Irire raora Musa wasi inaorake ma rleru Dombake Ananke
15
Ode katos nyatos lan masalsyalik ike it ti wen sra eraske,
neke nyaso manosy laitke itw a sir.
Ma nyaso deitw desike rkumak masunw deitw manosy lyaw nekre ratsam-ratsam kyakar sir.
Ode ana kolnye masunw deitw manosy lyaw nekre kidi ti,
desike ksyusu ohe ana Hulasokwe keyerake ti lasmyerke khahake ne,
ana teike desy de.
2 Ode ti wen sra eraske dakun o,
katos namke it ma kola tasike ti kele rateka ma mlin a mlin ma tatos mo kola kacake ne.
Ode tasi maola kaca neke knyely,
ma kelelnanke mermer kola dene kihora akye ne.†
Ode katos irire ma ramdiry ti tasi manely desike kserike,
ma iry desikre kyoat a ramin ti lasmyerke khaha ne a nggora,
desikeo sir ne raala ral heal mahatw mabetik toha tasike krala desy.
Kali iry desikre mumu ne sir ne lema rou ma rtoha heal mahatw desy,
ode lema rou ma rsakitil ode rou ti heal desike waltanke,
ode lema rou ma ratosa soutare,
ta lemamo simatare kyor angka kilosu heal mahatw desike anike dakun ne.
Iry desikre ramdiry ma rkumak jukare,
neke juk a Hulasokwe inal ti sirare.
3 *Ode raora Musa Hulasokwe wasi makarya desy wasi inaorake,
ma ral ma rleru Dombake Ananke,
neke kduduke kolnye:
Ebukw Hulasow a Mahareta Lan Lahuk O,
wasimw karya ne lan ode kisalsyalik a i bo!
O Ebukw O!
Muka Raja ti bangsa nekre mumu,
ode nam muala nekre mumu ne mlay,
ode lema museak mat.
4 *O Ebo,
irire ana ralan O,
ode ramtaut ti O.
Ode irire mumu ne ana rleru o rbitil Animkwe.
Kali cuma mo Oi neke mmwesan a nelnyelnyely a O bo.
Ode bangsa nekre mumu ne,
ana rma ma rsakitil ode rou ti O.
Kali ribun lan ne ratos ohe,
muukun tun,
ode nam muohut nekre mlay ksyalik.
Nyasoke itw ne rkumak taure kyakar sir ma Hulasokwe keyerake kimin ti taw desikre
5 Maktei o katos irkye it ma lyakat holholat Hulasokwe Seike,
neke Hulasokwe wasi Lasyery Nelnyely mamin ti wen sra eraske.*
6 Desikeo katos nyasoke itw ma rbetik toha Hulasokwe Sei desy,
ma rkumak masunkwe ratsam-ratsam ma kyakar sir.
Ode rhonak rabit narnarw bokbokare ma knyely malay.
Ode ral malke,
neke rala toha blyawan kunkunkye,
ma ral ma rasalkat.
7 Ode heal lan deat makoal eta kader mahareta desike,†
it a yal takwe itw,
ma yeta ratsam-ratsam ti nyaso deitw desy ma rkumak kyakar sir.
Taw a deitw desike rala toha blyawan kunkunkye.
Ode taw desikre kbyenw ti Hulasow mamorif nini nam ne keyerake.
8 *Ode ti Hulasokwe Sei desike kbyenw ti akye kduduhanke.
Ma akye kduduhan desike ksyusu Hulasokwe wasi madelahke,
ode wasi haretke.
Ode lema irkye it a bisa ma syukar ei Hulasokwe Seike krala desy,
ti kolnye nyaso deitw desike lenla rhodi masunw deitw desike ei lasmyerke khaha ne ma ktei.