[Najiirintekke]
6
Tunka Duumanten daali Muusa da ken falle : 2 « Digaamu Banisirayilaganko da nan ti : “ Yugo ma yaxare ga na tegu ti Najiirintekke¤ yi, na du sugandi Tunka Duumanten da, 3 a kaman nan fate bakka reesendolon do xonsin ŋa ; a do binegara be gaa bakka reesendolon ŋa, ken do binegara be gaa bakka xonsin ŋa, minifo su ga dabari ti reesen ŋa, a nta a minni. A nta reese xaye yigana, a nta a kaawante xa yigana. 4 A tegukooto ku danmon su noxo, a nta reesen fo wo fo yigana. Hari a funse ma a faaramulle, a n maxa a yiga.5 « “ A najiirintekke ke kooton su noxon ŋa, siyaade nta wurunu a yinmen ŋa. A na i yinmen yinten wara xoorono ti du yi, ma a ga da du sugandi Tunka Duumanten da kooto ku beenu yi, kun ga na tinme, a na seno.
6 « “ A ga da du sugandi Tunka Duumanten da kooto ku be yi, a nta kiɲene fo fure yi ken wuce su noxon ŋa. 7 Hari a ma walla a faaba nda kara, ma a waaxi yugo walla xa waaxi yaxare, a n maxa du sobindi ti a furen ŋa, baawo a duusugandinde i Alla da, ken taagumansen ya ni a yinmen kanma. 8 A teguye ke kooton danmon su noxo, a sugandinten na Tunka Duumanten ya da.
9 « “ Sere ga na juyintankara a kaaran ŋa xa, a yin senne ke sobiini ya ; a n xawa i yinme ke siyini bita ɲerunden ŋa ya : ken ga ni a senokootan ŋa. 10 Bita segundin ŋa, a do kaadunbooru filli na ri katta sadaxakiɲandaanan ŋa gemmanlenmaaxun tilliisen raqe, walla xa gundunboorinlenmu filli. 11 Sadaxakiɲandaana ke na baanen ɲa yangosadaxan ŋa, na baanen ɲa sadaxa xuruminten ŋa. A na yanpeyimuuri a danŋa, na a sababun ɲa a ga sobi ti furen ŋa. A na i yinmen senondi ken koota su yi. 12 A do siinabaananjaxandige na yille riini senoyinsadaxa yi, na du sugandi Tunka Duumanten danŋa ta kurunba yi, baawo tekke ke bita fanon ntaxa jaateene keeta.
13 « “ Najiirintekken tegaanan tegukooton ga na tinme, a sariyan faayi : i do a riini gemmanlenmaaxun tilliisen raqen ya, 14 a na i sadaxan sadaxi Tunka Duumanten da : siinabaananjaxandige ya n ɲaana sadaxa xuruminten ŋa, loojuru ga nta a yi. Ken do siinabaananjaxanyeere, loojuru ga nta a yi, ken na ɲa yangonsadaxan ŋa, ken do jaxandigi baane, loojuru ga nta a yi, ken na ɲa allatiigeyinsadaxan ŋa, 15 kafiini tufullilewiirintanŋen kanda baane, a do jura mullu-mulli xootinte ti ten ŋa, na ken ɲa takkulan ŋa lewiiri ga nta a yi, a do furufuru, na a xomi ti ten ŋa, kun do i soxofonsadaxon do i sadaxanjiinu.
16 « “ Ken falle sadaxakiɲandaanan na ku su kiɲa Tunka Duumanten jon me naxa, na a yangonsadaxan sadaxi, a do sadaxa xuruminte. 17 A n xawa jaxandige ke ɲaana allatiigeyinsadaxan ya yi Tunka Duumanten da, ken do buuru lewiirintanŋen ke kande. Sadaxakiɲandaana ke n xawa a soxofonsadaxan do a sadaxanjiinun xa sadaxini ya.
18 « “ Tegaana ke na i yin sugandinte ke siyi gemmanlenmaaxun tilliisen raqen ŋa, na a yintun wutu, allatiigeyinsadaxan ga buyi noqu ke be, a na i ro yinben ŋa no. 19 Tegaana ke ga na i yinmen siyi nan duguta, sadaxakiɲandaanan na jaxandige ke feefe moyinten wutu, a na takkula lewiirintanŋi baane wutu bakka kanden noxon ŋa, kafiini furufuru lewiirintanŋe ke yi, na i ro najiirintegaana ke kittun ŋa. 20 Ken su falle, sadaxakiɲandaana ke na sadaxa ke yigi-yigi Tunka Duumanten jon me naxa, xoyi a ga n xawa moxo be. Ken ni fo sugandinten ya, sadaxakiɲandaanan xallen ya ni, ken do gijin yigi-yiginte ke do togi wutunte ke. Ke su falle, Najiirintegaana ke ra wa reesendolon minni. ”
21 « Sere be nda du sugandi ti tekke yi, a ga n xawa sadaxa be bagandini Tunka Duumanten da, a sariyan ni ke ya. Selli kiteyen gaa a da, a ra wa sadaxa tana laayidun wuttu. Xa a ga na tekke be laayidun wutu, a n xawa a maxafakka ya, xoyi duusugandiyen sariyanun ga da a riiti moxo be. »
[Sadaxakiɲandaanon duwanŋe Banisirayilaganko da]
22 Tunka Duumanten daali Muusa da : 23 « A ko Haaruna do i renmun da, nan ti axa gaa duwanŋa Banisirayilaganko da moxo be, a ya faayi ke, axa na ti :
24 “ Tunka Duumanten gan na xeeri ɲa an da, na an tanga ;
25 Tunka Duumanten gan na i nooron ŋaalindi an kanma, na an neema ;
26 Tunka Duumanten gan na i jon koyi an ŋa, na xeeri kini an ŋa. ”
27 « I na in toxon roono Banisirayilaganko kanma ke moxo ya yi, n xa na i neema. »