[Leewikaaranko taqu]
18
« Xallitaqe nta ɲaana Leewikaaranka sadaxakiɲandaano ku xabiilan danman su danŋa do Isirayilanko yi, faabankutiyen xa nta kiniini i ya ; Tunka Duumanten yinbidunsadaxon ya ni ikun taqen ŋa i gaa a yigana. 2 Kutiye nta ɲaana ikun da ɲiiɲen ŋa kafiini i maaren Banisirayilaganko ku yi ; Tunka Duumanten ya ni ikun kutiyen ŋa, xoyi a ga da ko i da moxo be yi. 3 Sadaxakiɲandaano ku taqun ya faayi ku bakka Banisirayilaganko gaa sadaxo beenu sadaxini, xo gunbo, ma jaxe : I na feefun do kankanbaaron do kuusen kini sadaxakiɲandaanon ŋa. 4 Xa na axa fateyifanon yillun kini i ya, a do axa reesendolo kurunba, kafiini axa yigeten ŋa, a do axa tanmisayinti fana xesunto. 5 Baawo Tunka Duumante axa Alla yinme ya n da i sugandi bakka fonlaqun kuttun su naxa, i n sigi nan golli ti ike yinme toxon ŋa duna kiyun danmon su yi, ikun do i renmun su. 6 Selli Leewikaaranke be ga nda giri i deben ŋa bakka axa debun du baananbe yi noqu su Isirayila noxon ŋa, nan daga noqu be Tunka Duumanten ga da a sugandi, 7 a wa xidimene ti Tunka Duumante i Alla toxon ŋa, kafiini i maaren Leewikaaranko ku beenu siginton gaa non ŋa Tunka Duumanten jon me naxa, 8 a do i su ɲeroono sadaxinden taqun ŋa ya, hari duran fo tana ga na ɲi a yinme maxa.[Yaaxeye do Fillakapaanon ŋa.]
9 « Bire be axa ga na kiɲe jamaane be Tunka Duumante, axa Alla gaa a kinni axa yi, xa maxa yaaxe do non taaxaanon golli haraamunton ŋa. 10 Axa du baananben nan maxa i ren yugo ma i ren yaxare buyi musundo yi, na fi mannaraganken ¤tuwaaxun muuru ti faayinde, na seron xibaari ti a yi, walla wanjintuwaaxu¤, ma nan korotindi, 11 kun do dabari buru dabariye, jinnagumaaxu, gunduburugumaaxu, walla xa nan xibaarindi ti furun ŋa. 12 Baawo sere su gaa ku fiinu ɲaana, a kaman ɲexunten ya ni Tunka Duumanten maxa. Kun fi ɲexunto ya ɲanŋen saabu da ni, Tunka Duumante, axa Alla gaa xabiilanun xatana bakka axa kaane. 13 Xa da du su kini Tunka Duumanten ŋa, axa Alla. 14 Axa gaa ke xabiila be kittun duuraaxunu, i na dabariburudeberaanon do jinnagumun ya terinkana. Xa Tunka Duumanten nta a mulla axakun gaa kun do i me su ya ɲaana, axa Alla.
[Xayifaare tana riye]
15 « Tunka Duumante, axa Alla wa riini xayifaare bangandi bakka axa yi, a gaa xoyi in moxo, a bakka axa yinme ya yi, axa waaxinu ku du baananbe ya ni, axa na a ya terinkana. 16 Axa da ken yinme ya ɲaaga Tunka Duumanten ŋa, axa Alla, Tuurisiina gide ke kanma, meɲiyi xooren koota, axa ga ti : “ O ntaxa a mulla o gaa Tunka Duumanten xannen mukku, o Alla. O ntaxa a mulla na ke yinbi xoore wari, o nta kalle mulla. ”* 17 Tunka Duumanten ti in da : “ I ga da ke ko kundu, a siren ya ni. 18 N na an me xayifaare ya bangandini bakka i ya, i yinme waaxinu ku du baananbe. N na in sefon ro a raqen ŋa. N ga na a ɲaamari ti fo wo fo su yi, a na a kiɲandi i ya. 19 Xayifaaren ga na sefo beenu ko ti in toxon ŋa, sere be ga ma in kun sefon terinka, ken bire ke, n yinme ya na a kaman tirindi a yi. 20 Xa selli xayifaare ga na a wutu ti du yi na sefe ko ti in toxon ŋa ti dukoyintaaxu, n ga ma a ɲaamari ti a na a ko, ma a ga na sefe ti alla tana toxon ŋa, ken bire, ken xayifaare ya n kalla. ”
21 « A me wa du axa wa du tirindini nan ti : “ O na a tuunu kan moxo nan ti Tunka Duumanten sefe feti ke yi ? ” 22 Selli xayifaare ga na sefe ko ti Tunka Duumanten toxon ŋa, ken sefe ga ma ɲaŋi, ken bire Tunka Duumanten sefe feti ken ŋa ; ken ni xayifaare ke yinme dukoyintaaxun ya yi. Xa maxa kanu a yi ! »