Jaatu 4

[Leewikaarankon jaatun do i gollu]

Tunka Duumanten daali Muusa do da nan ti : 2 « Xa da seriyinme su jaaten wutu Xehaatilankon ŋa Leewikaarankon naxa, ti i fonlaqun do i faabankaanun lanɲaron ŋa, 3 na a wutu tanjikke siine renme segene katta tankarage siine renme yi, fo wo fo ra gaa riini golliɲa genmanlenmaaxuntilliisen noxon ŋa.

4 « Genmanlenmaaxuntilliisen noxon ŋa, Xehaatilankon gollun teŋene fo sennun fo sennun ya yi. 5 Daaxan ga na ɲi gilli, Haaruna do i renmun ya n riini, na tilliise ke yirankutaaden yanqandi, na a xufu ŋa. 6 Ken falle, i na liwongifata mosinten ro a kanma, na baxa xaxacen duuron begin boyi ken kanma, ken falle i na a wutaadun ro a yi. 7 Sadaxanbuuruntaabali ke, i na begi baxanman boyi a kanma, na yokkun ro a kanma : ɲaaɲaade, beelunu, jinxollo, a do waatu. Sadaxanbuuru ke be gaa a kanma, ken toqo a yi ya duumaye yaaxe maxa. 8 I na begi dunbu xaxacen boyi i kanma, na liwongifata mosinten xufu kun su kanma. I na a wutaadun ro a yi.

9 « I na baxa xaxacen begin wutu na fitillen do i kumisoomon xufu ti a yi, a do a xanpa, ken do yinbiwutifo, kafiini tenxollon danmon su yi, ku be i gaa gollini ti i ya. 10 I na a do i yokken su wutu ken falle, na liwongifata mosinten fanama a yi, na a saxundi sollinsanbaxan kanma.

11 « I na baxa xaxacen begi boyi kan ke xa kanma, i na liwongifata mosinten xufu a yi, na a wutaadun ro a yi. 12 Ken falle, i na golliɲanyokken su wutu, ku be i gaa gollini ti i ya tilliisi senne ke yi, i na i ro baxa xaxacen begin noxon ŋa, na liwongifata mosinten xufu i kanma, na i ro sollinsanbaxankanma. 13 I na kateyinxamon xooro bakka sadaxindinoqun ŋa, na begi lankaranman boyi a kanma, 14 na golliɲanyokken su ro a yi : yinbiwutifoonu, tiyinjaabo, peelunu, a do xollo, kafiini sadaxindinoqun yokken su yi. I na liwongifata mosinten xufu a yi, na a wutaadun ro a yi.

15 « Bire be girindinden ga na ɲi ɲaana daaxan ŋa, Haaruna do i renmu ku ga na duguta tilliisi senne ke do i yokken su xufaarinden ŋa, Xehaatilankon na ri i wutu. Xa, i nta xawa katiini fo senne su yi, ken ga fe i kalla ya. Ke ya ni Xehaatilankon sigan ŋa genmanlenmaaxuntilliisen di.

16 « Siga be ga sugandi sadaxakiɲandaana Haaruna renme Lajaari danŋa, ken ni fitillinteenun do futaadun xibaarun ya, a do kootasunsoxofonsadaxo, kafiini daarinditeenun ŋa. Aken ya siginten ni do allanbatika yiranman xa xibaarun su yi, a do fo wo fo gaa a noxon ŋa, ken ni tilliisi sennen do i yokken su ya. »

17 Ken falle Tunka Duumanten daali Muusa do Haaruna da nan ti : 18 « Xa maxa a toxo Xehaatilankon fonlaqun jaman gaa buruxeene bakka Leewikaarankon ŋa ; 19 i ga na tinko fo sennun fo sennen ŋa, fiinu be gaa ɲaana i da i gaa toqo bireene i ga nta kalla, ken ni ya : Haaruna do i renmun ya n roono, na baane su sigan do a gollen tuyindi a yi. 20 Xa ikun nta roono noxon ŋa na fo sennu ku faayi hari wucu lamaane, ken ga fe i kalla ya. »

21 Tunka Duumanten daali Muusa da ken falle nan ti : 22 « Geresoonilankon xa jaaten wutu ti i faabankaanun do i fonlaqun lanɲara, 23 gelli tanjikke siine renme segene ma tankarage siine renme. Fo wo fo ra gaa riini golliɲa genmanlenmaaxuntilliisen noxon ŋa, an na a su yiriga. 24 Geresoonilankon sigan ya faayi ku, gollen do wutunde : 25 i na allanbatika yiranman kirun tiŋa, a do genmanlenmaaxun tilliisen xufa, ken do liwongifata mosinte ke xufan be gaa xufini a kanma, genmanlenmaaxuntilliisen roraqen yirido, 26 ken do gallen yoorindaadun kirun, a do yirido be gaa a raqen ŋa, ken do tilliisen segenden gaa ɲaana ti kacu beenu yi. Yoorindaadun wa yoorini sadaxindinoqun do tilliisen ŋa. Golle su gaa taŋene ku yokku xibaaren ya yi, i ya siginton na ti ken ŋa.

27 « Geresoonilankon na i gollen su dabarini Haaruna do i renmun ɲaamariyen ya kanma, fo be gaa xo wutunden do gananden gollun ŋa. I ga n xawa fo wo fo su wuttu, axa na i tuyindi ti a yi. 28 Ku ya ni Geresoonilankon fonlaqun sigan do i gollen ŋa genmanlenmaaxuntilliisen gollun noxo. I gollini sadaxakiɲandaana Haaruna renme Yittimaara ya kandan noxon ŋa.

29 « Meraarilankon xa jaaten wutu ti i faabankaanun do i fonlaqun lanɲara, 30 gelli tanjikke siine renme segene ma tankarage siine renme. Fo wo fo ra gaa riini golliɲa genmanlenmaaxuntilliisen noxon ŋa, an na a su yiriga. 31 I xa sigan do gollun ga ni fo be yi genmanlenmaaxuntilliisen fiinun noxo, ken ni : tilliisen tonton do a xepun wutunden ya, a do a gondomo, kafiini a sigaadun ŋa. 32 Ken do gondomo be gaa yoorini do a yi, i do i sigaadu, a do i tonton do i kacu, ken do yokke su i gaa gollini ti a yi. Be su ga n xawa sikki ti ke be wutunden ŋa, an na a kaman xiri ti i toxon ŋa, na a koyi a yi. 33 Meraarilanko fonlaqun gollun do i sigan ni ku ya yi genmanlenmaaxuntilliisen gollun danmon noxon ŋa, sadaxakiɲandaana Haaruna renme Yittimaara kandan noxon ŋa. »

34 Muusa do Haaruna do jaman yinmankon da Xehaatilankon yiriga ti i faabankaanun do i fonlaqun lanɲaran ŋa, 35 na a wutu gelli tanjikke siine renme segene ma tankarage siine renme, fo wo fo ra gaa riini golliɲa genmanlenmaaxuntilliisen noxon ŋa. 36 Ku beenu ga yirige, i ɲa wujunu filli do kamo ɲeri do tankarage yugo (2 750), i faabankaanun do i fonlaqu. 37 Xehaatilanko ku beenu ga yirige genmanlenmaaxuntilliisen gollun kafumanton da, Muusa do Haaruna ga da i yiriga na a saxu Tunka Duumanten daalen kanma Muusa danŋa, i ya ni ku.

38 Haqe be ga yirige Geresoonilankon faabankan do i fonlaqun ŋa, 39 na a wutu tanjikke siine renme segene ma tankarage siine renme, fo wo fo ra gaa riini golliɲa genmanlenmaaxuntilliisen noxon ŋa, 40 a fo yiriganten ɲa wujunu filli do kamo tunmi do tanjikke yugo (2 630), i faabankaanun do i fonlaqun lanɲara. 41 Ke ya ni Geresoonilankon faabankaanun do i fonlaqun jaaten ŋa, genmanlenmaaxuntilliisen golliɲaŋaanan su kafumante, Muusa do Haaruna ga da i yiriga na a saxu Tunka Duumanten daalen kanma.

42 Meraarilankon faabankaanun do i fonlaqun fo yiriganto, 43 na a wutu tanjikke siine renme segene ma tankarage siine renme, fo wo fo ra gaa riini golliɲa genmanlenmaaxuntilliisen noxon ŋa, 44 i faabankan fo yiriganten ɲa wujunu sikki do kamo filli yugo (3 200). 45 Ke ya ni Meraarilankon faabankan do i fonlaqun fo yiriganton ŋa, Muusa do Haaruna ga da i yiriga na a saxu Tunka Duumanten daalen kanma yi Muusa da.

46 Fo yiriganto beenu su Muusa do Haaruna do Isirayila yinmankon ga da i yiriga Leewikaarankon faabankan do i fonlaqun ŋa, 47 na a wutu tanjikke siine renme segene ma tankarage siine renme, fo wo fo ra gaa riini golliɲa genmanlenmaaxuntilliisen noxon ŋa, a do fo wo fo ra gaa wutunden gollen dabari, 48 a fo yiriganten ɲa wujunu segi do kamo karagi, a do tansege yugo (8 580). 49 Na a saxu Tunka Duumanten daalen kanma yi Muusa da, i yirige. Seriyinme su ga n xawa sikki siga be yi, a do an ga n xawa likke be tiŋana, a koyi an ŋa. I yirige Tunka Duumanten ɲaamariyen ya kanma yi Muusa da.