17
« Leebun gaa na walla xa jaxe be yi, xa maxa ken sadaxi Tunka Duumante axa Alla da, ken ga ɲa leebu su danbe, baawo ken haraamunten ya ni Tunka Duumante noqu, axa Alla.2 « Tunka Duumante axa Alla gaa ku debu beenu kinni axa yi, a ga kite kun debu du baananbe yi nan ti yugo ma yaxare da fo bure ɲa ke be ga nta genme Tunka Duumanten ŋa, axa Alla, na a laayidun guruja, 3 ken ga ni nan daga alla tananu batu, nan sujudi i da, walla xa na kiyen batu, ma xaso, ma walla xa kanmun tagefon danbe su, ke be in ga ma ɲaamarindi ti a yi, 4 ken xibaare ga na kiɲe an ŋa bire be, an ga da a mugu, an nan xawa segesegendini ya moxosiri. Ken ga na sabati a ga saha nan ti ken fi xoninte ɲa Isirayila noxon ŋa, 5 ken yugo walla xa ken yaxare be ga da ke fi bure ɲa, an na a bagandi katta an deben roraqen ŋa, an na a gididunwara, na a kari. 6 O na kallaana ke karini ti seedaano filli seedeyen ya yi, walla xa seedaano sikki. O nta a karini ti seedaana baane seedeyen ŋa. 7 Ayiwa seedaano ku fina kittun ya n joŋana a yi, ken falle jaman kutten su na lagari. Axa na fo buren buruxa bakka axa noxon ŋa.
[Kiiti lasamanto]
8 « Selli kalle kiite xibaare ga na an lasama an deben sariyanbulunŋen noxon ŋa, ma mesooxiye, walla xa joogiye xibaare, axa na giri nan sege katta dingira be Tunka Duumanten gaa a sugandini, axa Alla. 9 An na daga sadaxakiɲandaanon sagata, Leewikaaranko, a do kiitaana be gaa non ŋa ken koota yi, i na jagandi, na kiiten karemoxon ko an da. 10 Ken bire i ga da kiiten koni an da Tunka Duumante an Alla ken dingira sugandinte yi moxo be, an na a karana ken moxo ya yi. 11 I ga na an xaranŋundi sariyan diganxanne be yi, ken do kiite be i ga na a koni an da, an na ken dabari. I ga da an xibaari ti ke fi be yi, maxa ɲenge bakka yi de ; maxa teyigankaaxu, maxa noogigankaaxu. 12 Sadaxakiɲandaana be siginten gaa Tunka Duumante axa Alla da non ŋa, walla xa kiitaana, i be ga na dundaraaxu kun maxa an ga bara i terinkana, ken kaman kalla ya ; axa na fo buren buruxa bakka Banisirayilagankon noxon ŋa. 13 Jaman su na ken mugu, i na kanu, i ntaxa dundaraaxunu xadi.
[Tunkanyugaaxun xibaare]
14 « Tunka Duumante an Alla gaa ɲiiɲe be kinni an ŋa, an ga na a xallaaxu nan taaxu a yi, selli an ga na ti : “ N wa tunkanyugo sugandini in du da xo xabiila kuttu ku be su gaa do in fonkaaron ŋa, ” 15 Tunka Duumante an Alla gaa tunka ke be sugandini, an na ken ya xerexerene bakka an maarenmun noxon ŋa, na a taaxundi an yinmen ŋa. An ra nta mukke ɲaana du da tunkanyugo yi, ke be ga feti an maarenme. 16 Tunkanyugon kuŋa, a nta si gabe marana i du da, a nta jaman yillandini katta Misira jamaanen ŋa kuudo na sin gaben kita, baawo Tunka Duumanten daali axa da ya : “ Xa maxa saage yilleene ti ku killu yi xadi. ” 17 A ma xawa yaxarun gabondini du maxa, a sondomen gaa miilene bakka Alla yi, a nta kanŋen do xaalisixullen gabondini du maxa buru. 18 Bire be a ga na taaxu i tunkangujan kanma, a n xawa ke sariya kundu safana du danŋa ya bakka Leewikaarankon maxa, sadaxakiɲandaano ku. 19 A na ɲaŋi a maxa a gaa a xaranŋa koota su yi a birantaaxu ke wucen danman su, ken ŋa a na saage kanna Tunka Duumanten ŋa, a Alla, kuudo na a sariya ke ku digaamu su tanga, a do ku farilanu, nan golli ti i ya. 20 Ken maanan ni ya a sondomen na waase du fuŋoono i maarenmun ŋa, do nan maxa sele bakka ɲaamarindixannun xa yi ti tayen banŋen do noogen banŋen su yi. Ken ŋa a do i renmun tunkaaxun biton na giilo Isirayilanko jon me naxa.