Dombake Ananke syisik metrai manosy lyakwe
8
Maktei o Dombake Ananke syisik metrai manosy lyakwe,
neke metrai itkwe desy,
ma klyatan ti kitab raluluk desy nggora.
Dendye kyoat Dombake Ananke isisik metrai desike bonyo,
wen sra eras Hulasokwe imin tike kele rteka anakyai menitke hean telw (30 menit).
2 Ode katos Hulasokwe wasi nyaso manosy laitke itw,
ma ramdiry ti Hulasokwe wasi lulululw ne.
Ode yal strompetare ratsam-ratsam ti sir ma rkumak kyakar sir.
Taw a ratunw nat mahon mtelaske tike (8:3)
3 Ode Hulasokwe wasi nyaso manosy laitke it huruk ma mya,
ma imdiry ti meja ratunw nat mahon a mtelaske ti Hulasokwe ne kserike.
Meja neke rala toha blyawan kunkunkye,
ode kimin ti kader maharetake lulululw ne.
Ma nyaso desike mya o kyumak taw a ratunw nat mahon mtelaske tike.
Taw neke rala toha blyawan kunkunkye dakun.
Ode ral nat mahon a mtelaske ribun a ksyalik ti i,
kyor iry matohakare† wait sambayanare,
ma yal ti mejake khaha ratunw nat mahon mtelaske tike.
Ode yeh nam desikre kiktemtem mumu ma yabar ba ti Hulasokwe.*
4 Ma nat ribun a nyaso manosy laitke ieh ma kduduhanke kihon a mtelas desikre,
ksyai kyor iry matohakare wait sambayanare bai Hulasokwe.
5 *Maktei o nyaso manosy lait desike yal akye kharake toha meja ratunw nat mahon a mtelaske tike,
ma yal ti taw ikumak desy.
Ode yotuk taw desike ei lasmyerke khaha ne,
ma khyury ma khyitik o ktyarbaka ti laitke,
ode lurwakye ti lasmyerke khaha ne.
Nyaso manosy laitke enaat rohw a wait strompetare
6 Ode nyaso deitw a makumak strompet desikre,
rasosan sir ma it o it ne rala ma rohw wait strompetare.
7 *Dendye nyaso mamunake yohw wasi strompetke bonyo,
uske kyoras elik,
neke us eske,
ktyabal akye ma kihora larke,
ma kyoras ei lasmyerke khaha ne mo lan a ksyalik.
Ma ay desike kisorw lasmyerke khaha ne nenma serit (1/3) a ktei,
ma kisorw khyunw a aure,
ma nenma serit (1/3) a ktei dakun.
Ma ti kyal a tnyei molmol nekre mumu ne,
ay desike knya mumu ma ktei.
8 Maktei o nyaso matoha mamunake yohw a wasi strompetke bonyo,
namke it ma kola dene huar lan de lan ne ma klyehlehlehur,
neke kdi ei tasike.
Ma tasi desike nenma serit a (1/3) kihihi i ma kola larke.
9 Dendye ktela desike khyury ma heal o ail mamin ti tasike kralake nenma serit a (1/3) rmaty.
Ode kabal o aro nekre mumu mamin ti tasike nenma serit a (1/3) ktyeb ma kiskyui-kiskyay dakun.
10 *Maktei o nyaso matoha nyaso enaruke,
neke nyaso enatelkwe yohw a wasi strompetke bonyo,
ftun lan ne it ma dyelaf kola ne rabutw suskwe ma rakutam ma kidelaf ne.
Ode ftun desike dyi toha laitke ei lasmyerke khaha ne,
ma dyi ei sah o wer a kmata nekre,
nenma serit (1/3).
11 *Ftun desike kani a Apsintus.†
Ode Apsintus ne dyi ei sah o wer a kmata nekre nenma serit (1/3),
ma khyury ma sah o wer a kmata a Apsintus idi ti desikre mew o mlara.
Desike mane khyury ma irire ribun a rmaty,
kali renw a wer mew o mlara desikre.
12 *Lemade nyaso matoha nyaso enatelkwe,
neke nyaso enaatke yohw a wasi strompetke bonyo,
sekwe nenma serit a (1/3) lema kdyelaf.
Ode msarinke nenma serit a (1/3) kelerkok.
Ma ti kyal hulke nenma serit a (1/3) lema kdyelaf,
ode ftunare nenma serit a (1/3) lema rdelaf dakun.
Ode sewahke dakun o nenma serit a (1/3) ftunare lema rdelaf ti dakun.
13 Dendye katos manu luskye it ma nyem ti de nyem ma ti laitke,
ode yatela ti iry mamin ti nuske ktem ne ma byohe,
“Masunw lan ne kyala ma kdyan e mane!
Masunw lan ne kyala ma kdyan e mane!
Masunw lan ne kyala ma kdyan e mane!
Kali kolnye nyaso detelw lenla maohw wait strompetare ne,
ana kyait ma rohw a wait strompetare,
desikeo masunw lan ne ana kmya ma kdyan iry mamin ti lasmyerke khaha ne mumu!”