10
Waikw o hatnimakw matohak e!
Ralakkwe krala ne kdyakin a ksyalik ma Hulasokwe yaorif wasikw irire,
neke iry a Yahudi-nare,
dendye kal ralakkwe kralake ma kswambayan ti sir.
2 Kali yaw neke khwe ohe nam kutanuk ne mlay,
neke:
Wasikw bangsake randil ma rtoha Hulasokwe,
keskye sir neke lema rhe bain-bain ohe,
ratoha Hulasokwe ne ksalake kolkyabei.
3 Ode sir dakun o lema rbuma rhe ksala Hulasokwe iala irire ma mlay a sir ti I ne,
de rbuma rtoha wait ksala ratoha tnyetak Musake ne,
kali rrekan o ksala desike ne kiala sir ma mlay a sir ti Hulasokwe ne.
Dendye ktela desike ne kihury ma lema rou Hulasokwe wasi ksala kiala sir ma mlay a sir ti I ne.
4 Keskye the ohe irire lema bisa ma mlay a sir ti Hulasokwe,
kolnye rtoha tnyetak Musake.
Kali Kristuske mya de,
ma yal ksala harharkwe ti irkye de.
Ode khyali ksala harharw desy,
mane Hulasokwe yala irire mumu ma mlay a sir ti I,
kolnye rtohak ti Kristuske.
Hulasokwe yaorif esei ta esei ti ratohak ti Kristuske ne
5 Ode Musa kyesy a ksala irkye mlay a i ti Hulasokwe ne,
ti khyali ratoha tnyetak Musake ne ohe,
“Esei desike imorif ne tyoha tnyetak Musake,
desikeo musti mo yal wasi mormyorifke ti tnyetak desy,
ode musti mo tyoha mumu,
de kete byilak sasam dakun.”*
6 Klala ti ksala irkye mlay a i ti Hulasokwe,
ti khyali ratohak ti Kristuske ne,
neke rkesy ti Kitab Lanke de ma kbyohe,
“Kete mtyanuk ti ralamy kralanare ma myena de mbyohe,
‘Esei ana syai bai wen sra eras Hulasokwe imin tike de?’
”* Neke kbuanke o,
lema tperlu ma taten Kristuske ma yorw ei lasmyerke khaha ne ma yaorif ity,
kali kyalake Kristuske myai nuske ktem ne de.
7 Dete lemamo kete mtyanuk ti ralamy kralanare ma myena de mbyohe,
“Esei ana yorw ei wen mamatire ramin tike de?”
Neke kbuanke o,
lema tperlu ma taten Kristuske ma byetik toha wen mamatire ramin tike,
ma syai ei lasmyerke khaha ne,
kali kyalake Hulasokwe yaorif I toha mamatire de.
8 Keskye rkesy ti Kitab Lanke de ma kbyohe,
“Hulasokwe tunanare kyait a e de,
ma kimin ti ralamy kralanare de,
ma bisa ma mihes Hulasokwe tuna desikre.”*
Nam Hulasokwe itanuk desikre,
ne aramy miabrita ne,
ma irire musti mo rtohak ti Kristuske.
9 Kali kolnye mtyanuk ti irire ode myou ohe,
“Yesus ne wasikw Amam Lan a I,”
ode kolnye mtyohak ti ralamy kralanare ohe,
Hulasokwe yala Yesuske ma myorif huruk toha mamatire de,
desikeo ana Hulasokwe yaorif a e.
10 Kali esei desike tyohak ti Yesuske kyor ralake kralake ode tyanuk ti irire ohe,
“Yesus ne wasikw Amam Lan a I,”
desikeo i desike Hulasokwe yaorif a i,
ode byohe mlay a i.
11 Kali rkesy ti Kitab Lanke ti khyali Kristuske ma kbyohe,
“Esei desike tyohak ti I,
ana lema ralake kakan de.”*
12 Nam kutanuk desikre mumu ne mlay ma kdi ti,
kali Hulasokwe lema ikea ohe,
iry matohak ti Kristuske neke iry Yahudi sir,
ta iry a lema Yahudi sir,
kali ti Hulasokwe ne,
iry matohak ti Kristuske,
sir ne mumu ne mais sir bo.
Kali ity Ebut neke cuma mo sasasam a I bo,
ode Amam Lan I ti iry matohak ity ne mumu.
Ode I neke yal eras mauskwe,
ti iry a raten toha I ma iaorif sir mumu ne.
13 Kali rkesy ti Kitab Lanke ma kbyohe,
“Esei desike iten ma ity Ebutke yaorif a i,
desikeo ana ity Ebutke yaorif a i.”*
14 Keskyede kolkyabei ma irire bisa ma raten ity Ebutke ma yaorif a sir,
kolnye lema rtohak ti I de?
Ode kolkyabei dakun ma bisa ma rtohak ti ity Ebutke,
kolnye lenla rtomolu Brit Eraske ti khyali I ne de?
Ode kolkyabei ma bisa ma rtomolu Brit Eraske ti khyali I,
kolnye lema kika iry maabrita Brit Eras desy ti sir de?
15 Ode kolkyabei huruk ma irire bisa ma rabrita Brit Eraske,
kolnye Hulasokwe lema iaso sir ne de?
Dendye kola ne rkesy ti Kitab Lanke ma kbyohe,
“Eras a ksyalik kolnye kika iry a rama ma rabrita Brit Eraske ne!”*
Ktela iry Israel-are lema rabuma ratoha Brit Eraske ne
16 Keskyede lema irire mumu ne rbuma rtomolu ode rtoha Brit Eras desy.
Kola ne Yesaya iry manety Hulasokwe wasi nyanoke tyanuk ma byohe,
“O ara Ebumy Hulasow O,
nenma irire mumu ne lema rtohak ti Brit Eras aramy miabrita ne.”*
17 Dendye irire bisa ma rtohak ti Kristuske,
kolnye iry desikre rtomolu Brit Eraske.
Ode irire bisa ma rtomolu Brit Eras a kilosu Kristuske ne,
kolnye irire rabrita Brit Eras desy ti sir.
18 Keskyede kena e ohe,
iry a Yahudi nekre rtomolu Brit Eras ne deny ta lenla de?
Ou,
rtomolu de!
Kali rkesy ti Kitab Lanke ma kbyohe,
“Rabrita britke ti nuske ktem ne mumu de.
Ode tun ratanukare kimelir ti kabei ta kabei bo,
ti lasmyerke khaha ne.”*
19 Keskyede kena e huruk ohe,
iry a Israel-are rhe Brit Eras desy kbuanke deny ta lenla de?
Ou,
rhe de!
Keskye rabrai ma rtoha,
biar ma iry a lema Israel-are dakun o rhe brit desy de.
Ode the ohe nam desikre mlay,
kali heitlulswo Musa kyesy Hulasokwe tuna nekre a kmuna de,
ma kbyohe,
“Ana kala iry a Israel e ne ma msyoi ralamy,
kali kal eraske ti iry a lema Israel-are.
Ode ana kala e ma mika keyer,
kali kal eraske ti iry salik,
neke iry a mirekan sir o lema rahe Yaw ne.”*
20 Ode Yesaya ires ma kyesy a Hulasokwe tunanare ti khyali iry a lema Israel-are dakun,
ma kbyohe,
“Iry a lema maobak Yaw nekre,
sir neke rait Yaw de.
Ode iry a lema raten ma rahe Yaw nekre,
kswusu tenakkwe ti sir dakun de.”*
21 Keskyede khyali bangsa Israelke,
dendye Yesaya kyesy a Hulasokwe tunanare huruk ma kbyohe,
“Sew kyaki nekre khwela simakw ma kukita sir ma rma ma rait Yaw,
keskyede sir neke lema rtomolu ode lema rtoha Yaw,
de usut a khatu malkyakaw kmati bo.”*