22
*Maktei o,
nyaso manosy lait desike syusu sahke ma yaw.†
Sah neke wasi werke kyety mormyorif manal nini namke.
Wer desike knyely kola tatayalke.
Ode wer manety mormyorif manal nini nam desike knyaha kyosy a Hulasokwe,
yor Dombake Ananke wait kader maharetake.
2 *Ma sah desike knyaha ti sal mamin ti nus desike kditlalanke.
Ode aw manety mormyorif manal nini namke ktyuhw ti sah desike kseri wisal o wan.
Ma aw manety mormyorif manal nini nam desike hulke sasam o kisi,
hulke sasam o kisi,
ma ti ainke sasam neke kisi kdi a kla-hean a kresi enaru.
Ode aw desike ktafranare kyeluk a mohw,
ma iry manosy bangsa nekre mumu ne,
rma ma ral ktafran desikre,
ma ral ma rnoha irire wait kbainare ma eras sir.
3 *Ode ana Hulasokwe lema ihnutuk namit-namit,
ode lema ihnutuk irire ti nus desy dakun de.
Kali Hulasokwe yor Dombake Ananke wait kader maharetake,
kimin ti nus desike kralake de,
ma ti desike Hulasokwe wasi makaryaare ana rsakitil ode rou ti I.
4 Ode ti nus desike ana rmatakit elik Hulasokwe uno mata,
ode ana Hulasokwe kyesy Anike ti soutare.
5 *Ode ti nus desike lema kika metdyet de,
ma ana lema rtunw damarke ma kyela sir de.
Ode sekwe lema ryan sir dakun de.
Kali ity Ebut Hulasokwe wasi madelafke ana kryan sir,
ode kdyelaf a sir.
Ode ana rhareta kola rajake nini nam ti kiba knaru ne.
Lema soso bonyo Yesuske mya de
6 Lemade nyaso manosy lait desike tyanuk ma yaw huruk ma byohe,
“Tun mutomolu desikre ode nam muatos desikre mumu ne mlay,
dendye bisa ma mtwohak,
kali nam desikre mumu ne ana kdi ti.
Ode ity Ebut Hulasow a manal malkyakakwe ti wasi iry manety nyanoare ne,
ma ti rlosu nyano manosy Hulasokwe ti irire,
I ne iaso wasi nyaso manosy laitke ne,
ma mya ma lyosu ti wasi makaryaare ohe,
nam sai ne ana lema soso bonyo,
musti mo kidi ti ne.”
Lema soso bonyo Yesuske mya de (22:7)
7 Ode Dombake Ananke,
neke Yesuske ma tyanuk ma byohe,
“Mtyomolu!
Lema soso bonyo kmwa de.
Ode ana Hulasokwe yal eraske ti iry a itomolu ode itoha tunakw a rakesy ti kitab ne.”
8 Ode yaw neke Yohanes,
ma katos ode ktwomolu nam nekre mumu de.
Lemade kuatos ode kutomolu bonyo,
kswakitil ode kou ti nyaso manosy lait a masusu nam ribun lan ne ma yaw ne.
9 Keskyede nyaso manosy lait desike tyanuk ma yaw ma byohe,
“Kete!
Kete mswakitil ode mou ma yaw!
Kali yaw neke Hulasokwe wasi makarya yaw,
kola o a munor waimure dakun ne,
mtyabal iry manety Hulasokwe wasi nyanoare,
ode ribun matoha nam rakesy ti kitabke krala ne.
Dendye taktemtem mumu ne musti mo tsakitil ode tou ti Hulasokwe myesan bo.”
10 Maktei o nyaso desike tyanuk huruk ma yaw ma byohe,
“Kete muhunik Hulasokwe tuna mukesy ti kitabke krala ne,
kali nam desikre mumu ne wasi sekwe kyarasy de,
ma ana kdi ti mane.
11 *Dendye kolnye esei desike yala atyatke,
desikemo mlyura i ma yala atyatke ba bo.
Ode esei desike yala rakye,
desikemo mlyura i ma yala rakye ba bo.
Ode esei desike yala eraske,
desikemo mlyura i ma yala eraske ba bo.
Ode esei desike nelnyely a i bain-bain,
desikemo mlyura i ma yala tenanke ma nelnyelnyely ma ti ksyakut.”
12 *Maktei o Yesuske tyanuk ma byohe,
“Mtyomolu!
Lema soso bonyo kmwa de.
Ode kuma ne,
kety a ksewanke ma ana kal ti irire it o it ma ktyoha totnyo yabit raalanare.
13 *Yaw neke Alfa Yaw,
ode Yaw neke Omega Yaw.†
Yaw ne Kmuna,
ode Yaw ne Kosy Lyakwe.
Yaw neke Kusu Yaw,
ode Yaw neke Ktutu Yaw dakun.”
14 *Eraske ti iry a mahas wait rabitare ma nelnyelnyely ne,†
kali ana haretke kimin sir,
ma rsukar rosy a salhaha lorkye kmata mamin ti nus desy,
ma bisa ma ra akwe kisi manety mormyorif manal nini namke.
15 Keskyede iry a totat maola asure ne,
ana ramin ti mloskye bo.
Neke iry a manal wait mohw o ker ma rabyata irire ne,
ode iry a maola wamfwet o wamwany a rahury iry salik koi-kay ma rala ktela atyatare ne,
ode iry a matabahunw irire ne,
ode iry a masakitil o maou ti adarare ne,
ode iry a madakin kakmetke ma rakakmet ne,
iry nekre sir ne ana ramin ti mloskye bo.
16 *Maktei o Yesuske tyanuk huruk ma byohe,
“Yaw ne Yesus Yaw.
Ma kaso wasikw nyaso manosy laitke,
ma ti lyosu nam nekre mumu ti e,
ma ti mlyosu nam ilosu desikre ti iry matohakare.
Yaw neke raja Daud tesnwo natu Yaw.
Ode haretke kimin Yaw,
ma ktwaklulw ti raja Daud wasi kader maharetake.
Ode ftun madelaf mamin ti kseri timurke,†
neke Yaw.”
17 *Lemade Hulasokwe Memeanke ktyabal Dombake Ananke sawa,
neke rtanuk ma rbohe,
“Mmya nde!”
Ode esei desike tyomolu tun ratanuk desy,
lemamo i desike tyanuk huruk ma byohe,
“Mmya nde!”
Ode esei desike byatu,
lemamo mya.
Ode esei desike you ma mya,
desikeo i desike bisa ma yenw a wer manety mormyorif manal nini nam desike,
ma ktyoha ibuke bo!
Yohanes kyus wasi atyahy ikeskye
18 *Ode klwosu ohe,
kuhatetak de!
Neke ti iry matomolu tun kukesy ti kitab ne ohe,
kolnye esei desike tyabal tuna khatunare dum ti kitab kukesy ne,
desikeo ana Hulasokwe yal masunw mamin kitab ne,
ma yal ma tyabal ukunke,
ma yal ma yukun iry desy.
19 Ode esei desike yaditi tunke khatuke it toha kitab kukesy ne kralake,
desikeo watan ana inal akwe kisi manety mormyorif manal nini nam mamin ti nus nelnyely a kola kukesy ti kitab ne kralake ne,
ana Hulasokwe ilola toha i.
20 Lemadendye Iry malosu nam nekre mumu ma kukesy ti kitab ne,
tyanuk ma byohe,
“Ou,
lema soso bonyo kmwa de!”
Desikeo khwalas I ma kbwohe,
“Ou,
ity Ebut Yesus O,
mmwa nde.
Amin.”
21 Lemamo kuten ma eras manosy ity Ebut Yesuske kyor miktemtem mumu!
Amin.
Teike desy de.