[Baaden fi kabanto]
(Sariya 19.28 ; 21.5)
14
« Axakun ni Tunka Duumante axa Alla renmun ya. Xa maxa axa faton cecexu, ma na axa taŋedunyintun siyi do furen sunon ŋa. 2 Baawo axakun ni seri sugandinton ya yi Tunka Duumante axa Alla da. A da axa sugandi ya kuudo axa na ɲaŋi i da duranxalle yi bakka xabiilanun su noxon ŋa ɲiiɲe ke yaaxen kanma.[Daaba sennun do daaba haraamunto]
3 « Maxa fo kabante su yiga. 4 Daabanu be an ra gaa i yigana, i faayi ku : na, jaxe, a do sugo, 5 xeera, siine, a do xiyen do gundunsugo, ŋese, jabaane, a do gididunjaxe. 6 Daaba xa su korobinsen karanten ga ni nan taxandi fillo, a gaa yillandindini xa, axa ra wa ken yigana. 7 Xa ganta, ku beenu gaa yillandindini axa ga nta i yigana, ken do ku beenu korobinsen karanten ga ni axa ga nta i yigana, kun xa faayi : ɲogome, a do kanjaane, ken do gididunɲiiɲe i gaa a xilli ferede, baawo i yillandindini ya, xa i korobincen karante fe, kun sobinton ya ni axa da. 8 Fo be ga ni faringijen xa yi, a sobinten ya ni axa da, baawo a korobinsen karanten ya ni fillo yi, xa a nta yillandindini. Axa nta ku du baananbe su tiyen yigana, axa nta katiini a furen xa yi.
9 « Jiidufoonu beenu axa ra gaa i yigana, kun ya faayi : fo wo fo gaa jin ŋa xinikanpen gaa a yi, koromen xa gaa a yi, jiidufon ya ga ni, axa ra wa kun yigana. 10 Xa, fo wo fo su xinikanpen do koromen ga nta a yi, axa nta ken yigana, a sobinten ya ni axa da.
11 « Yelin sennen su, axa wa a yigana. 12 Axa ga nta fo beenu yigana, i faayi : janbanxiila, janbaxuruyigaana, a do janbanbinne, 13 yellimisigope, gopinmanjaare, gopinxullen do i noonen su, 14 ken do xaaxen noonen su, 15 ciwoone, a do guruguttunloxaane, a do jiidunyeliŋe be i gaa a xilli xodoore, gopen do i noonen su, 16 ciliili, guruguttunbinne, ciloone, 17 ciwonloxaane, luuxo, a do kolice 18 ken do jinmen do saaxon do i noonu, a do kokkiinen do karafuune. 19 Fuuɲu kanpinten su sobinten ya ni axa da, axa ra nta i yigana. 20 Xa, fo wo fa gaa kanpini, a sennen xa ga ni, axa ra wa a yigana. 21 Xa maxa jiiba su yiga ; mukke be gaa axa debun ŋa, axa na a kinni ken ya yi, ken ra wa a yigana, ma ken ga fe xa, axa na a gaaga mukke yi. Baawo axakun ni xabiila sugandinten ya yi Tunka Duumante axa Alla da. Xa maxa sugunlenmen soro ti i ma xattin¤ ŋa.
[Jakko]
22 « An gaa soxanfo su kitta bakka an ten ŋa siine wo siine, an na a taxandi tanmunden ɲa jakkan ŋa. 23 An na a yiga Tunka Duumante an Alla jon me naxa. An yillen taxandi tanmunden do an reesendolo, a do an te, ken do an naanun do an tanmison ren fano, an na i yiga dingira ke be a gaa a sugandini kuudo i toxon nan hadari non ŋa. Ken ŋa an na a tu nan ti an bireyen ke wucen su yi, an nan xawa kanna Tunka Duumante an Alla yi ya. 24 Xa selli Tunka Duumante axa Alla ga da noqu be sugandi kuudo i toxon nan hadari non ŋa, an do non naxan killen ga n giila, an ra ga nta jakka ke wuttu dagana non ŋa laatoyen saabu da, ah, ken bire Tunka Duumanten ga na an warijaxa sanjaanen ŋa, 25 an na sanjanfo ke gaaga xaalisin ŋa, na xaalisi ke mara an kitten ŋa, Tunka Duumante an Alla ga da dingira ke be sugandi, an do xaalisi ke na daga non ŋa. 26 An na xaalisi ke ro fo wo fo su ga n liŋi an yonkin da, xo na, ma tanmise, a do reesendolo, ma xonsi tana, ken do fo wo fo su an yonkin ga da an tirindi a yi. An do an kan na a yiga Tunka Duumante an Alla jon me naxa, axa na sewo.
27 « Leewikaaranko be gaa taaxunu axa debun ŋa kuŋa, xa ma axa haaju bogu i maxa, baawo durantaqe do faabankutiye su nta ikun maxa jamaane ke yi. 28 Siino sikki su, an na siini sikkandin jakkan wutu bakka an soxanfon ŋa, an na i toxo an deben ŋa. 29 Leewikaarankon na ri yige, baawo durantaqe do faabankutiye nta ikun maxa xoyi axa moxo. Mukkunun do alihatiimun do wundunbaaru be gaa axa debun ŋa, i xa na yige nan fogu, kuudo an ga da kittiragolle su dabari, Tunka Duumante an Alla na bareke ro a yi.