[Tanbunun saayisiine]
15
« Siino ɲeri su lagaren ŋa, axa wa tanbunun saayindini. 2 Ken ɲanmoxon faayi : tanbugume su n xawa yanpana i kapanlenman maxa ya a ga da tanbo be ro a yi. Maxa an kapanlenman neqi do tanbon ŋa, nan ti baawo tanbunun saayiwaxatin ya n gangi Tunka Duumanten da. 3 An ra wa mukken ken tanbunu, xa tanbo be gaa an maxa an maarenmen xannen ŋa, an yanpana ken ŋa ya. 4 Ken moxo yi, misikiine ntaxa ɲiini kafiini axa yi fewu, baawo ɲiiɲe ke be Tunka Duumante axa Alla gaa a kinni axa yi taqe kuudo axa na a mara, a wa axa barekindini ken ɲiiɲe kanma. 5 Ken ni ya de, selli axa ga na Tunka Duumante axa Alla diganxannen terinka, n gaa axa ɲaamarini ti ku ɲaamarindixannu beenu yi lenki, axa ga na i tanga. 6 Tunka Duumante axa Alla wa axa barekindini xo a ga da a laayidun wutu moxo be. Axa wa xabiila gabe baabunu, xa ikun nta fo baabunu axakun ŋa ; axa wa axa kandan roono xabiila gabe kanma, xa ikun nta kanda roono axakun kanma.7 « Tunka Duumante axa Alla gaa ɲiiɲe be kinni axa yi, selli maaren misikiine gaa kafiini axa yi kun debu du baananbe yi, maxa an sondomen kaawandi an gaa an kitten ragana bakka an maaren misikiinen ŋa. 8 An kitten wara katta a yi ya, an na a sumundi ti fisirontaaxun ŋa a lafinten gaa haqe be yi, ken gaa a haaju siroono. 9 Tigiti an du yi, fo bure n maxa daga ɲi an sondomen ŋa nan ti : “ Siini ɲerunden faayi ga tinko, tanbunun saayisiine,¤ ” an na xosi an diinan finandi katta an maaren misikiine ke yi, an ntaxa a kuunu. A ga na an fin koyi Tunka Duumanten ŋa, ken ɲaana an da junuubun ya yi de. 10 A kini a yi, maxa an sondomen bonondi ti a kuyen ŋa, na a toxo ti Tunka Duumante an Alla na an kittiragollen su barekindini ti kun ya yi. 11 Baawo misikiinen nta ɲemeene bakka ɲiiɲe ke kanma. Ken kanma ya ni in gaa an ɲaamarini nan ti an na an kitten wara ti fisirontaaxun ŋa an maaren korinten da, a do misikiinu be gaa an ɲiiɲen ŋa.
12 « An Habaraaninkanmaaren yugo nda ri i du gaaga an ŋa, ma maaren yaxare, a golli an danŋa siino tunmi, siini ɲerundin ŋa, a wa hooreene an maxa, an na a wara. 13 An ga na ɲi a walla bire be xa yi, maxa a duuron wara gilli an ŋa dagana. 14 An wa a silifandana ti tanmiso yi bakka an tanmison ŋa, a do an fofunsen do an reesendolo xaayante, ku beenu Tunka Duumante an Alla ga da an neema ti i ya, an na ken kini a yi. 15 Sinme nan ti an ɲi komaaxun ya yi Misira ɲiiɲen ŋa, Tunka Duumante an Alla da an maxawasa. Ken ya saabu da ni in gaa an ɲaamarini ti ku fiinu kundu yi lenki. 16 Selli a ga na ti an danŋa i nta bakka an maxa kuŋa, baawo a wa an mulla, a wa an kan mulla, an kapanlenmaaxun nan liŋi a da, 17 an na bunnen wutu na a taron boto do baafen ŋa, a na ɲaŋi an da abadankome yi. An na ken moxo ya ɲaana ti an tunbaaren xa yi.* 18 Kome be gaa mulla i n bogu an maxa, ken xannen waranden nan maxa xoto an maxa xa, baawo a da musungolliɲaŋaanan gollen dunfillon ya golli an da ku siino tunmi noxon ŋa. Ken ŋa, Tunka Duumante an Alla na bareke ro an kittiragollen su yi.
[Sadaxandaabanun xibaare]
19 « An naanun gaa gunbunlenfana su saarana, a do digu be gaa an tanmison ŋa, an na i sugandi Tunka Duumante an Alla da. Maxa golle ɲa ti an naanun ren fanon ŋa, an nta an tanmisandiginlen fanon yintun xece. 20 Siine wo siine an do an kaadunkon na kun yigana Tunka Duumante an Alla jon me naxan ya yi dingira ke be a gaa a sugandini. 21 Leebun gaa ke be yi, jogooniye ma finku, walla xa leebu bure tana, maxa ken xurusi Tunka Duumante an Alla da sadaxa yi. 22 An na ken yigana an deben ya yi. Seri sennen do seri sobinten su wa ken yigana xoyi an gaa xeeran do siinen yigana moxo be. 23 Xa ganta an nta a foren yigana, an na ken walla joqo ɲiiɲen ya yi xo ji.