Nyaso manosy laitke yatosa Hulasokwe wasi iry a manosy Israel-are
7
*Maktei o katos nyaso manosy laitke enaat,
ma ramdiry ti esw kmata deat mamin ti lasmyerke khaha ne,
ode rkumak eta esw kmata deat mamin ti lasmyerke khaha desy,
ma kete kika esw masiri ti ra o tasi,
ode ti aw lan nekre elik.
2 Ode katos nyaso manosy laitke it huruk,
ma byetik yosy wen a sekwe ibetik inoskye.
Nyaso desike mya o yety a capke toha Hulasow Mamorif ne.
Ode yatela ti nyaso deat manosy lait a Hulasokwe inal haretke ti sir ma rahnutuk ra o tasi ne,
3 *ma tyanuk ma byohe,
“Mikita!
Kete mihnutuk lasmyerke khaha ne,
dete lemamo ra o tasi,
ode aw lan nekre mumu aduk,
kali musti mo aramy micap nyatoske ti Hulasokwe wasi makaryaare soutare,
ma kyatosa sir aduk.”
4 Ode ktwomolu ohe,
iry a racap nyatoske ti soutare ne aryaritke bonyo,
ribunke atw ksala hean-at a kresi enaat (144.000).
Iry desikre mumu ne rosy a Israel-are ebnwo matrumat wait klolan dehean a kresi enaru (12) desy.
5 Ma manosy klolan Yehudake irkye ribunke hean a kresi enaru (12.000),
neke racap nyatoske ti sir.
Ode manosy klolan Rubenke irkye ribunke hean a kresi enaru (12.000),
neke racap nyatoske ti sir.
Ode manosy klolan Gadke irkye ribunke hean a kresi enaru (12.000),
neke racap nyatoske ti sir.
6 Ode manosy klolan Asyerke,
irkye ribunke hean a kresi enaru (12.000),
neke racap nyatoske ti sir.
Ode manosy klolan Naftalike irkye ribunke hean a kresi enaru (12.000),
neke racap nyatoske ti sir.
Ode manosy klolan Manasyeke irkye ribunke hean a kresi enaru (12.000),
neke racap nyatoske ti sir.
7 Ode manosy klolan Simeonke irkye ribunke hean a kresi enaru (12.000),
neke racap nyatoske ti sir.
Ode manosy klolan Lewike irkye ribunke hean a kresi enaru (12.000),
neke racap nyatoske ti sir.
Ode manosy klolan Isakharke irkye ribunke hean a kresi enaru (12.000),
neke racap nyatoske ti sir.
8 Ode manosy klolan Zebulonke irkye ribunke hean a kresi enaru (12.000),
neke racap nyatoske ti sir.
Ode manosy klolan Yusufke irkye ribunke hean a kresi enaru (12.000),
neke racap nyatoske ti sir.
Ode manosy a klolan Benyaminke irkye ribunke hean a kresi enaru (12.000),
neke racap nyatoske ti sir dakun.
Iry mamin wen sra eras raleru Dombake Ananke ne lema taki tal aryaritke
9 Maktei bonyo,
katos bain-bain irkye kukwan lan ne mo aryaritke lema taki tal,
ma rhonak rabit bokbok narnarw nekre,
ode rkumak a suy ktafranare.
Ma iry ribun nekre rosy a klolanare mumu,
ode rosy a negara-nare mumu,
ode rosy a bangsa-nare mumu,
ode rosy tel salno salikare mumu dakun ti nuske ktem ne,
ma rma ma ramdiry ti kader maharetake lulw ne,
ma rsara Dombake Ananke.
10 Ode ratelat ma rbohe,
“Tamorif neke kyosy ity wait Hulasow
mataklulw ti kader maharetake,
ode kyosy Dombake Ananke dakun,
kali sir ne raorif a ity ne.”
11 Ode nyaso manosy lait desikre mumu,
ror iry a dehean-ru a kresi enaat manety lulw desy,
rtabal heal lan deat desy,
neke raktemtem ramdiry ma rkoal eta kader mahareta desy,
ma rsakitil ode rou ti Hulasokwe,
12 ma rtanuk de rbohe,
“Mlay bain,
tleru ity wait Hulasokwe Anike,
ode talan a I!
Kali madelafke kyor hehei lulw o lyakwe kimin a I.
Ode malkyakakwe kimin a I,
ode hyareta ti laitke ode lasmyerke khaha ne nini nam ti kiba knaru ne!
Lemadendye tsalak eraske ba ti I!
Amin.”
13 Lemade iry dehean-ru a kresi enaat manety lulw desikre it a yena yaw ma byohe,
“Iry a mahonak rabit bokbok desikre esekar de?
Ode rosy kabei ma rama ne de?”
14 *Lemade khwalas ma kbwohe,
“Amam lan o,
lema khwe!
De ti ituru neke,
mmwesan a mhwe bo.”
Dendye tyanuk ma yaw huruk de byohe,
“Iry nekre nenmo rbetik toha Masunw Lanke de,
ti kyoat kidan nuske ktem ne.
Ode ral Dombake Ananke larake,
ma ral ma rhas wait rabitare mane bokbok de.†
15 Dendye khyali ktela desy,
lemade ramdiry ma rsara Hulasokwe wasi kader mahareta desy,
ode sewah o msarin nekre rsambayan ti Hulasokwe Seike kralake ti wen sra eras ne.
Ode Iry mataklulw ti kader mahareta desike,
I ne iseak sir,
ode iharak mamak a sir ne.
16 *Ode iry desikre laarke ode batuke lema kimin sir de,
ode sew manaske lema kena sir dakun de.
17 *Kali Dombake Anan mamin ti kader maharetake kditlan desy,
I ne inonor sir ne,
ode I neke wait Malaka sirke I desy,†
ode ana yeuk sir ma yor sir bai wer mormyorifke kmatake.
Ode Hulasokwe kyur suatare ba mumu,
ma lema rser de.”