Nyanoke ti iry ribun matohak mamin ti nus Efesuske
2
Lemade Irkye Ananke† tyanuk ma yaw ma byohe,
“Mkwesy atyahkye it,
ma mlwosu wasikw nyano ne ti nyaso manosy laitke,†
ma ti lyosu wasikw nyano ne ti iry ribun matohak ma Yaw ne,
o nus Efesuske!
Neke mkwesy kolnye,
Nyano neke kyosy a Yaw.
Yaw neke simakw wanke kkyumak ftun deitw ne,
ode klwakut ti wen a rasadiri damar a kwena blyawan deitw desikre tike kditlalanke.
2 Ode khwe o mindil ti ktela mialanare mumu de,
neke nam mikarya ma Yaw nekre,
neke mindil ma mkyarya,
ode e dakun o mindil ma myalkyaw ralamy kralanare manenen ma mikita Yaw.
Ode khwe ohe,
ei ne lema mdyakin ma mika lui myor iry mahature.
Ode ei neke mbyihy a iry makakmet ma rabohe wasikw nyaso sir ne,
ma bisa ma mhye ohe tun ratanuk desikre kikakmet.
3 Ode khwe ohe,
ei neke myalkyaw ralamire ti atyatke kidan e ne,
ti mitoha Yaw ne,
ode lema myema isy manggolkye elik.
4 Ode biar ma koldyesy,
keskyede namke it a ktyol ti e a nggora,
neke loblobakke.
Kali ti senwe wasimy loblobakke ma Yaw,
ode wasimy loblobakke ti waimy o hatnimamy,
lema kola wasimy a loblobak mamuna kyoat nenmo mitohak ma Yaw ne.
5 Lemadendye mnyenas wasimy loblobak miala mamuna desy,
kali senweke soso e toha loblobak mamuna eras miala desy de!
Lemade mtyunik totnyo yabimy atyat miala desikre ba mumu,
ode myulak e ma myala ktela eras a miala mamuna desikre huruk.
Kali kolnye lema myala koldyesy,
desikeo ana kmwa ma khwuty a wasimy damarke kwenake toha wen a rasadiri ti desy,
kolnye lema mtyunik totnyo yabimy atyat desikre ba.
6 Keskyede ktela eras ida neke kimin e,
neke mimnisik iry matoha Nikolaus wasi ktelanare mumu de.†
Ktela desikre ne kumnisik dakun ne.
7 *Lemade esei desike ika molu,
desikemo musti mo tyomolu nam a Hulasokwe Memeanke kitanuk ti iry ribun matohak mamin ti nus o hnu nekre.
Ode kolnye esei desike yala yal ngkeskwaure wait uskwe khatuke,
desikemo ana kal akwe kisi manety mormyorif manal nini namke ti i ma nya.
Aw neke kimin ti Hulasokwe wasi boke,
neke bo Firdauske.Ӡ
Nyanoke ti iry ribun matohak mamin ti nus Smirnake
8 *Lemade Irkye Ananke tyanuk ma yaw ma byohe,
“Mkwesy atyahkye it,
ma mlwosu wasikw nyano ne ti nyaso manosy laitke,
ma ti lyosu wasikw nyano ne ti iry ribun matohak ma Yaw ne,
o nus Smirnake.
Neke mkwesy kolnye,
Nyano neke kyosy a Yaw.
Yaw neke Kmuna ode Kosy Lyakwe,
ma kmwaty de,
ode kmworif huruk mane.
9 Ode khwe ohe ti nuske ktem ne masunkwe kdyan e,
ode lema myait ei sra o hah dakun,
klala ti wen sra eraske wasimy malolkye lan.
Ode khwe ohe,
iry a rahaly tenatare o iry a Yahudi sir neke rahmwai e,
keskye iry desikre wait mormyorifare lema kola iry Yahudi-nare wait mormyorifare,
kali raka lui ror ngkeskwaure wait uskwe khatuke.
10 Lemade kete mimtaut ti ana masunkwe kidan e ne!
Kali mlay bain o ngkeskwaure wait uskwe khatuke ana yal irire dum toha e,
ma lyuk sir ei sey metmetke kralake.
Yala koldyesy,
kali byuma icoba e.
Ode ana masunw desy kdyan e sekwe hean.
Keskye kolnye mtyoha tunakure nini mmyaty,
desikemo ana kal a mormyorif eras manal nini namke ti e.
11 Lemadendye esei desike ika molu,
desikemo musti mo tyomolu nam a Hulasokwe Memeanke kitanuk ti iry ribun matohak mamin ti nus o hnu nekre.
Ode kolnye esei desike yala yal ngkeskwaure wait uskwe khatuke,
desikemo kyait ma myaty,
desikeo lema kotuk i bai mamaty rala,
ma kete matmyaty a kla-ruake kena i elik.”*
Nyanoke ti iry ribun matohak mamin ti nus Pergamuske
12 Lemade Irkye Ananke tyanuk ma yaw ma byohe,
“Mkwesy atyahkye it,
ma mlwosu wasikw nyano ne ti nyaso manosy laitke,
ma ti lyosu wasikw nyano ne ti iry ribun matohak ma Yaw ne,
o nus Pergamuske.
Neke mkwesy kolnye,
Nyano neke kyosy a Yaw.
Ma Yaw ne wasikw soribke,
neke mnas ti serit-serit.
13 Ode khwe nus mimin tike,
neke mimin ti wen ngkeskwaure wait uskwe khatuke ihareta tike.
Biar ma koldyesy,
keskye mkyumak malkyakaw Anikkwe,
ma lema mibu a mituli Yaw ti wasimy tohtohakke,
biar ma myatos ma irire rtabahunw a Antipas,
ti ngkeskwaure wait uskwe khatuke wasi nus desy dakun.
Antipas neke kyaki-kyaki ne tyomolu ode tyoha nam kutanukare,
ode i dakun o yabrita Yaw ti irire.
14 *Keskyede lema kou wasimy a ktelanare dum,
kali ti ei ne irire dum a rtoha nam heitlulswo Bileam iajarare.
Neke ti kyoat iry a Israel-are rbetik toha Mesir,
desikeo Bileam neke syurat irkye it ma ani Balak,
ma Balak neke tyanuk a ktela salare ti iry a Israel-are,
ma khyury ma rdi ei lim o sal.
Neke yajar sir ma ra kotw irire raabar ti adarare ne,
ode yajar sir dakun ma wamfwetare ror wamwanire bisa ma it de yala tot atyat ti it.
15 Mane ti ei neke,
mlyura iry desikre ma rtoha nam atyat a Nikolaus wasi matoha iare raajarare,†
neke mais kola nam Bileam iajarare ti heitlulswo dakun.
16 Lemadendye mtyunik totnyo yabimy atyat desikre ba!
Ode kolnye lema myala koldyesy,
desikemo ana kmwa ma kait a e,
ode kal Tunakw mabetik kyosy hahakkwe,
neke mnas ti serit-serit kola soribke ne,
ma kal ma kumdiriat a kor iry a lema matunik totnyo yabit atyat desikre ba ne.
17 *Lemadendye esei desike ika molu,
desikemo musti mo tyomolu nam a Hulasokwe Memeanke kitanuk ti iry ribun matohak mamin ti nus o hnu nekre.
Ode kolnye esei desike yala yal ngkeskwaure wait uskwe khatuke,
desikemo ana kal eraske ti i,
neke kal kotw mahunik ike† ti i ma nya.
Ode ana kal eraske ti i huruk,
neke kal hatw bokbokke ma rkesy any harharkwe ti,
ma irkye it lema hye elik,
de cuma mo iry a ana manalke myesan a hye bo.”
Nyanoke ti iry ribun matohak mamin ti nus Tiatirake
18 Lemade Irkye Ananke tyanuk ma yaw ma byohe,
“Mkwesy atyahkye it,
ma mlwosu wasikw nyano ne ti nyaso manosy laitke,
ma ti lyosu wasikw nyano ne ti iry ribun matohak ma Yaw ne,
o nus Tiatirake.
Neke mkwesy kolnye,
Nyano neke kyosy a Hulasokwe Anan Yaw ne.
Yaw neke matakw khatunare kdyelah kola akye kamdirike,
ode lwaukure khyitik kola solkye.
19 Ode khwe karyaamire mumu de,
neke wasimy eraske ode wasimy tohtohakke,
ti kyal ktela miabrita Brit Eraske ne,
ode ti kyal ktela mialkyaw ralami kralanare ne dakun.
Khwe ohe wasimy karya manosy lyaw nekre eras ma kbyilak mamunanare.
20 *Keskyede koit salke ti e,
kali mlyura wamfwetke it ma yola Izebel ne,†
ma ikakmet ma byohe,
i neke Hulasokwe wasi iry manety nyano i.
Ma i neke yulak de tyalik ma yajar iry matohak ma Yaw nekre,
ma khyury ma wamfwetare ror wamwanire it de yala tot atyat ti it,
ode yajar sir dakun ma bisa ma ra kotw a irire raabar ti adarare ne.
21 Dendye kal klelanke ti wamfwet maola Izebel desy de,
ma musti mo tyunik totnyo yabi atyat desikre ba.
Keskyede lema you,
de byuma kyaki-kyaki neke yala tot atyat desikre ba bo.
Yesuske syurat ribun matohak mawahuk sir ti nus deitw ne ti propinsi Asia Kakanke (2:21)
22 Lemade myatos!
Ana kal kbaike it ti i,
ma kyala i ma isike ksunw o lan a ksyalik.
Ode iry matoha wasi ktela atyat iajar desikre,
ana kal kbai desy ti sir dakun,
ma kyala sir ma isitare ksunw o lan a ksyalik,
kolnye lema rtunik totnyo yabit atyat maola wamfwet atyat desy ialanare.
23 *Ode ana ktwabahunw wasi matoha iare,
ma iry ribun matohak ma Yaw mumu ne,
neke rhe ohe,
Yaw neke kbwihy a irire ralat a kralanare,
ode wait tohtohakare ma khwe o eras ta atyat.
Ma ana koil ti sir ma ktyoha it o it neke wait ktela atyat raalanare.
24 Kali rbohe wamfwet maola Izabel desike hye telke ma lyosu nam mahunik iare.
Keskye klwosu ti e ohe,
nam wamfwet maola Izabel desike iajar o ilosu desikre,
neke ngkeskwaure wait uskwe khatuke wasi nam iajarare desy mumu.
Keskyede ti iry matohak mamin ti Tiatira neke,
ei ne dum a lema mtyoha nam wamfwet maola Izabel desy iajarare.
Lemadendye ktwanuk ti e ohe,
ana lema ktwabal ma kal nam a mdedanare ti e ma mhyar,
25 de sai kimin a e,
desikemo mkyumak mamak nini kmwa ma kait a e bo.
26 *Lemade esei desike tyoha ma yala karya kunal ti ikarya nekre nini ktei,
ma yala yal ngkeskwaure wait uskwe khatuke,
desikemo ana kal haretke ti i,
ma hyareta bangsa-nare.
27 Ode i neke ana hyareta bangsa desikre kyor tektekan hnutanke,
ma ana yala sir ma raskyui-raskyay,
kola ioban ur akye ma kimrunu-kimrahas ne.
28 Ode haret kunal ti i desy,
mais kola haret Amaku inal ma Yaw ne.
Ode ana kal a Lamtalke ti iry desy dakun.†
29 Lemade esei desike ika molu,
desikemo musti mo tyomolu nam Hulasokwe Memeanke kitanuk ti iry ribun matohak mamin ti nus o hnu nekre.”