[Pesaxansalle]
16
« An na Habiibunxason¤ tanga, na Pesaxansallen salli Tunka Duumante an Alla da, baawo Tunka Duumante axa Alla, a da axa bagandi Misira yi Habiibunxason ya yi, wuron noxon ŋa. 2 Tunka Duumante axa Alla gaa dingira ke be sugandini kuudo i toxon nan hadari non ŋa, axa na pesaxansadaxanna ma pesanxansadaxantanmisen xurusi ken dingira yi. 3 Bito ɲeri noxo, axa nta lewiiri yigana kafiini a yi. Axa na buuru lewiirintanŋen ya yigana do a yi, baawo axa keɲenton hawujanton ya n bogu Misira yi. Na axa toxo ke tanpiyinbuuru yigana, axa wa toqo sinmane do axa ke bogukoota yi axa bireyen wucen danman su yi. 4 Bito ɲeri noxo lewiiri n maxa wari axa ɲiiɲe ke noqu su yi. Axa gaa ke sadaxa be xurusini koota fanan lellen ŋa, a sadaxantiyen nta taaxiini ma bita fillan suxuba. 5 Axa debu ku be Tunka Duumante axa Alla gaa i kinni axa yi, a nta telle axa da axa gaa pesaxansadaxan xurusini i du baananbe noxon ŋa. 6 Tunka Duumante an Alla gaa noqu ke be sugandini kuudo i toxon nan ɲa non ŋa, Pesaxan sadaxan xurusini non ya yi lellen biren ŋa kiyen xenuwaxati, an Misiranboguwaxati ke me yinme. 7 An na a soro na a yiga Tunka Duumante an Alla gaa noqu ke be sugandini. Suxuban ŋa an na saage dagana an tilliisen ŋa. 8 Bito ku tunmi, an na buuru lewiirintanŋen ya yigana. Bita ɲerundi ke, kafundon kootan ya ni Tunka Duumante an Alla da. Xa maxa golle dabari ken koota yi.[Fateyifanon salle]
9 « An na koyu ɲeri jaate du da, gelli labon ga na ro yillen ŋa tannu, an na i jaatanden jopa. 10 Ken waxati, an na ken koyinsalle dabari Tunka Duumante an Alla da. Yonkiliŋunsadaxan ya ni, fo be gaa an kitten ŋa na a saxu Tunka Duumante an Alla ga neemandi an maxa moxo be, an na ken kini. 11 Tunka Duumante an Alla ga da dingira ke be sugandi kuudo i toxon nan ɲa non ŋa, an na sewo a jon me naxa non ŋa, anken yinme, an ren yugu, an ren yaxaru, an komo, a do an tunbaaru, kafiini Leewikaaranko beenu gaa kafiini an ŋa an debun noxo, a do mukken do faabakariidonu do wundunbaaru beenu gaa axa noxon ŋa. 12 An na sinme nan ti an ɲi komaaxun ya yi Misira, an na ku farilanu kundu tanga, na i golli.
[Biirun salle]
13 « Sanjangollun do reesebollinden dangi falle, axa na ken kini, na biirun sallen salli bito ɲeri. 14 Axa wa sewoono ti axa salle ke yi, axa do axa ren yugun do axa ren yaxaru, a do axa komon do axa tunbaaru, kafiini Leewikaarankon ŋa, a do mukken do faabakariido, ken do wundunbaaru be gaa axa debun ŋa. 15 Axa na bito ɲeri salli Tunka Duumante axa Alla da dingira be a gaa a sugandini, baawo a wa an barekindini ti axa sanjanfon danman su yi, a do axa kitten ga da golle su dabari, axa sewoono ya tannu. 16 Taanu sikki siine su, axa yugon su na hadari Tunka Duumante axa Alla jon me naxan ŋa dingira ke be a gaa a sugandini ti buuru lewiirintanŋen sallen ŋa, a do koyun sallen do biirun salle.¤ Axa kitti duuru n maxa hadari Tunka Duumanten jon me naxa. 17 Sere su, fo be gaa an kitten ŋa na a saxu Tunka Duumante an Alla ga neemandi an maxa moxo be, an na ken kini.
[Kiiti teleŋonte]
18 « Tunka Duumante axa Alla gaa riini debu beenu kini an ŋa, axa debe su gaa du, axa na kiitaanon do yinmankon ro xabiila su yinmen ŋa, i na jaman kiiti ti teleŋontaaxun ŋa. 19 Maxa kiiten ɲengendi, maxa yaaxe faayi, maxa muso raga, baawo muson na tuwaanan yaaxen ya finkindini, a na xosi tonŋunten digaamun faraaxu. 20 Teleŋontaaxun batu, an nan teleŋo, ken ŋa axa na bire, jamaane be Tunka Duumante axa Alla gaa kinni axa yi, axa na a xallaaxu.
[Fillakape]