Dombake Ananke yor wasi iry a iaorif sirare
14
*Ode katos a Dombake Ananke ma imdiry yor irire ti kususwan Sionke.
Iry nekre aryaritke ribunke atkwe sasam ksala hean-at a kresi enaat sir (144.000).
Ode iry desikre sir ne heit a nyaso manosy laitke icap Dombake Anan desike Anike,
ktyabal Ama-na Anike ti soutare ne.
2 Ode ktwomolu sorbubkwe it ma kyosy laitke,
neke kduduke kola dene wer maluburke kinaha ne,
ta lemamo kola ne kirutu o kitarbaka ne.
Ode sorbubw kutomolu desy,
neke kduduke kola dene iry ribunke rabrenak a wait jukare ma kidudu ne dakun.
3 Lemade iry a ribunke atw ksala hean-at a kresi enaat desikre raora inaora harharkwe,
ti wen a kader Hulasokwe ihareta tike wasi lululuw ne.
Wen neke heal lan deat mamin ti kader mahareta desy,
rtabal iry a hean ru a kresi enaat manety lulw desikre,
raktemtem mumu ne wait lululuw ne dakun.
Ode lema irkye it a iora hye inaora desy,
de lenla iry a ribunke atw ksala hean-at a kresi enaat a Hulasokwe iaorif sir desikre,
neke sir ne rmesan a raora rhe inaora desy bo.
4 Ode iry desikre nelnyelnyely a sir,
kola dene warar mur lenla rakari sir elik ne.
Ode kolnye Dombake Ananke byai kabei ta kabei,
desikeo iry desikre ratoha Ike bo.
Iry desikre sir ne Dombake Ananke lyitan eta sir,
ma yal sir toha iry mamin ti nuske ktem ne mumu,
ma yal sir a kmuna ti Hulasokwe ode ti I dakun.
5 *Ode iry desikre dakun o lema rakakmet a rhe,
ode lema rala ktela atyatke it elik.
Nyaso manosy laitke enatelw rma ma rlosu nyanoare ti iry mamin ti lasmyerke khaha ne
6 Lemade katos Hulasokwe wasi nyaso manosy laitke it ma nyem ti de nyem ma ti sra ne,
ma yety Brit Eras manal nini namke ma yabrita ti iry mamin ti lasmyerke khaha ne.
Neke yabrita ti negara-nare mumu,
ode ti bangsa-nare mumu,
ode ti klolanare mumu,
ode ti iry manal tel salno salik nekre mumu ti nuske ktem ne dakun.
7 Ode nyaso manosy lait desike yatela ma byohe,
“Musti mo mimtaut Hulasokwe ode mlyeru Anike.
Kali kyait sekwe mane,
ma Hulasokwe yukun irkye ti nuske ktem ne.
Dendye musti mo msyakitil ode myou ti I,
kali I ne iala lait o lasmyer o tasi ne,
ktyabal wer a kmatanare mumu.”
8 *Ode Hulasokwe wasi nyaso ida matoha nyaso mamuna desy,
mya ma yatela ma byohe,
“Babel a nus lan desike klyily ma kiskyui-kiskyay de!
Babel a nus lan desike klyily ma kiskyui-kiskyay de!
Kali iry mamin ti nus lan Babel desike rhury irire mumu ti nuske ktem ne,
ma rala tot atyatare kola iry Babel desikre dakun ne,
ma kola ne raenw a iry Babel desikre hinat tasy maiskye kwen makitkye ma kyala sir ne.”
9 Lemade Hulasokwe wasi nyaso ida matoha nyaso enaruke,
neke nyaso enatelkwe mya dakun,
ma yatela ma byohe,
“Iry a rasakitil o raou ti heal mahatw mabetik toha tasike krala desy,
ta raou ti heal desy waltanke ne,
dete lemamo nyatos manosy heal mahatw desike kimin ti soutare,
ta lemamo kimin ti simatare ne,
10 *iry desikre sir ne ana renw a Hulasokwe keyera mamin ti takwe kralake,
kola ne raenw tasy maiskye kwen makitkye ma lema kihora kyor werke ne.
Ode sir desike ana masunkwe kena sir,
neke ay a belerangke knya sir,
ma nyaso nelnyelire ror a Dombake Ananke ratos.
11 *Ode ay a mana iry desikre wasi kduduhanke kele roan ei srake,
ma kduduhan desy lema kimres elik,
de kyal nini nam ti kiba knaru ne.
Ma sewah o msarin ne,
masunw madan iry desikre lema kimres elik.
Nam nekre mumu ne ana kdi ti,
ti iry a masakitil ode maou ti heal mahatw mabetik toha tasike krala desy,
ode ti iry a masakitil ode maou ti heal desike waltanke,
ktyabal a iry a heal desike wasi nyatoske kimin ti soutare,
ta lemamo kimin ti simatare ne.”
12 Koldyesikemo Hulasokwe wasi iry a matohakare,†
musti mo raneti ralatare manenen ti sai ta sai bo,
ode rtoha Hulasokwe wasi haretare,
ode rtohak malkyakaw ti Yesuske,
ma kete ra-la toha wait tohtohak desy.
13 Ode ktwomolu teltelke it ma kbyetik kyosy wen sra eraske,
ma kbyohe,
“Mkwesy kolnye:
Kyala kyosy senwe,
eraske ti iry mamatire,
ti ramaty khyali ranety ral sasamke ranor ity Ebutke ne.”
Ode Hulasokwe Memeanke ktyanuk ma kbyohe,
“Mlay bain!
Iry desikre ana masunkwe lema kdyan sir de.
Ode wait tot eras raala desikre kyety eraske ti sir,
dendye ana Hulasokwe yal ksewanke ti sir,
ma bisa ma ramres ma lema rkarya mdedan de.”
Kyait sekwe ma ral kotu kisinare toha lasmyerke khaha ne
14 *Ode katos a oan bokbokke it ma irkye it a tyaklulw ti oan desy.
Iry desike yola Irkye Ananke.†
Ma iry desike syulw a sulsulw rajake ma rala toha blyawan kunkunkye,
ode kyumak sabit a mnas a mnaske.
15 *Lemade Hulasokwe wasi nyaso manosy laitke it a byetik toha Hulasokwe Seike,
ode yatela ma tyanuk ti iry a mataklulw ti oan desy ma byohe,
“Melu wasimw sabit desy ei lasmyerke khaha ne,
kali kyait sekwe de,
ma mal kotu kisinare toha lasmyerke khaha ne,
kali kotw desikre kkyuny o wahar de.”
16 Lemadendye iry mataklulw ti oan desike yelu wasi sabit desy ei lasmyerke khaha ne,
ma yal kotu kisinare toha lasmyerke khaha ne.
17 Maktei o Hulasokwe wasi nyasoke it huruk,
ma byetik toha Hulasokwe Sey mamin ti wen sra eraske,
desikeo kyumak sabit a mnas a mnas ne dakun.
18 Ode Hulasokwe wasi nyasoke it huruk,
ma byetik toha lat raeh heal ti Hulasokwe ne.
Ode nyaso desike wasi haretke ma kyumak ti akye.
Ode yatela ma tyanuk ti Hulasokwe wasi nyaso makumak sabit a mnas a mnas desy ma byohe,
“Melu wasimw sabit desy ei lasmyerke khaha ne,
ma ksyoby ohut tasy maiskye kisinare,
kali tasy maiskye kisi desikre wahar de.”
19 Lemadendye Hulasokwe wasi nyaso manosy lait desike yelu wasi sabit a mnas a mnas desy ei lasmyerke khaha ne,
ma ksyoby ohut tasy maiskye kisinare,†
ma kisi desikre yotuk ei wen rasosa tasy maiskye kisike tike.
Wen neke Hulasokwe keyerake kimin ti.
20 *Dendye rsosa a tasy maiskye kisi desikre,
ti nus lanke kserike.
Ode kyoat rasosa tasy maisy desike kisinare bonyo,
taskye kwen desike neke larke desy.
Ma lar desike lan a ksyalik,
ma knyaha kola dene sahke kinaha ne.
Sah lar neke knaruke rlaw o meterke ribunke atkwe enatelw (300.000m),
ode kademnwanke nenma meterke enaru.