[Fatanwattiburugumun fateye bakka jaman ŋa]
5
Tunka Duumanten daali Muusa da nan ti : 2 « A ko Banisirayilaganko da nan ti fatanwatten gaa sere su yi, a do jinjoqe, ken do sere su ga sobi ti furen meemenden ŋa, i na i bagandi daaxan ŋa. 3 Na a wutu gelli a yugo ma a yaxare, xa da i bagandi, na i wara telle daaxan falle, kuudo i n maxa daga a sobindi. Baawo in hadarinten na daaxa ke ya yi kafiini axa yi. » 4 Banisirayilaganko da ken dabari, na i wara telle daaxan falle. Tunka Duumanten ga daali Muusa da moxo ke be yinme yi de, Banisirayilaganko da ken ya ɲa.[Futuxifiinu]
5 Tunka Duumanten daali Muusa da ken falle : 6 « A ko Banisirayilagankon da ti : “ Bire be yugo ma yaxare ga na fo bonondi sere maxa, a kaman da Tunka Duumanten kuta, a ɲa junuubunteyi. 7 Ken kuŋa a nan xiire ti i junuubun ŋa, na fo bononte ke tuga a kaman ŋa, na ken taxandi karagan kafu a yi. 8 Xa golli buren ga ɲa ke be yi, selli seri tinke ga ma toxo a falle, ke be fo bononte ke ra gaa tugeene a yi, ken bire fo bononte ke tugeene Tunka Duumanten ya yi, a na kini sadaxakiɲandaanan ŋa, kafiini yanpeyinsadaxanjaxandigen ŋa, yanpeyimuuriyen gaa ɲaana a da ti ke be yi. 9 Banisirayilaganko gaa fo wo fo su wuttu bakka i fo sennun ŋa katta sadaxakiɲandaanan ya yi, aken ya fo ni. 10 Sere su sadaxa sennen ɲaana sadaxakiɲandaanan ya fo yi ; sere ga na fo wo fo kini sadaxakiɲandaanan ŋa, ken ɲaana sadaxakiɲandaana ke ya fo yi. ” »
[Yaxaren tuhuumande katta jeeniyen ŋa]
11 Tunka Duumanten daali Muusa da nan ti : 12 « A ko Banisirayilaganko da nan ti yugo wo yugo yaqen ga na selunbe na a janba, 13 yugo tana ga saxu do a batten ŋa na a ɲi kiine, ma seri tana ma bogu a xala, nan ti aken yaxare da i du sobindi, a ma rage na a toxo golle ke yi, seedaana xa ma bange ti a yi, 14 yelleeni suuxen ya n ro kiinen yonkin ŋa tannu, a ga suuxu yaqe ke yi nan sikka, yelli a da fo ɲa, ma a ma fo ɲa, 15 a do yaqe ke na daga katta sadaxakiɲandaanan ŋa. A do a sadaxan xa na daga, muudu baane yillijura. A nta te joqo jura ke kanma, walla xa timiliŋe, baawo suuxumaxansadaxan ya ni, sinmandindinsadaxan ya ni, a gaa sinmandindini do fo buren ŋa.
16 « Sadaxakiɲandaana ke do a na daga na a sigindi Tunka Duumanten jon me naxa. 17 A na ji sennen wutu doorinlallen ŋa, na dooru yogo wutu allanbatika yiranma ke beran ŋa, na i ro ji ke yi. 18 Ken falle, a na daga yaxare ke yi sikki Tunka Duumanten jon me naxa, na yaxare ke yinmen duuraaxundi, a na sinmandindinsadaxa ke ro a kittun ŋa, ken ga ni suuxumaxansadaxa ke yi. Sadaxakiɲandaana ke na ji xaxacu ku wutu i kittun ŋa, langanden gaa ɲaana ti ku be yi. 19 Ken falle sadaxakiɲandaana ke na yaxare ke takkindi nan ti a da : “ Selli yugo tana ga ma saxu do an batte, selli an ga ma selunbe na du sobindi na an kiina kacen toxo an ŋa, yelli an gan na kisi ke ji xaxace be langanden gaa ɲaana ti a yi. 20 Xa selli an ga selunbe nan an kiina kacen toxo an ŋa, an ga da du sobindi na du kini yugo tana yi do an nan kafi, 21 an na takki ti langandixannun ŋa. ” Sadaxakiɲandaana ke na ti a da xadi : “ Tunka Duumanten gan na an ɲa langandifon ŋa an xabiilan naxa, na an saarenuxunlenmen kari. 22 Ke lagandiji na yanqa an noxon ŋa, na an saarenuxunlenmen kari¤. ” Ken falle yaxare ke na ti : “ Anmiina, anmiina. ”
23 « Ken falle sadaxakiɲandaana ke na ku digaamu kundu safa, na i wanqi roono ji xaxacu ku yi. 24 A na langandiji xaxacu ku minindi yaxare ke yi, kun ji xaxacu na yanqa a noxon ŋa, nan digi a yi. 25 A na suuxumaxansadaxa ke wutu bakka yaxare ke kittun ŋa, a na a yigi-yigi Tunka Duumanten jon me naxa, na a deni sadaxindinoqun ŋa. 26 Sadaxakiɲandaana ke na gobbe bakka sadaxa ke yi sinmaado yi, na a buyi sadaxindinoqun ŋa. Ken falle ya ni a gaa ji ke minindini yaxare ke yi. 27 A nda ji ke minindi a yi, selli a ga da du sobindi ya, a ga da i kiina janba, langandiji ke wa bonen joofana a yi, a saarenuxunlenmen na kara. Yaxare ke na ɲa langandifon ŋa i xabiilan naxa. 28 Xa selli yaxare ke ga ma du sobindi, a sennen ya ga ni, a xura, a ra wa noxon wuttu nan jiidi.
29 « Ke ya ni suuxuyen sariyan ŋa, taŋeene yaxare be ga na selunbe, na du sobindi kiinen kacen ŋa, 30 ma walla xa suuxuyen ga na yugo be wutu, a ga sikka i yaqen ŋa, a na a sigindi Tunka Duumanten jon me naxa, sadaxakiɲandaanan xa na ke sariya wurundi a kanma. 31 Ken ŋa yango nta yugo ke yi. Xa yaxaren na i yangon likken tiŋa. »