Lait harharkwe ode lasmyerke khaha harharkwe
21
*Maktei o katos lait harharkwe,
ode lasmyerke khaha harharkwe ma kimin de.
Kali lait o lasmyerke khaha mamunake kitayar de,
ode tasike o lema kimin dakun de.
2 *Ode katos nus lan nelnyelkye it,
neke nus Yerusalem harharkwe.
Nus neke Hulasokwe nyauk toha wen sra eras imin tike,
ei lasmyerke khaha harharw ne.
Nus neke eras a ksyalik,
kola ne wamfwet maala ma masake,
ti rasamur uno mata ma eras i a ksyalik ne.
3 *Desike bonyo ktwomolu teltelke it,
ma kbyetik kyosy Hulasokwe wasi kader maharetake,
ma kbyohe,
“Matos!
Kyala kyosy senwe,
Hulasokwe wasi sekye kimin ti lasmyerke khaha harharkwe,
ma kyor irkye de.
Ode iry mamin ti nus Yerusalem harharw desy mumu ne,
Hulasokwe byohe wasi iry a sir de.
Dendye Hulasokwe myorif yor iry desikre,
ma iry desikre wait Hulasow a I.
4 *Dendye Hulasokwe kyur iry desikre suatare ba toha matatare de.
Ode iry desikre ralatare ana lema ksyal ma rser de.
Ode lema kika iry mamaty de,
kali matmyatkye lema kimin dakun de.
Ode lema kika masunw madan irkye de,
kali nuske ktem ne wasi ktela mamuna manety ral matol desikre mumu ne lema kimin de.”
5 Ode Iry mataklulw a kader mahareta desike tyanuk ma byohe,
“Myatos!
Senweke kala nam nekre mumu ma harharw de.”
Maktei o Iry mataklulw a kader mahareta desike tyanuk ma yaw† de byohe,
“Mkwesy a tun kutanuk nekre,
kali tun kutanuk nekre mlay,
ode bisa ma irire rtohak,
kali ana kdi ti.”
6 *Maktei o tyanuk ma yaw huruk ma byohe,
“Senweke kala ate wasikw karya heitlulswo kuhatetak tike,
ma ktei de!
Yaw neke Alfa Yaw,
ode Yaw neke Omega Yaw.†
Kbuanke o Yaw ne Kmuna,
ode Yaw ne Kosy Lyakwe.
Dendye esei desike byatu,
desikemo ana kal werke kmata manety mormyorif manal nini namke ti i ma yenw bo,
de lema syelw namit-namit.†
7 *Lemade esei desike yala yal ngkeskwaure wait uskwe khatuke,
kali lema ila toha Yaw,
desikemo i desike ana yosy a nam eras kutanuk desikre mumu.
Ode Yaw ne ana kuka Hulasow ti i,
ode i desike anakw a i.”
8 “Keskyede iry a lema matohak ma Yaw ne,
ode iry a ma-la toha Yaw ne,
kali ramtaut iry salik ne,
ode iry a maala ktela manety inamnyekunare ne,
ode iry a matabahunw irkye ne,
ode iry a maola wamfwet o wamwany a rahury iry salik koi-kay ma rala ktela atyatare ne,
ode iry a manal wait mohw o ker ma rabyata irire ne,
ode iry a maou ti adar o irire waltatare ne,
ode iry a makakmetare dakun ne,
iry desikre mumu ne ana kotuk sir ei tasike krala akye ode belerangke kilehur tike.
Wen neke ne rabohe,
‘Matmyaty a Kla-ruake’ desy.”
Yerusalem harharkwe
9 Maktei o nyasoke it a yosy a nyaso deitw a kola rakumak taw deitw kibenw ti masunw deitw manosy lyaw desike,
neke mya ma yait yaw,
ode tyanuk ma yaw ma byohe,
“Mmwa ma tba ti kswusu wamfwet maala ma masaa kyor Dombake Anan neke ti o.”
10 *Kyoat desike Hulasokwe Memeanke kbyenw a yaw huruk,
ma kyala mait bonyo,
nyaso manosy lait desike yor yaw ei huar atat ne it,
ma ti desike syusu nus nelnyelnyely ne ma yaw.
Neke nus Yerusalem harharw a Hulasokwe inauk toha wen sra eraske ne.
11 Nus desike kbyenw ti Hulasokwe wasi madelafke,
ode knyely kola ne hatw permatake ne ma eras a ksyalik.
Ode kola ne hatw yaspiske ne,
ma knyely kola tatayalke.
12 *Ode nus desike wasi rubkye lan,
ode atat a ksyalik,
ma kyoal eta nus desy.
Ode wasi salhaha lorkye hean a kresi enaru,
ma nyaso manosy laitke hean a kresi enaru neke rajaga ti salhaha desikre.
Ode rkesy a Israel-are wait klolan a dehean a kresi enaru ne,
neke anitare ratsam-ratsam ti salhaha lory desikre sra-are.
13 Ma wasi salhaha desikre ksyara esw kmatanare,
neke salhahake enatelw ksyara timurke,
ode enatelw ksyara haratke,
ode enatelw ksyara seryabke,
ode enatelw ksyara tranke.
14 Ode ruby a nus desike wasi fanderenke,
neke wasi hatw mamunake hean a kresi enaru.
Ode ti hatw mamuna desikre,
rkesy a Dombake Ananke wasi nyaso dehean a kresi enaru desikre anitare ratsam-ratsam ti.
15 *Ode nyaso manosy lait matun a kyor yaw ne,
kyumak a lalwaw blyawan kunkunkye,
ma yal ma lyaw a nus desy wasi rubkye knaruke,
ode kahelnanke,
ktyabal a salhaha lory desikre dakun.
16 Ode kyoat nyaso desike ilaw ruby a nus desike bonyo,
nenmo the ohe nus desike kola kubuske,
kali lyaw ruby a nus desike knaruke,
ode kahelnanke,
ode katkanake desikeo mais,
neke meterke yutke enaru a ksala ribunke atkwe enaat (2.400.000m).†
17 Maktei o nyaso desike lyaw ruby desy kamalanke,
desikeo lalwakwe hean-nem (60m).†
Ode lalwaw a nyaso desike inal ma ilaw nus desike,
mais kola lalwaw a kyalamo irkye inal ma ilaw namit-namit ne dakun.
18 *Ode ruby nus desike ral a hatw a yaspiske ma ral ma raka.
Klala nam mamin ti nuske krala desike mumu ne,
ral blyawan kunkunkye kmyesan,
ma ral ma raka,
ma blyawan desike knyely malay kola tatayalke.
19 Ode ruby desike wasi fanderenke,
neke wasi hatw mamuna hean a kresi enaru desikre,
neke ral hatw permatanare ma ral ma rayabi.
Ma hatw mamuna ti fanderen desike ral toha hatw a yaspiske.
Ode hatw fanderen matoha mamunake,
neke hatw enaruke,
neke ral toha hatw a nilamke.
Ode hatw fanderen matoha hatw enaruke,
neke hatw enatelkwe,
neke ral toha hatw mirahke.
Ode hatw fanderen matoha hatw enatelkwe,
neke hatw enaatke,
neke ral toha hatw zamrudke.†
20 Ode hatw fanderen matoha hatw enaatke,
neke hatw enasimke,
neke ral toha hatw unamke.
Ode hatw fanderen matoha hatw enasimke,
neke hatw a nemke,
neke ral toha hatw a sardiske.
Ode hatw fanderen matoha hatw a nemke,
neke hatw a itkwe,
neke ral toha hatw a ratna cempakake.
Ode hatw fanderen matoha hatw a itkwe,
neke hatw a walkwe,
neke ral toha hatw a berilke.
Ode hatw fanderen matoha hatw a walkwe,
neke hatw a sikwe,
neke ral toha hatw a krisolitke.
Ode hatw fanderen matoha hatw a sikwe,
neke hatw a heanke,
neke ral toha hatw a krisopraske.
Ode hatw fanderen matoha hatw a heanke,
neke hatw a hean a kresi sasamke,
neke ral toha hatw a lazuardike.
Ode hatw fanderen manosy lyakwe,
neke hatw a hean a kresi enaruke,
neke ral toha hatw a kecubungke.†
21 Klala holholat mamin ti salhaha lory dehean a kresi enaru desikre,
ratsam-ratsam neke raka toha hilkye nisike sasam,
ma holholatke sasam,
desyo hilkye nisike sasam!†
Ode nus desike wasi salare,
neke rala toha blyawan kunkunkye,
ma knyely malay kola tatayalke ne.
22 Ode lema katos Hulasokwe Sei Nelnyely tasambayan tike,
ti nus lan desike kralake,
kali Hulasokwe,
neke ity Ebut Mahareta Lan Lahukke,
yor Dombake Ananke,
reluk Hulasokwe Sei Nelnyely desy de,
ti nus lan desy kralake.
23 *Ode sekwe yor hulke lema ramin ma rdelaf ti nus desy de,
de msarinke kmyesan ti bo,
kali Hulasokwe yor Dombake Ananke wait madelafke kdyelaf ti de.
24 *Ode bangsa-nare mumu ne ana rlakut ti Hulasokwe yor Dombake Ananke wait madelaf desy.
Ode raja mamin ti lasmyerke khaha harharw ne,
ana rety a malolitare bai nus desy,
ma rleru Hulasokwe yor Dombake Ananke.
25 *Ode salhaha lory desikre wasi holholatare lema rholat eta de,
kali lema kika sewah ti de.
26 Ode bangsa-nare ana rety wait malolire bai nus desy,
ma rleru o ralan Hulasokwe ti desy.
27 *Ode lema bisa ma rety a nam marakye it bai nus desike kralake.
Ode lema bisa ma iry a makakmet o maala tot atyat nekre rsukar ei nus desike kralake dakun.
De cuma mo iry a rakesy anitare ti Dombake Ananke wasi Kitab Mormyorifke ne,
rmesan a rsukar ei nus desike kralake bo.