Taw deitw a Hulasokwe keyerake kimin ti desikre rhodi ei lasmyerke khahake
16
Maktei o ktwomolu teltelke it mo lan a ksyalik,
neke kbyetik kyosy Hulasokwe Seike kralake,
ma ktyanuk ti nyaso deitw desikre ma kbyohe,
“Mbya,
ode it o it ne mhyodi Hulasokwe keyera mamin ti taw deitw mikumak desikre ei lasmyerke khahake.”
2 *Lemadendye nyaso mamin lulkwe hyodi taw ikumakke kisike ei lasmyerke khahake.
Desike bonyo nisusw hatw nekre kena irire mo ksunw ksyalik.
Neke kena iry a heal mahatw desike† wasi nyatoske kimin ti soutare,
ta lemamo kimin ti simatare ne,†
ode kena iry a masakitil ode maou ti heal mahatw desike waltanke dakun ne.
3 Maktei o nyaso matoha nyaso mamunake,
neke nyaso enaruke hyodi taw ikumakke kisike ei tasike khahake.
Desikeo tasi desike mermer kola mamatire laratare ti kihon busu ne,
ma khyury ma heal mamorif ti tasike krala desike rmaty mumu.
4 *Maktei o Hulasokwe wasi nyaso matoha nyaso deru mamunake,
neke nyaso enatelkwe hyodi taw a ikumakke kisike ei sahare,
ode wer a kmatanare.
Desikeo sah o wer desikre mumu ne kihihi i ma kola larke.
5 Desike bonyo ktwomolu Hulasokwe wasi nyaso mahareta wer o tasi,
ode sah o wer a kmata nekre mumu,
ma tyanuk de byohe,
“O Ebukw Hulasow O.
Senweke Oi ne mumin.
Ode mumin kyala kyosy khyehyeike de.
Ode Oi ne Nelnyely a O,
ma nam munauk ei lasmyerke khaha ne mlay de,
kali Oi ne lema mukea,
ode lema museak mat.
6 Kali iry mahatw nekre sir ne ratabahunw iry matohak ti O nekre.
Ode rtabahunw iry manety Hulasokwe wasi nyanoare dakun.
Lemadendye mala sir ma renw larke.
Ktela muala ti sir desike mlay.”
7 Ode ktwomolu teltelke it ma kbyetik kyosy lat raeh heal tike,
ma ktyanuk de kbyohe,
“Ebukw Hulasow a Mahareta Lan Lahuk O.
Muukun tun neke mlay,
kali lema mukea,
ode lema museak mat.”
8 Maktei o Hulasokwe wasi nyaso matoha nyaso detelw mamuna desikre,
neke nyaso enaatke hyodi taw ikumakke kisike ti sekwe.
Desike bonyo sekwe ranrananke manas a ksyalik,
ma irire iblutare kibusu.
9 Ode kyoat irire iblutare kibusu desy,
desikeo iry desikre rkeyer ma rsusno rsoba Hulasokwe,
ti ihareta masunkwe ma ti kidan a sir ne.
Ode biar ma koldyesy,
keskyede lema irkye it a tyunik totnyo yabi atyatare ba elik,
ode lema rbuma ralan o rleru Hulasokwe Anike dakun.
10 *Dendye Hulasokwe wasi nyaso matoha nyaso enaatke,
neke nyaso enasimke hyodi taw ikumakke kisike ti heal mahatw mabetik mamuna desike wen itaklulw ti ma ihareta ne.
Desike bonyo kelerakokke kkyahat eta wen kabei ta kabei ti iry a raou ma ratoha heal mahatw desy wasi haretare ne,
neke wen ramin tiare.
Ode rakukuty mat,
kali rkoman a ksunsunuke.
11 Ode rsusno rsoba Hulasokwe huruk ti wen sra eraske,
khyali rkoman tenatare ti kisunw ksyalik ne.
Ode biar ma koldyesy,
keskyede lema irkye it a byuma tyunik totnyo yabi atyat desikre ba dakun.
12 *Maktei bonyo,
Hulasokwe wasi nyaso matoha nyaso enasimke,
neke nyaso nemke hyodi taw ikumakke kisike ei sah lan Efratke.
Desike bonyo sah desike bakbak elik,
ma raja manosy timurare ror wait suldatare bisa ma rlakut rosy timurke ma rbai haratke,
kali sah desike bakbak de.
13 Ode katos ngkeskwaw mahatkwe enatelw ma rola ne enmosw luklukutare,
ma it a byetik toha sory alaske hahake,
ode it a byetik toha heal mahatw mabetik toha tasike kralake ne hahake,
ode idake byetik toha heal mahatw mabetik toha lasmyerke kralake ne hahake.
Ode heal mahatw mabetik toha lasmyerke krala desy,
ikakmet ma yala tenanke kola iry manety Hulasokwe wasi nyanoke ne.
14 Ode ngkeskwaw detelw mahatw desikre rala ktela masalsyalik iare.
Ode rba ti rait raja mahareta ti nuske ktem ne mumu,
ma rawahuk sir,
ma rma ma ramdiriat ror Hulasokwe.
Inamdiriat desike kdi ti,
ti sew a Hulasow Mahareta Lan Lahukke itunik ma ana iukun tun tike.
15 *Lemade Yesuske tyanuk de byohe,
“Mtyomolu!
Ana kuma ne,
neke kmwa kola manametke.
Lemade eraske ti iry a ijaga bain-bain sew a kumake,
neke kyaki-kyaki ne yala nam kubuare bo.
Ode eraske ti iry a majaga wasi rabitare ma lema kiray ne,
ma kolnye bya de mya mo lema myay,
kali lema imleh.”
16 *Lemade ngkeskwaw detelw mahatw desikre rawahuk raja desikre mumu ti wenke it,
ma ramdiriat ror Hulasokwe.
Wen desike ti tel Ibranike o kani a Harmagedon.
17 Maktei o Hulasokwe wasi nyaso manosy lyakwe,
neke nyaso itkwe hyodi taw ikumakke kisike ei laitke.
Desike bonyo teltelke it ma kbyetik kyosy kader mahareta mamin ti Hulasokwe Seike,
ma teltel ne kyatela ma ktyanuk de kbyohe,
“Nam nekre mumu ne ktei mane!”
18 *Dendye kyoat nyaso deitw desike ihodi taw ikumakke kisike ei laitke bonyo,
khyitik o ktyarbaka ne lema kimres elik,
de kisarsaur i bo.
Ode lurwakye ksunw ksyalik.
Ma kyala kyosy khyehyeike ma Hulasokwe inal irkye ti lasmyerke khaha ne,
desikeo lenla kika lurway maoly ne elik.
De lurway ida neke kmyesan a ksunw ksyalik,
ode kisalsyalik i bo.
19 *Ma khyury ma nus lan Babelke kihe i ti kbya enatelw,
ode nus o hnu ribun mamin ti lasmyerke khaha ne klyily ma kiskyui-kiskyay dakun.
Nam nekre mumu ne ksyusu ohe,
Hulasokwe lema imluak ktela atyat iry mamin ti nus lan Babelke raalanare.
Koldyesike mane iala taw a kibenw ti keyera desy,
ma kibo ti kena nus lan Babelke desy.
20 *Kyoat lurway desike kidi ti bonyo,
nusa khatu mamin ti tasike khaha ne mumu ne klyodur,
ma lema tmatakit elik,
ma ti kyal huar mamin ti lasmyerke khaha ne mumu ne kele rsuyara ma mais dakun,
ma lema kimin de.
21 *Ode us eske lan a ksyalik,
neke wasi mdedanke anakyai tatyailke hean-at (40kg),
ma kdi a kyosy laitke ma kdyan irkye ti lasmyerke khaha ne.
Lemadendye iry desikre rsusno rsoba Hulasokwe,
kali masunw us es lan desike ksunw ksyalik.