Hulasokwe yilik iry a Israel-are dum ma yaorif sir
11
Lemadendye waikw o hatnimakw e,
kena e aduk.
Anakyai Hulasokwe syanyeta wasi irire deny e?
Lema koldyesy!
Ktwanuk koldyesy kali Hulasokwe lema syanyeta iry Israel-are,
kali yaw neke dakun o iry Israel a yaw,
ode Abraham tesnwo natu yaw,
ma kosy a klolan Benyaminke.
2 Mlay bain!
Hulasokwe lema syanyeta wasi iry a heitlulswo iilik a sir ne.
Ode ei neke mhye nam rakesy ti Kitab Lanke khyali Elia,
ti kyoat Elia myanadu Israel-are ti Hulasokwe ma byohe,
3 “Ebukw Hulasow O,
iry nekre rtabahunw a wasimw manety nyanoare de,
ode raskyui-raskyay lat raeh heal ma raabar ti O nekre.
Ode lenla kmwesan a kmworif bo,
keskye senweke robak ma rtabahunw a yaw dakun.”*
4 *Keskyede Hulasokwe hyalas Elia ma byohe,
“Oi ne lema mmwesan,
kali kuneti irkye ribunke itw (7000) ma wasikw iry a sir dakun.
Sir neke dakun o,
lema rsakitil ode rou ti adar Baalke elik!”
5 Ma selsel ne dakun o kola ne heitlulswo ti taras a Eliake,
neke Hulasokwe yilik iry Israel-are dum ma wasi iry a sir,
ma ktyoha rala eraske bo.
6 Ode kolnye yilik sir ne kyosy rala eraske bo,
desikeo lema yilik sir ma ktyoha ktela raalanare.
Kali kolnye Hulasokwe yilik irkye ma ktyoha ktela raalanare,
desikemo Hulasokwe yilik irkye ne lema kyosy rala eraske.
7 Lemadendye ktela desike ksyusu ohe,
iry a Israel-are mumu ne lema ratot a ksala ma bisa ma mlay a sir ti Hulasokwe,
biar ma ralkyaw sir ma robak ksala desy dakun.
Keskyede cuma mo iry Israel a Hulasokwe iilikare,
sir ne rmesan a ratot a ksala desy bo.
Klala iry Israel a Hulasokwe lema iilik desikre,
yala ralatare ma ngkora,
8 kola dene rkesy ti Kitab Lanke ma kbyohe,
“Hulasokwe yala iry desikre ma kola ne ktem sir ma lema rrekan a rhe namit-namit.
Ode kyala kyosy sew desike ma ti kyait senwe Hulasokwe yala iry desikre matatare ma kola ne lema kmyatakit,
ode molutare ma kola ne lema ktyomolu,
kali Hulasokwe yala sir ma lema rrekan a rhe nam ramatakit o ratomolu desikre.”*
9 Ode raja Daud syambayan ti Hulasokwe ma byohe,
“O Hulasow O,
lemamo mala iry desikre wait a nam a kihury ma ramukmuka sir ti desy,
ma kyala mait bonyo,
nam desike kihihi i,
ma kbya masunw lan ne ma kdyan sir,
ma kyoil ti sir ma ktyoha wait ktela raalanare.
10 Ode mala iry desikre matatare ma kola ne kibol ne,
ma lema rmatakit,
ma lema rhe toha lbwetat.
Ode mala sir ma kyaki-kyaki ne rhar masunw madan sir desy nini ratdu ti wenatare bo.”*
Iry a Yahudi-nare lema rbuma rtohak ti Kristuske dendye Hulasokwe yaorif iry a lema Yahudi-nare kali rtohak ti Kristuske
11 Lemadendye ktwanuk ti e ohe,
iry a Yahudi-nare lema rtohak ti Kristuske ne,
neke kola dene ratunas ma rlily ti rabobob.
Mane ralily neke lema bisa ma rbatar elik e?
Lema koldyesy!
De khyali rala lim o sal ma lema rabuma ratohak ti Kristuske desy,
dendye Hulasokwe yal klelan desy ti iry a lema Yahudi-nare ma rtohak ti I,
ma yaorif a sir.
Ode ktela desikre kdi ti,
ma khyury ma iry a Yahudi-nare rsoi ralat ti iry a lema Yahudi-nare,
kali Hulasokwe yaorif iry a lema Yahudi-nare de.
12 Lemade waikw o hatnimakw e,
kyoat iry a Yahudi-nare rala lim o sal ma lema rbuma rtohak ti Kristuske,
dendye Hulasokwe yal eraske ti iry a lema Yahudi mamin ti nuske ktem ne o,
mausw ksyalik.
Keskye kyoat iry a Yahudi a Hulasokwe iilik nekre mumu ne rulak sir ma rtohak ti Kristuske de,
desike ne eras lan-lan ma kbyilak ma ity mumu!
13 Lemade senwe kbwuma tun ana kutanuk nekre,
ktwanuk ti iry a lema Yahudi e ne,
neke kolnye:
Kristuske syusu yaw ma kuka nyaso ti iry a lema Yahudi-nare.
Ode khyali wasikw karya Hulasokwe inal ma yaw desy,
dendye kumukmuka yaw.
14 Keskye kyosy wasikw karya desy,
dendye kbwuma kala khwury a wasikw bangsake,
neke iry Yahudi-nare ma rsoi ralat ti iry a lema Yahudi e ne,
ma bisa ma iry Yahudi-nare dum a rtohak ti Kristuske dakun,
ma Hulasokwe yaorif a sir.
15 Ode kyoat a Hulasokwe syanyeta iry a Yahudi-nare desy,
desike ne ksalake it desy,
ma Hulasokwe ika eras yor iry a lema Yahudi mamin ti nuske ktem ne.
Keskyede ana kolnye Hulasokwe you iry a Yahudi desikre huruk,
ti khyali ana kolnye ratohak ti Kristuske ne,
desikeo ktela desike kersanke kisalsyalik i bo,
kola ne iry a mamatire ramorif huruk ne!
16 Ode Abraham,
Ishak,
ode Yakub,
sir neke Hulasokwe wasi irire sir desy,
dendye tesnwo natut desikre dakun o Hulasokwe wasi iry a sir dakun.
Iry a Yahudi desikre rola ne kotkwe,
neke kolnye iry a Yahudi-nare ral kotu kisinare,
desikeo kyalamo ral tebikan ma rabar ti Hulasokwe a kmuna,
ma hina.†
Dendye kotw tebikan raabar desy kbuanke o,
Hulasokwe hina kotw desikre mumu dakun de.
Koldyesy dakun o,
iry a Yahudi-nare rola ne akwe.
Ma kolnye Hulasokwe wasi akwe kawanke,
desikeo aw desike ksananare mumu neke Hulasokwe wasi dakun.
17-18 Ode iry a Yahudi-nare dakun o,
rola ne aw a zaitun a ratan ma rapiarake.
Keskyede kyoat Hulasokwe syanyeta iry Yahudi lema matohak ti I ne,
neke sir ne rola aw a zaitunke ksananare dum,
ti ranotw ma rabisak ba ne.
Klala iry a lema Yahudi-nare,
rola ne aw a zaitun matuhw ti utanke.
Ode iry a lema Yahudi matohak e neke,
myola ne aw zaitun matuhw ti utanke ksananare dum,
ti ranotw ma ral ma ralel daku aw zaitun rapiarake ksana nenmo ranotw desy.
Koldyesikemo ana aw a zaitun kimesan kituhw ti utanke ksananare,
kiknam a kyosy aw zaitun ratan ma rapiara desy kawanke.
Kali the ohe,
lema akwe ksanake ne kiala kawanke ma malkyakaw ne,
de kawanke ne kiala ma ksananare malkyakaw ne.
Desike ne ksyusu ohe,
iry a lema Yahudi e ne,
myal eraske toha eras a heitlulswo Hulasokwe itetak ma inal ti iry a Yahudi-nare ne.
Lemadendye ei neke kete mihmway iry a Yahudi Hulasokwe isanyeta sir ne,
neke iry maola ne aw ksana ranotw ma rabisak ba nekre.
Kolnye ei ne mbyuma mbyitil tenamire ma atat,
desikemo mnyenas ohe,
ei neke myola aw ksana ralel daku akwe ktenanke ne bo.
19 Keskye ti iry a lema Yahudi e nekre,
anakyai dum a mbyitil tenamire ma mtyanuk ma mbyohe,
“Keskye iry a Yahudi maola aw ksana ranotw ma rabisak ba nekre,
Hulasokwe byisak e ba,
mamode aramy neke Hulasokwe yal aramy ma aramy myeluk a e ma Hulasokwe wasi iry aramy,
kola ne aw ksana salik ranal ma ralel ti akwe ktenanke ne!”
20 Nam mitanuk desikre mlay.
Keskye mnyenas!
Hulasokwe byisak iry a Yahudi desikre ba de,
kali sir neke lema rtohak ti Kristuske.
Klala Hulasokwe yal iry a lema Yahudi e ne,
ma wasi iry a e de,
kali mtyohak ti Kristuske.
Dendye kete mbyitil tenamire ma atat,
de mijaga wasimy mormyorifare ma kete mila toha wasimy tohtohakke ti Kristuske ne.
21 Kali kolnye Hulasokwe lema itartaur ralake ma yotuk iry a Yahudi lema matohak desikre ba,
desike ne rola aw zaitun a rapiarake ksana mamin ti ktenanke kyala kyosy khyehyeike,
ma ranotw ode rabisak ba ne.
Dendye ei ne ana Hulasokwe yotuk e ba dakun,
kolnye lema mtyohak ti Kristuske.
22 Lemadendye bisa ma tatos Hulasokwe rala eras inal ti irire ne,
ode tatos mo kyeyer ma yukun irire dakun.
Kali syusu keyerake ti iry a Yahudi lema matohak ti Kristuske ne de,
klala Hulasokwe syusu rala eraske ti iry a lema Yahudi e ne dakun,
kolnye mimorif ne mo myety ral sasamke myor Kristuske,
ti kiba knaru ne.
Dete kolnye lema mbyuma mtyohak ti Kristuske de,
desikeo ana Hulasokwe yotuk e ba dakun,
kola dene aw ksananare ti ranotw ma rabisak ba ne.
23 Keskye kolnye iry a Yahudi desikre rtunik wait lim o sal ba,
ma rulak sir ma rtohak ti Kristuske,
desikeo ana Hulasokwe yal sir ma wasi iry a sir huruk,
kola dene aw ksananare ti ranotw ma rabisak ba ne,
maktei o ral huruk ma rlel ti ktenanke huruk ne.
Hulasokwe bisa ma yala koldyesy kali haretke kimin I,
ma yal sir huruk ei wenatke.
24 Lemadendye iry a lema Yahudi e ne,
myola dene aw zaitun matuhw ti utanke,
ode iry a Yahudi matohakare rola dene aw zaitun rapiarake.
Kali kolnye aw zaitun matuhw ti utanke,
ti ranotw ksananare ma ranal ma ralel ti aw zaitun ratan ma rapiarake ktenanke ne,
neke ksunw ma kbyilak ti kolnye ral aw zaitun rapiarake ksana ranotw ma rabisak ba ne,
ma ranal huruk ma ralel ti ktenanke huruk ne.
Koldyesy dakun o,
kolnye Hulasokwe yal iry a lema Yahudi e ne ma wasi iry a e,
desikeo kbyilak ti desy dakun o,
ana yal iry a Yahudi matohakare dakun ma wasi iry a sir dakun.
Hulasokwe syusu rala eraske ti irire mumu
25 Waikw o hatnimakw iry a lema Yahudi e,
kbwuma klwosu Hulasokwe wasi rekryeky a lulswo kihunik ike ti e ma mhye,
ma kete mbyitil tenamire ma atat,
kali mryekan o Hulasokwe yilik e a mmyesan bo.
Neke nam mahunik i ma irire lema rahe elik ne,
neke kolnye:
Senweke iry a Yahudi-nare dum a ralatare ngkora,
ma lema rbuma rtohak ti Kristuske.
Keskye wait a ktela desike ana klyakut koldyesy nini,
sew a iry a lema Yahudi Hulasokwe iilik nekre mumu ne rtohak ti Kristuske.
26 Ode kyoat sew desike kdi ti,
desikeo Hulasokwe ana yaorif iry a Israel-are mumu.
Kola ne rakesy ti Kitab Lanke de ma kbyohe,
“Iry a maorif irkye,
neke ana yosy a Sion† ma mya.
I neke ana syos a Yakub tesnwo natu nekre wait lim o sal nekre ba.”*
27 Kola dene Hulasokwe tyanuk ma byohe,
“Kuhatetak kor sir ohe,
ana kswos a wait lim o sal nekre ba.”*
28 Ode khyali iry a Yahudi-nare lema rou ma ral Brit Eraske,
lemade Hulasokwe syorw a sir.
Ode kyosy ktela desy,
mane kyety eraske ti iry a lema Yahudi e ne.
Ode biar ma koldyesy,
keskyede heitlulswo Hulasokwe yilik iry Yahudi-nare de,
dendye lyobak iry a Yahudi-nare a nggora,
kali nyenas wasi inahatetak ihatetak inor ebnwo matrumat desy.
29 Kali kolnye Hulasokwe yilik irire,
ode yal eraske ti sir de,
desike o lema yal a yolik nam iala desikre it toha sir elik.
30 Lulswo iry a lema Yahudi e neke lema mtyomolu ode lema mtyoha Hulasokwe.
Keskyede selsel neke Hulasokwe syusu rala eraske ti e,
kali iry a Yahudi-nare lema rtomolu ode lema rtoha Hulasokwe de.
31 Keskye ana kyait sekwe bonyo,
Hulasokwe ana syusu rala eraske ti sir dakun,
kola dene isusu rala eraske ti iry a lema Yahudi e ne,
biar ma selsel ne iry Yahudi-nare lema rtomolu ode lema rtoha Hulasokwe dakun.
32 Kali Hulasokwe lyura irire mumu ne ma ralatare ngkora,
mane lema ratomolu ode lema ratoha I ne.
Ktela desike kyety eta sir,
kola ne iry mamin ti sey metmetke kralake ne.
Hulasokwe yala koldyesy,
mamode bisa ma syusu rala eraske ti irire mumu.
Tleru Hulasokwe Anike khyali isusu wasi loblobakke ma ity ne!
33 *Hulasokwe wasi eraske lan ma kbyilak de kbyilak!
Ode I neke hye sai ta sai bo,
ode wasi hehei lulw o lyakwe ti itilik mlakye o salke ne kbya demdemw ksyalik!
Lema irkye it a bisa ma hye nam iohutare kbuanare,
ode lema irkye it a bisa ma hye,
ti kolkyabei ma Hulasokwe tyenuk wasi karyaare mumu ne.
34 *Kola dene rkesy ti Kitab Lanke de ma kbyohe,
“Ese bisa ma hye nam ity Ebut Hulasokwe irekanare de?
Ode ese bisa ma syurat ity Ebut Hulasokwe de?
35 Ode ese bisa ma yal nam dum ti ity Ebutke,
mamode ana ity Ebutke musti mo yeluk ti iry desy de?”
36 *Kali Hulasokwe I ne iala nam nekre mumu ne,
ode I ne tyenuk nam desikre mumu ne ma kimin.
Ode yala koldyesy,
mamode nam iala nekre mumu ne tleru I.
Lemadendye mmya ma talan I,
ode tleru Anike nini nam!
Amin.