Nyanoke ti iry ribun matohak mamin ti nus Sardiske
3
Irkye Ananke† tyanuk huruk ma yaw ma byohe,
“Mkwesy atyahkye it,
ma mlwosu wasikw nyano ne ti nyaso manosy laitke,†
ma ti lyosu wasikw nyano ne ti iry ribun matohak ma Yaw ne,
o nus Sardiske.
Neke mkwesy kolnye,
Nyano neke kyosy a Yaw.
Yaw neke kkwumak ftunke itw.
Ode Hulasokwe Memeanke kamalkyauke mumu ne kimin a Yaw.†
Ode Yaw ne khwe karyaamire mumu de.
Ode irire rtanuk ma rbohe,
ei ne mmyorif a nggora,
keskyede kola ne mmyaty de.
2 Lemadendye mbyitil a e,
ma myalkyaw e ma myaharw wasimy mormyorifare mamak,
kali wasimy mormyorif desikre kyala ma kmyaty.
Kali kohut de,
ma ti nam miala nekre mumu neke,
lema kika nam a mlay ti Hulasokwe elik.
3 *Lemade mnyenas mamak nam mitomolu ti kyoat raajar ti e desy,
ma mtyoha.
Dendye mtyunik totnyo yabimy atyat desikre ba.
Ode mijaga e mamak,
kali kolnye lema mhye toha lbwetamy ma mtyunik totnyo yabimy atyat desikre ba,
desikeo ana kmwa mait kola dene manametke ne,
kali lema mhye o ana hekyabei o kukun a e.
4 Keskyede ti ribun matohak mamin ti nus Sardis neke,
ei neke dum a mbyer o mtyahal ma ana mlyakut myor Yaw ti wen eraske,
ode mhyonak rabit bokbokare kola Yaw,
kali lema myala ktela atyat mamin ti nuske ktem ne,
ma kyaraik wasimy rabit bokbok desikre de.
5 *Ode kolnye esei desike imorif ne,
tyoha nam a mlaire nini ti kyait teike,
ma yala yal ngkeskwaure wait uskwe khatuke,
desikemo ana hyonak rabit bokbokke,
ode lema kswos anike elik-elik toha Kitab Mormyorifke.
Ode ana kou ohe i neke wasikw iry a i,
ti Amakw yor wasi nyasoare o laitke.
6 Lemade esei desike ika molu,
desikemo musti mo tyomolu nam Hulasokwe Memeanke kitanuk ti iry ribun matohak mamin ti nus o hnu nekre.”
Nyanoke ti iry ribun matohak mamin ti nus Filadelfiake
7 *Irkye Ananke tyanuk huruk ma yaw ma byohe,
“Mkwesy atyahkye it,
ma mlwosu wasikw nyano ne ti nyaso manosy laitke,
ma ti lyosu wasikw nyano ne ti iry ribun matohak ma Yaw ne,
o nus Filadelfiake.
Neke mkwesy kolnye,
Nyano neke kyosy Iry a Nelnyelkye ode Iry Mlakye,
neke Yaw.
Ma Yaw neke kkwumak raja Daud wasi kuskuske,
ma kolnye kkwus holholatke ma kimlakat de,
desikemo irkye it a lema bisa ma hyolat eta holholat desy de.
Ode kolnye khwolat holholatke ma kkwus eta de,
desikemo irkye it a lema bisa ma lyakat holholat desy dakun de.
8 Ode khwe karyaamire mumu de.
Myatos,
klwakat holholatke ti e de,
ma ana irkye it a lema bisa ma hyolat yal holholat desy dakun de.
Ode khwe ohe wasimy tohtohakare lenla malkyakaw,
keskyede mtyoha tunakure,
ode lema mibu a mituly Anikkwe.
9 *Ode myatos,
ngkeskwaure wait uskwe khatuke wasi irire dum a rlosu tenatare o iry Yahudi sir,
keskyede lema mlay,
de rakakmet bo.
Lemade ana kala sir ma rma ma rait a e,
ode rkora lwaumy ktutunare,
ma rou ti e ohe,
Yaw neke klwobak a e.
10 Ei neke mtyoha tunakure,
ode myalkyaw ralamy kralanare ma mikita Yaw.
Kali myala koldyesy de,
dendye ana Yaw neke kaoa e,
ti ana taras a masunkwe kima ma kidan a iry mamin ti nuske ktem ne mumu ne.
11 Lemade mkyumak malkyakaw wasimy tohtohakke,
ma kete irkye it a mya ma isoruk wasimy tohtohakke toha e,
ma khyury ma lema msyukar ma mitot ksewanke† o wen sra eraske.
Kali ana lema soso bonyo kmwa de.
12 *Dendye kolnye esei desike wasi tohtohakke malkyakaw ma yala yal ngkeskwaure wait uskwe khatuke,
desikemo ana kal i ma imin ti wasikw Hulasokwe Sei Nelnyelkye kralake,
ma yeluk tul mamuna ti Sey desy,
ma imin ti Sey desy nini nam ti kiba knaru ne.
Ode ana kkwesy wasikw Hulasokwe Anike ti tenanke ma katosa i.
Ode ana kkwesy Anikw a harharkwe ti tenanke ma katosa i dakun.
Ode ana kkwesy wasikw Hulasokwe wasi nuske kanike ti tenanke dakun.
Nus neke nus Yerusalem harharw a ana maorw kyosy wen sra eras wasikw Hulasokwe imin tike.
13 Lemade esei desike ika molu,
desikemo musti mo tyomolu nam Hulasokwe Memeanke kitanuk ti iry ribun matohak mamin ti nus o hnu nekre.”
Snuratke ti iry ribun matohak mamin ti nus Laodikiake
14 Irkye Ananke tyanuk huruk ma yaw ma byohe,
“Mkwesy atyahkye it,
ma mlwosu wasikw nyano ne ti nyaso manosy laitke,
ma ti lyosu wasikw nyano ne ti iry ribun matohak ma Yaw ne,
o nus Laodikiake.
Neke mkwesy kolnye,
Nyano neke kyosy Iry Mlakye,
neke Yaw.
Yaw neke Iry Maseak a Kmuna Hulasokwe nam ialanare,
neke kyala kyosy a khyehyeike Hulasokwe syusu Yaw ma kala nam sai ta sai bo.
15 Ode Yaw neke khwe karyaamire mumu de.
Ei neke lema mibu a mituli Yaw,
keskye ei neke lema mbyuma myety ral sasamke myor Yaw dakun.
Dendye tseak e mo,
myola dene wer a lema manaske,
ode myola wer a lema mauke dakun.
De kbwuma ei neke manas e,
dete lemamo mau e.
16 Keskyede ei neke mamwamwaw e bo,
ma lema mdyakin ma mtyoha Yaw,
ode lema mibrai ma mtyoha Yaw dakun.
Kali kolnye myala koldyesy,
desikeo senweke kala ma kmwutak e ba bo.
17 Lemade ei ne mtyanuk ma mbyohe,
‘Aramy neke myait ei sra o hah,
ma ara malolimire kryesy ma kbyilak,
ode lema kika nam matol ma aramy elik.’
Keskyede lema mhye ohe,
ei ne lema myait ei sra o hah.
Ode wasimy mormyorifare ksyorw atyatke,
ode lema mika wenamy a mlay ma mimin ti,
ode matamire kbyol ma lema mhye irit-irit,
ode ralamy kralanare kimleh dakun.
18 Lemadendye kswurat a e,
ma mlyiw a wasikw blyawan kunkuny ralor ti akye kralake ma kisike knyely malay ne,
ma ei neke myal ma mika maloly.
Ode mlyiw a mohkwe toha yaw,
ma myal ma myatasa matamire ma eras,
ma adoko myatakit.
Ode mlyiw a wasikw rabit bokbokke,
ma mhyonak ma kete mimleh,
ma khyury ma kete mmyay dakun.
19 *Dendye mnyenas!
Esei desike klwobak a i,
ana ktwerik a i,
ode kswurat a i ti ktela ialanare.
Dendye musti mo mtyohak manenen ti Hulasokwe,
ode mtyunik totnyo yabimy atyat desikre ba.
20 Ode myatos!
Kumdiry ti wasimy holholat a kmatanare ma ktwoky.
Ode kolnye esei desike tyomolu telakkwe ma lyakat wasi holholatke ma Yaw,
desikemo ana kswukar ma ti kait a i,
ma kor a i de aramy miknam.
21 Ode kolnye esei desike tyoha nam kutanuk ne,
ma yala yal ngkeskwaure wait uskwe khatuke,
desikemo ana kal i ma tyaklulw yor Yaw ti kader kuhareta tike,
kola ne Yaw dakun ti kutaklulw kor Amakw,
ti wasi kader ihareta tike.
22 Lemade esei desike ika molu,
desikemo musti mo tyomolu nam Hulasokwe Memeanke kitanuk ti iry ribun matohak mamin ti nus o hnu nekre.”