[Haaruna bonsonŋu]
3
Ku kundu ya ni Muusa do Haaruna bonsonŋun ŋa bire be Tunka Duumanten gaa Muusa daalanlenmaaxunu Tuurisiina giden kanma. 2 Haaruna renmun toxonun faayi : Nadaabu, ken ya ni sooman ŋa, Habiiyu, Lajaari, a do Yittimaara*. 3 Ku ya ni Haaruna renmun toxonun ŋa, sadaxakiɲandaana sugandinto, ku beenu a ga da i daari na fiinun ro i kittun ŋa, kuudo i nan xidime sadaxakiɲanden gollen da.4 Nadaabu do Habiiyu, kun da timi liŋen futaadi ti yinbi sagatanten ya yi Tunka Duumanten jon me naxa Tuurisiina gunjuran ŋa, i kara*. I ma renme toxo. Lajaari do Yittimaara, kun ɲa xidimaano yi sadaxakiɲanden gollen ŋa kafiini i faaba Haaruna yi.
5 Tunka Duumanten daali Muusa da : 6 « Leewikaarankon xabiilan tinkondi riini, na i wara Haaruna jon me naxa, sadaxakiɲandaana ke, i na xidime a danŋa. 7 I na sigi ti Haaruna do jaman danman su gollun ŋa gemmanlenmaaxun tilliisen raqe, na allanbatika yiranma ke gollun yaaxen bagandi. 8 Ikun ya ni sikkaanon ŋa xadi, gemmanlenmaaxun tilliisen yokken su xibaaren ŋa, a do Banisirayilaganko haajunun su, na allanbatika yiranma ke gollun golli. 9 An na Leewikaarankon kini Haaruna do i renmun ŋa. Ikun ni kuyu ya, i gaa kiniini a yi bakka Banisirayilaganko danmon su naxa. 10 Ken kuŋa, an na Haaruna do i renmun sugandi, i na i sadaxakiɲanden gollun tanga. Seri tana be nda tinko, a n xawa kalla ya. »
11 Tunka Duumanten daali Muusa da nan ti : 12 « Nke yinme ya n da Leewikaaranko wutu bakka Banisirayilaganko naxan ŋa renyugu fanan su batten ŋa. Leewikaarankon ni in xallun ya, 13 baawo ren fanan su ni inke ya xalle. Bire be in ga da ren fanan su buruxa Misira ɲiiɲen kanma, n da seron ren fanon do daabanun ren fanon su sugandi in du da kaara yi Banisirayilaganko ɲiiɲen kanma, i na ɲaŋi in xallu yi. Nke ya ni Tunka Duumanten ŋa. »
14 Tunka Duumanten daali Muusa da Tuurisiina gunjuran ŋa ti : 15 « Leewikaarankon yiriga ti i faabankaanun do i fonlaqun lanɲaran ŋa ; yugo su wuyun gaa xaso yi segene, an na a yiriga. » 16 Tunka Duumanten ga ɲaamarindi moxo ke be yinme yi de, Muusa da i yiriga na a saxu ken daale ya kanma.
17 Leewi renmun toxonun ya faayi ku : Geresooni, Xehaati, a do Meraari*. 18 Geresooni renmun fonlaqun ya ni Libinilankon do Simeyilankon ŋa. 19 Xehaati fonlaqun ni Hamuraamulankon do Yicaarilankon ya, a do Heburoonalankon do Wujeelilanko. 20 Meraari fonlaqun ni Mahalilankon do Muusilankon ya. Ku ya ni Leewikaarankon faabankan fonlaqun ŋa.
21 Geresoonilanko ku, i ya fonlaqu ni Libinilankon do Simeyilankon ŋa. 22 Yugun su jaaten ga yirige na a wutu xaso renme, ma fo be gaa ken kanma, kun fo yiriganto gemu wujuunu ɲeri do kamo karagi ya (7 500). 23 Kun Geresoonilanko daaxanton ni allanbatikan falle ya yi kinxennan banŋe. 24 Geresoonilanko ku kuŋa, i yinmanken ni Leyila renme Yelisaafu ya. 25 Geresoonilankon sigan ya ni tilliisen do i xufan koroosinden ŋa, a do yirido be gaa tilliisen raqen ŋa, 26 do allanbatikan gallen yoorindaadun yirankiru, do yiridonu be gaa allanbatikan gallen roraqen ŋa, ken do gemmanlenmaaxun tilliisen segenden gaa ɲaana ti kacu beenu yi. Yoorindaadun wa yoorini sadaxaxurumindifon do tilliisen ŋa. Golle su gaa taŋene ku yokku xibaaren ya yi, i ya siginton na ti ken ŋa.
27 Ku fonlaqu beenu ga bogu Xehaati yi, kun ya ni Hamuraamulankon do Yicaarilankon fonlaqun ŋa, a do Heburoonalankon do Wujeelilanko, ku ya ni Xehaatilankon fonlaqun ŋa. 28 Na a wutu xaso renme, ma fo be gaa ken kanma, i yugun ga yirige, a ɲa wujuunu segi do kamo tunmi (8 600). Ikun ya siginton na ti dingira sennen gollun ŋa. 29 Kun Xehaatilanko daaxanton na allanbatika yiranman banboxunkitten ya yi. 30 Ikun Xehaatilanko fonlaqu ku yinmanken ni Wujeeli renme Licafaana ya yi. 31 I ya siginton na ti waxanden ŋa, a do taabali, ken do fitillen do sadaxindinoqunu, kafiini yokki sennu ku beenu i gaa gollini ti i ya, a do yirankutaade. Ken do golle su gaa taŋene ku yokku xibaaren ŋa. 32 Leewikaaranko ku ku yinmanko kundu, i yinmanken ni sadaxakiɲandaana Haaruna renme Lajaari ya. Ku beenu ga sugandi allanbatika yiranman gollun xanne maxa, aken ya n toori kun kanma.
33 Ku beenu ga bogu Meraari ya, kun ga ni Mahalilankon fonlaqen do Muusilankon fonlaqen ŋa, kun ya n ɲa Meraarilanko ku yi. 34 Na a wutu xaso renme, ma fo be gaa ken kanma, i yugun ga yirige a ɲa wujuunu tunmi do kamo filli ya (6 200). 35 Saasa kuŋa, Meraarilanko ku fonlaqun yinmanken ni Habihaayila renme Sureeli ya. Kun daaxanton na allanbatika yiranman saahelinkitten ya yi. 36 Meraarilankon ya siginton na ti allanbatika yiranman tonton gollun ŋa, a do a ballaadu, do a gondomon do a tontonsigaadu, kafiini a yokkun su yi, a do golle su gaa taŋene kun ŋa, 37 ken do allanbatika ke yoorindan gondomon su, kafiini i tontonsigaadun ŋa, ken do i tontaadun do i kacu.
38 Xa, ku beenu daaxanton gaa dingira sennen taŋon ŋa kinbakkan banŋe, allanbatikan jon ŋa, kun ni Haaruna do i renmun ya, a do Muusa. I ya siginton na ti dingira sennen hanmirafiinun ŋa, a do Banisirayilaganko hanmirafiinu. Seri tana nda tinko non ŋa, a n xawa kalla ya.
39 Jaate be Muusa do Haaruna ga da a yiriga Leewikaarankon fonlaqun ŋa na a saxu Tunka Duumanten daalen kanma, na a wutu yugo su wuyun gaa xaso yi segene, i haqen gemu tanpille do wujuunu filli yugo ya (22 000).
[Renyugu fanon maxawasande]
40 Ken dangi falle, Tunka Duumanten daali Muusa da : « Banisirayila renyugu fanan su yiriga, na a wutu xaso renme yi segene, an na i jaate ti i toxonun ŋa. 41 Nke ya ni Tunka Duumanten ŋa, an na Leewikaarankon wutu in da Banisirayilaganko renyugu fanan su batten ŋa. An na Leewikaarankon naaburun wutu in da Banisirayilaganko naaburun renyugu fanon batten ŋa. » 42 Muusa da Banisirayilaganko renyugu fanon yiriga xo Tunka Duumanten ga da a ɲaamari moxo ke be. 43 Ren yugu fano ku su toxonun jaate, na a wutu xaso renme yi segene, a gemu tanpille do wujuunu filli do kamo filli, a do tanɲere do yugu sikki (22 273).
44 Tunka Duumanten daali Muusa da ken falle : 45 « Leewikaarankon wutu Banisirayilaganko renyugu fanan su batten ŋa, na Leewikaarankon naaburu siginton wutu Banisirayilaganko naaburu siginton batten ŋa. Leewikaaranko ku ni inke ya xallu yi. Nke ya ni Tunka Duumanten ŋa. 46 Xa ganta, Banisirayilaganko kamo ku filli do tanɲeren do renyugu fanon sikki be ga jiidi Leewikaaranko ku jaaten kanma, 47 godoxullu sikki wutu seriyinme su kanma, ken ni i be su duran maxawasaadon ya. An nan xawa ke haqe ragana dingira sennen godoxullen xiiman ya. (Godoxullen ni tanpille garaamu ya.) 48 An na i ken jaati jiidinte maxawasexaalisin kini Haaruna do i renmun ŋa. »
49 I ga jiidi Leewikaaranko ku kanma ti ku be yi, Muusa da i maxawasexaalisin raga i ya. 50 A da xaalisin raga Banisirayilaganko renyugu fanon batten ŋa, dingira sennen godoxullen xiiman ŋa : kamo ɲeri, tanɲere do godoxullu segi. 51 Muusa da maxawasexaalisi ke kini Haaruna do i renmun ŋa, na a saxu Tunka Duumanten daalen kanma, ken ga ni a ga da Muusa ɲaamari moxo ke be.