Yohanes yatos Hulasokwe ma tyaklulw ti wasi kader ihareta tike ti wen sra eraske
4
Ktela desikre mumu ne kidi ti maktei bonyo,
yaw neke Yohanes,
ma katos holholat mamin ti wen sra eraske ma kimlakat.
Desikeo ktwomolu teltelke it ma mais kola teltel dai kutomoluke,
neke kdududuke kola dene strompetke,
ma ktyanuk ma yaw ma kbyohe,
“Mswai mai san,
kali ana kswusu ti o,
ti nam musti mo ana kidi ti ti sew a mama nekre.”
2 *Ode kyala mait bonyo Hulasokwe Memeanke kkyarya ti ralakkwe kralake,
ode katos mo kola ne Irkye it a tyaklulw ti kader maharetake ti wen sra eraske.
3 Ode Iry mataklulw kader mahareta desike,
tenanke ktem ne mumu ne knyely malay kola hatw a permatake,
neke hatw yaspiske,
ode hatw sardiske.†
Ode kekeke imdiry ma kyoal eta I,
desikeo keke desike nyely malay kola hatw a permatake,
neke hatw zamrudke.†
4 Ode ti wen a kader mahareta lan desike,
katos kader mahareta salik nekre dakun,
neke karyarike hean-ru a kresi enaat,
ma kkyoal eta kader mahareta lan desy.
Ode ti kader salik desikre,
iry a manety lulkwe hean-ru a kresi enaat a rtaklulw ti kader desikre,
ma rhonak rabit bokbokare,
ode rsulw sulsulw blyawan kunkunire,
ma kola rajake wasi sulsulkwe.
5 *Ode khyitik o ktyarbaka ma kdududuke lan a ksyalik,
neke kbyetik kyosy kader mahareta mamin kditlan desy.
Ode oborke itw kkyela ti kader desike wasi lululuw ne,
ma klyosu ohe Hulasokwe Memeanke kamalkyauke mumu ne kimin ti desy.†
6 *Ode ti kader mahareta desike wasi lulkwe,
namke it ma kola tasike.
Tasi neke mlin a mlin kola kacake ode knyely malay.
Ode ti kader mahareta desike kserinare,
neke heal lan ne enaat,
ma matatare kbyenw ti tenat a lulw o lyaw nekre,
ma rkoal eta kader desy.*
7 Ode ti heal lan deat desike,
neke it a yola singake,
ode it a yola saby a wamwankye,
ode it a uno mata ne kola irkye uno mata,
ode idake yola manu luskye,
ma nyem ti de nyem ma.
8 *Ode heal lan deat desike anitare karyarinare ranem-ranem ti tenatare.
Ode matatare kbyenw ti anit desikre keta o krala.
Ode sewah o msarin neke lema ramres ti ratelat ma rbohe,
“Nelnyely,
nelnyely,
nelnyely ti ity Ebut Hulasow Mahareta Lan Lahukke.
Senwe I neke imin,
ode ti khyehyeike imin,
ode ana imin ma ti kyal nini nam dakun.”
9 Ode heal lan deat desike sew kyaki nekre raora o rleru,
ode rsalak eraske ba ti Iry a mataklulw ti kader mahareta desy.
I ne myorif nini nam.
Ode malmata heal lan deat desike raora koldyesy,
10 desikeo iry a manety lulw dehean-ru a kresi enaat desikre,
rsakitil ode rou ti Iry mataklulw kader mahareta desy.
I ne myorif nini nam.
Ode iry manety lulw desikre raditi wait sulsulw blyawan kunkuny desikre,
ma rtutuk ti kader mahareta desy wasi lulw ne,
ode rtanuk ma rbohe,
11 “O ara Ebumy Hulasow O,
Oi neke mbwer o mtwahal
ma aramy mlyeru O,
ode aramy myalan O,
ode aramy myou ohe wasimw haretke lan.
Kali Oi ne muala nam nekre mumu ne,
ode nam nekre mumu ne kimin,
kali ktyoha wasimw mubuke.”