Hulasokwe wasi nyaso enasimke yohw a wasi strompetke
9
Ode kyoat manu lusy desike yatela maktei bonyo,
Hulasokwe wasi nyaso manosy lait matoha nyaso enaatke,
neke nyaso enasimke yohw a wasi strompetke.
Desike bonyo katos ftunke it ma dyi a yosy laitke ei lasmyerke khaha ne,
desyo malmata kyumak kuskus ranal ti ike.
Kuskus neke kyala kyosy khyehyeike,
ral ma rkus eta holholat kuran demdemw a lema talaw tal kademnwanakke ne.
2 *Keskye senweke ftun desike nenmo yal kuskus desy ma lyakat holholat kuran demdemw a lema talaw tal kademnwanak desy.
Ode kyoat holholat kuran desy kimlakat bonyo,
akye kduduhanke kbyetik kyosy kuran desy mo,
kola dene rahaik wakw ma kduduhanke lan a ksyalik ne.
Ma kduduhan desike kyeteta sekwe,
ma lema ryan,
de tatos ei lait ne mo kelerkok bo.
3 *Ode larihare rbetik rosy akye kduduhan desy mo ribun sir a ksyalik,
ma rorw ei lasmyerke khaha ne.
Ode Hulasokwe yal haretke ti larih desikre ma rala masunkwe ti irire,
kola dene sakdoire rakuty irire mo kisunw ksyalik ne.
4 *Keskye Hulasokwe byu eta larih desikre ma kete rahnutuk a sitw o tnyei o,
aw ktahi nekre.
De larih desikre musti mo rala iry a nyaso manosy laitare lema ralatan metrai manosy Hulasokwe ti soutare ne,
ma masunkwe kdyan sir a rmesan bo.
5 Ode Hulasokwe byu eta larih desikre dakun ma kete rtabahunw a iry desikre,
de rala sir ma isitare ksunw nini hulke enasim,
ma rkoman ksunsunuke aduk,
ma kola dene sakdokye ikuty a sir ne.
6 *Ode ti hul desim desike,
iry desikre rbuma rmaty,
keskyede lema bisa ma rmaty,
kali matmyatkye soso ti sir a nggora.
7 *Ode larih desikre tatos sir mo rola dene kuda rasosan sir ma ana ti ramdiriat ne.
Ode namke it ma kola dene sulsulw a blyawan kunkunkye,
ma kimin ti usut a khatunare.
Ode uno matat kola irire,
8 *ode hukatare narnarw kola wamfwetare hukatare,
ode nisitare mnas kola singake nisinare.
9 *Ode rhonak rabit fnutanare ma kyeteta arkatare,
ode kyoat a rnem,
desyo anitare kduduke kola ne kudanare rahait keretake ma ti ramdiriat mo kisorbubw ne.
10 Ode ikutare mnas kola dene sakdoire ikutare,
ode kbyenw ti racunke.
Ode amalkyautare kimin ti ikut desikre,
ma ral ma rala irire ma isitare ksunw nini hulke enasim.
11 Ode larih nekre raka wait raja ma hyareta sir,
ma raja neke i ne ihareta ti kuran demdemw a lema talaw tal kademnwanakke ne.
Larih nekre wait raja desike ti tel Ibranike neke rhaly anike o Abadon,
klala ti tel Yunanike rhaly anike o Apolion.†
12 Lemadendye masunw lan mamunake ne ma ksyakut ba de.
Klala masunw lan matoha masunw lan mamunake,
neke masunw lanke enaru ne,
ne ana kima ne.
Hulasokwe wasi nyaso nemke yohw a wasi strompetke
13 *Ode kyoat Hulasokwe wasi nyaso matoha nyaso enasimke,
neke nyaso nemke yohw a wasi strompetke,
desike bonyo ktwomolu telke it,
ma kbyetik kyosy a heal a sorsorut enaat mamin ti meja ratunw nat mahon a mtelaske tike.
Meja neke rala toha blyawanke,
ode kimin ti Hulasokwe wasi lulululw ne.
Ode teltel desy
14 ktyanuk ti Hulasokwe wasi nyaso nem maohw strompet desy ma kbyohe,
“Mtwunik a Hulasokwe wasi nyaso deat a radalun sir ti sah lan Efrat desy.”†
Meja ratunw nat mahon a mtelaske tike (9:13)
15 Nyaso deat desikre,
neke nyaso radalun sir kita jam o,
sew o,
hul o,
ain a ana Hulasokwe itunikke.
Dendye kyoat jam o sew o hul o ain a Hulasokwe itunikke kidi ti,
desike bonyo nyaso nem desike tyunik nyaso deat radalun desy.
Ma nyaso deat desike rma ma rtabahunw a irkye nenma serit (1/3) ti lasmyerke khaha ne.
16 Ode ktwomolu teltelke it ma klyosu ohe,
suldat masai kuda ma ti ramdiriat neke aryaritke yutke atkwe enaru sir (200.000.000).
17 Dendye ti ktela Hulasokwe isusu ma yaw desy,
desikeo katos suldat masai kuda desikre,
ma suldat desikre rhonak a rabit fnutanare ma kyeteta arkatare,
neke dum a mermer kola akye kamdirike ne,
ode dum a molmol kola hatw a permatake,
ode dum a kunkuny kola belerangke.
Ode kuda desikre usut a khatunare kola singake usuke khatuke.
Ode akye kyor kduduhanke kbyetik kyosy hahatare,
ktyabal belerangke kbyetik kyosy hahatare dakun.
18 Dendye masunw detelw a mabetik toha kuda desikre hahatare ne,
neke kmya ma ktyabahunw a irkye nenma serit (1/3) ti lasmyerke khaha ne.
Masunw detelw ne,
neke akye,
ode kduduhanke,
ode belerangke.
19 Kali kuda desikre amalkyautare kimin ti hahatare,
ode kimin ti ikutare dakun.
Kali ikut desikre kola nike,
ma kyuty a irire ma isitare ksunw.
20 *Keskyede iry salik a masunw detelw ne lema kitabahunw a sir ne,
neke lema rbuma rtunik wait tot atyat mesmesanare ba.
Ode lema ramres ti rasambayan ti ngkeskwaure ne,
ktyabal a adar a blyawan kunkuny o bokbok,
adar a soly o,
adar a hatw o,
adar a aw nekre,
biar ma adar nekre lema rmatakit,
ode lema rtomolu,
ode lema rlakut a rhe dakun.
21 Ode lema rou ma rtunik wait tot atyat ratabahunw irire ne ba.
Ode lema rou ma rtunik wait mohw o ker ranal ma rabyata irire ne ba.
Ode lema rou ma rtunik wait ktela atyat a wamfwetke inor wamwankye it de yala tot atyat ti it ne ba.
Ode lema rou ma rtunik nametke ba dakun.