KSALA TABACA ITY EBUTKE TUNANARE
KSALANARE DUM ERAS NEKE KOLNYE
Ksalanare ribun ti tabaca Kitab Lanke ne. Ti neke ksala erasare dum ti tabaca ne.
1. Tbaca ayat a taora ma tleru ity Ebutke Anike. (Kola ne: Rm. 11:33-36; Flp. 2:5-11; 1Tim. 3:16; 6:15-16; Why. 4:11; 5:9-11, 12; 15:3b-4; 21:6b-8)
2. Tbaca ayat a masaluk ity nekre. (Kola ne tatos ti INDEKS BERTOPIKKE, neke kani a Ti neke rawahuk ayat mamin ti Kitab Lanke ma klyosu ksalanare ma ity.)
3. Tbaca ity Ebutke wasi Kitab Lanke mumu ti ainke sasam. (Kola ne tatos ti tun malosuke ma kani a Tbaca Kitab Lanke ti Ainke Krala ne ma tbaca ayatare ma ktyoha seure.) Bisa ma tmesan tbaca bo, ta eras lan-lanke mo tor ity liatare tbaca mais-mais, kola ne: saw o lay mbyaca mais-mais, sekye kralake mbyaca mais-mais, iry tohtohak sasamke mbyaca mais-mais, luike it a mbyaca mais-mais, kantorke it a mbyaca mais-mais, awakye it a mbyaca mais-mais, hnuke it a mbyaca mais-mais, enmosw o amosw rbu ti ebutke ma byaca ti rtomolu, namanke byaca ti ena serimfwetke tyomolu, idanare o koldyesy dakun.
4. Tbaca ayat ne ma ktyoha gerejake wasi kalenderke. (Tal toha ity wait gerejake bo, kola tanal toha LPJke ne.)
KYOAT TABACA KITAB LANKE LEMAMO TALA KOLNYE
1. Taobak wen eras a kele ratelinke it.
2. Taobak klelan eraske it. Ode kolnye tatot klelan eraske it, ma lema kika namit-namit ma khyury a ity, wen desike ne eras ne.
3. Tsambayan ma taten ity Ebutke ma yal Memeanke ma kkyarya ti ity ralatare.
4. Tabaca neke, kete tbaca bo, de tal ity ralat a kralanare ma tbaca.
5. Taobak ayat tabaca nekre kbuanare ma the, ode ttoha. Ode tlau ayat desikre kbuanare, ti ity wait mormyorifare ti sew kyaki ne mo kolkya, ode musti mo tala sai de?
6. Tkus a tor sambayanke huruk.
TAJAR A KITAB LANKE MA TATOT KBUANKE
1. Tbaca ayatare mamamak. Ayat tabaca desikre ktyanuk sai de? (Tahes bain-bain nam ayat desikre kitanukare, de kete tmesan a trekan, ode kete ktyoha tmesan a tabuke bo.)
2. Ayat tabaca desikre kbuan sai de?
3. Kolnye talalau tor ayat salik ti Kitab Lanke, anakyai ktyanuk nam maisare, de lema ktyanuk nam salik o de?
4. Kbuan tahe desikre kyala ity kolkyabei ma ity wait mormyorif nekre musti mo kihihi i de?
KBUAN DESIKRE KYALA ITY KOLKYABEI
Kyoat tbaca ity Ebutke Tunanare, desikeo tena ity tenatare o ttoha ta lema de?
1. Anakyai kika contoh ma bisa ma ttoha e?
2. Anakyai kika haret ma musti mo tala ma ttoha e?
3. Anakyai kika nam sal a taala nekre musti mo ttunik ba e?
4. Anakyai kika nam sal ti ituru neke musti mo tbisak ba e?
5. Anakyai kika tnyetak a bisa ma takumak e?
6. Anakyai kika ktelake it ma musti mo tala ma ktyoha Hulasokwe ibuke maktei, desikeo nenmo bisa ma tal ity Ebutke wasi hatetakke e?
7. Anakyai kika nam dum ti ayat nekre ma kyajar ity ma musti mo tbihy mamamak e?
8. Anakyai kika nam dum ma nenmo the, ti ity Ebut Hulasokwe e?
9. Anakyai kika nam dum ma nenmo the, ti ity Ebut Yesuske e?
10. Anakyai kika nam dum ma nenmo the, ti Hulasokwe Memeanke e?
11. Anakyai kika nam dum ma nenmo the, ti ngkeskwaure wait uskwe khatuke e?
12. Anakyai kika nam dum ma nenmo the, ti iry a ity ne e?
13. Anakyai kika nam dum ma nenmo the, ti ity wait mormyorifke kyor iry salik e?
14. Anakyai kika nam dum ma nenmo the, ti ity wait mormyorifke kyor ity Ebut Hulasokwe e?
15. Anakyai kika nam dum ma nenmo the, ma ksyusu ohe tala lim o sal ti ity wait mormyorifke e?
16. Anakyai kika nam dum ma nenmo the, ti ity wait harharke ti tajaga ode tahnyarak nuske ktem ne e?
17. Ity Ebut Hulasokwe yus wasi ususke ti wasi irire ne kolkya?
18. Ity wait a ktela nekre ode ity wait mormyorif ne kola Hulasokwe wasi ususke ta lema de? (Ttanuk nam a mlakye, ode lema takakmet a ity tenatare.)
19. Tala kolkyabei ma bisa ma tahihi ity wait ktela o mormyorif nekre, ma ktyoha Hulasokwe wasi usus dai desy de?
20. Tala kolkyabei ma kete tala sal maoly desikre de?
a. Dendye mesmesa tyanuk ti tenan ma byohe, “Musti mo kala kolnye.” De kete ttanuk ti irire ma tbohe, “Musti mo mala koldyesy.”
b. Musti mo tobak a ksala mtekwe, kali kolnye lema tala ksala mtekwe, desikeo ana ity wait mormyorif ne lema bisa ma kihihi i.
c. Tilik ksala bain-bainke ma bisa ma tala, de kete tohut ma tala ktela lema bisa-nare. Kola ne nam a bisa ma taalake ne: “Kbwu ma kbwaca Kitab Lanke ti ainke sasam. Lemade katos ti bagian malosuke ma kani a Tbaca Kitab Lanke ti Ainke Krala ne ma kbwaca ayatare ma ktyoha seure.” Klala kete tilik ksala lema mlay maola ne: “Kala ma kbwaca ode kswosan Kitab Lanke kisike mumu ti huhukkwe ti mingguke krala ne.”
d. Taten ity liatke sasam ta enaru ma rsaluk ity, ma rbihy o nam taohut nekre klyakut eras ta lema. Ode tilik iry a tatohakke ma bisa ma kyumak eta tun mahunik iare.
KTELA MTEW A BISA MA TAALANARE DUM NE
KTELA TABACAKE
1. Tbaca mamamak.
2. Toly de toly ti bacake.
3. Tbaca mo kete tlahamety, de tbaca mamamak bo.
4. Tbaca ayat a tailikke, de kete tbaca koi-kay bo.
5. Tbaca mo kola ne tasambayan ne.
6. Tbaca a kyor ity wait heheke.
7. Tbaca ma tsosan ti ity ralat a kralanare.
8. Tbaca ma kika kbuan ma ity. (Tbuma the ohe ayat nekre ktyanuk sai ma ity.)
9. Eras kolnye tbaca ma the bain-bain kbuanare.
10. Tbaca mo tatos ayatare mumu.
11. Tbaca prikop desy mumu, ta bagian desy mumu, de kete cuma mo tbaca dum bo, ta ayatke it bo.
KYOAT TBACA MO, TOBAK MAOLA NEKRE
1. Ktela maka kbuanare.
2. Tun a khatu mabetik kyaki-kyaki nekre.
3. Ktela it de kisaur it ne.
4. Ktela maisare, ode ktela masalik iare. (Tatos ti kola ne madelahke ode kelerakokke.)
5. Ktela mlakye, neke ktyoha nam taalanare.
6. Ktela inahliakare ne rahes mo, kbya demdemw.
7. Tal ayat tabaca desikre kbuanare ratebikan ma tsosan ti ity ralat a kralanare.
8. Kete tamluak ma tbaca catatan kaki-nare, ode tatos ma talalau tor ayat salik ti Kitab idanare dakun.