alla tananu batu, ku beenu anken nta i tu, an faabanu xa nta i tu, 8 jama ke be gaa do axa kaaron ŋa, selli kun allanu yogo ya ga ni, an do i tinkun ya ga ni ma an do i laatun ya ga ni ba, gelli ɲiiɲen ke yinme ma ɲiiɲen ken yinbaane, 9 maxa duŋe a da. Maxa a terinka. Maxa hinne a yi xa. Maxa a faasa. Maxa a suturi. 10 An nan xawa karini ya tannu, anken fina kitten ya n kiɲeene a yi xa, kuudo na a kari, seron danmon kuttun kittun na lagari kafiini an ŋa. 11 Axa na a gididunwalla ya, na a kari, baawo a da a muuru i na axa laatondi bakka Tunka Duumante axa Alla ya yi, ken be ga da axa bagandi Misira ɲiiɲen ŋa, bakka komaaxun ŋa. 12 Isirayila su na a mugu, i na kanu, i ntaxa ke me fo bure kundu ɲaana axa noxon ŋa keeta.
13 « Tunka Duumante axa Alla gaa debu ku beenu kinni axa yi kuudo axa nan taaxu i ya, axa ga na a mugu i du baananbe yi, a gaa koniini nan ti 14 serixafunu yogo bogu axa noxon ŋa, na i debu ku taaxanlenmon jaarabi ti : “ O n daga alla tananu batu, allanu be axa ga nta i tu, ” 15 a segesege, an nan tirindindi siri na a tonŋun yaaxen muuru. Selli a ga na saha nan ti tonŋun tonŋu ken golli haraamunte ɲaŋi axa noxon ŋa, 16 an na kaafan ya wuttu ken debe taaxaanon xanne maxa, na i kari. An na i buruxa ti kaafan neenen ŋa bogo-bogo, ken do fo wo fo gaa debe ke noxon ŋa, kafiini naaburusiginten ŋa. 17 An na a naaburujuran su kafu me yi bera xooren ŋa, an na yinben wutu na debe ke do i yokken su buyi. Ken yokke su buyini ya nan ɲa xamen ŋa Tunka Duumante an Alla ya da, non na ɲa abadankaajon ŋa, a ntaxa tageene. 18 Xa maxa axa kitten ro fo haraamunten ŋa. Ken moxo yi, Tunka Duumanten butten yanganxatan na saage, a na neeman kini axa yi, na axa jiidi, xoyi a ga kuna axa faabanu da moxo be. 19 Ken ni ya selli axa ga na Tunka Duumante axa Alla diganxannen terinka, na a ɲaamarindixannun su tanga, ku be in gaa axa ɲaamarini ti i ya lenki, na tonŋun golli Tunka Duumante axa Alla jon me naxa.