Paulus ralake kitol kali iry Yahudi-nare lema rbuma rtohak ti Yesuske
9
Waikw o hatnimakw e!
Nam ana kutanuk ne mlay,
de lema kukakmet,
kali kety ral sasamke kor Kristuske de,
ode ralakkwe kralake ktyanuk ohe,
lema kukakmet,
kali Hulasokwe Memeanke kkyarya ti ralakkwe ma khwe ohe nam kutanuk ne mlay.
2 Lemade ktwanuk ti e ohe,
ralakkwe kitol a ksyalik,
ode sewah o msarin neke masunkwe kdyan yaw,
ma kyala ralakkwe kralake ma kisalsal,
3 khyali wasikw bangsake,
neke waikw o hatnimakw Yahudi a lema rabuma ratohak ti Kristuske ne.
Dendye kuten ma lemamo Hulasokwe yukun yaw ma kyeluk sir,
ma yala yaw ma soso yaw toha Kristuske,
kolnye ktela desy bisa ma ksyaluk sir ma rtohak ti Kristuske.
4 Kali sir desike iry Israel a sir.
Ode Hulasokwe lyeik sir ma anan a sir de,
ode syusu wasi madelafke ti sir de.
Ode ihatetak yor sir kdi a klai ne de,
ode yal tnyetak Musake ti sir de.
Ode syusu ksala kabei ne ti sir de,
ti rasambayan ode raou ti I ne,
ode yal wasi hatetakare ribun ti sir dakun de.*
5 Ode sir desike Abraham,
Ishak,
ode Yakub tesnwo natut sir.
Ode kbyilak ti desy dakun o,
Iry a Hulasokwe isusu ma ika Raja ode iaorif irkye ne dakun o iry Israel a I,
neke Yesus Kristuske,
ti kyoat radur hahak I kola irkye ne.
I neke Hulasow a I,
ma hyareta nam mamin ti lait o lasmyerke khaha ne mumu,
dendye byer o tyahal ma tleru I nini nam.
Amin.
Hulasokwe yilik irire ma ktyoha ibuke ma wasi iry a sir
6 Biar ma iry Yahudi-nare ribun a lema rbuma rtohak ti Kristuske,
keskyede kete mryekan o,
Hulasokwe hyasana wasi hatetak a ihatetak inor iry a Israel-are ne.
Kali Hulasokwe lema yilik iry Israel-are mumu ma wasi iry a sir,
de cuma mo yilik dum bo.
7 Ode koldyesy dakun o,
Hulasokwe lema yilik Abraham tesnwo natu desikre mumu ne,
ma yaki sir ti Abraham ananare.
De cuma mo yilik Ishak yor tesnwo natu bo,
kali Hulasokwe ihatetak ti Abraham de,
ma byohe,
“Cuma mo Ishak tesnwo natu ne,
neke kaki sir ti anamure.”*
8 Neke kbuanke o,
Hulasokwe lema yilik Abraham tesnwo natunare mumu ma anan a sir,
de yilik naman a radur i ma ktyoha Hulasokwe wasi hatetakke,
neke Hulasokwe yohut ohe,
ananare sir desy.
9 Kali Hulasokwe ihatetak ti Abraham ma byohe,
“Ana ain mama ne kulak Yaw,
kyoat desy dakun o Sara idur hah de ma ananke wamwany a i.”*
10 Ode lema desike kmyesan bo,
de bisa ma tseak ti Ribka dakun.
Ribka neke yor tenanke,
ma idur hah bonyo ananke lakdu,
ma deruke wamwany sir,
neke Esau yor Yakub,
ma amat sasamke,
neke ani a Ishak ma ity ebnwo matrumat i.
11-12 Keskye kyoat Ribka lenla idur hahak naman deru desy,
desikeo Hulasokwe tyanuk ti Ribka ma byohe,
“Anamw auskwe ana ika at ti anamw amurkye.”
Dendye biar ma naman deru desike lenla radur ti sir ma lenla rala ktela eras o atyat,
keskye Hulasokwe yohut ma yilik naman ibuke de.
Hulasokwe yala koldyesy ma ksyusu ohe,
kolnye yilik irkye neke lema yatos ti ktela raalanare,
de yilik sir ma ktyoha wasi rekryeky desy bo.*
13 Kola dene rkesy ti Kitab Lanke ma Hulasokwe byohe,
“Yaw ne kswusu ralakw eraske ti Yakub,
klala Esau lema.”*†
14 Kolnye Hulasokwe yilik irire koldyesy,
desikemo ana ttanuk kolkya?
Hulasokwe ialake lema mlay e?
Keskye lema koldyesy!
15 Kali Hulasokwe tyanuk ti Musa de,
ma byohe,
“Kolnye kbwuma kswusu wasikw loblobakke ti esei desy,
desikemo kswusu ti i bo.
Ode kolnye kbwuma kswusu ralakw eraske ti esei desy,
desikemo kswusu ti i bo.”*
16 Lemadendye Hulasokwe iilik irkye ne,
neke lema ktyoha irkye ibuke,
ta lema ktyoha irkye wasi ktela ialanare,
de ktyoha Hulasokwe rala eraske bo.
17 Kali rkesy ti Kitab Lanke kralake de,
neke Hulasokwe tyanuk ti Firaun raja Mesirke ma byohe,
“Kbwitil o ma muka raja,
mamode kswusu wasikw haret malkyakakwe ti oa mor irire mumu ti Mesir,
ma mhye ohe kala kal o,
ma ana Anikkwe kimelir ti nuske ktem ne mumu,
ma irire rleru Anikkwe.”*
18 Dendye kolnye Hulasokwe byuma syusu rala eraske ti esei desy,
desikemo syusu ti i bo.
Ode kolnye byuma yala irire ma ralatare ngkora ma ktyoha ibuke,
desikemo yala bo.
19 Dendye kolnye Hulasokwe yala koldyesy,
desikeo anakyai ti ei neke,
dum a mtyanuk ma mbyohe,
“Koldyesikemo kyanmwane Hulasokwe yukun irkye,
khyali ralake ngkora ma lema byuma itomolu Hulasokwe ne de?
Ode esei ne malkyakaw i ma bya etno eta Hulasokwe ti nam ibuare ne de?”
20 Keskye lema bisa ma mtyanuk koldyesy.
Ei neke iry a e bo.
Ode irkye lema bisa ma tyanuk ti Hulasokwe ohe,
Hulasokwe sal a I.
Kola dene lkusy a irire raala toha rayahkwe ne,
ma lkusy desike lema bisa ma kyena iry maala lkusy desike ma kbyohe,
“Kyanmwane mala yaw kolnye ne de?”*
21 Iry a maala lkuskye,
bisa ma yala sai ta sai toha rayahkwe,
ma ktyoha ibuke.
Ode kyosy a rayahkwe khatu sasam desy,
bisa ma yal ma yala lkuskye enaru,
neke yala it ma eras a ksyalik,
ma kyalamo rpake ti kalkalare,
klala yala it dakun ma knyor bo,
ma kyalamo rpake ti sew kyaki nekre.
22 Koldyesy dakun ti nam Hulasokwe iala ma ktyoha ibuare ne.
Hulasokwe byuma syusu keyerake ti iry maala lim o sal nekre,
ode byuma syusu ohe I neke haretke kimin a I ma yukun iry desikre.
Keskyede Hulasow neke lema samlurw o syusu keyerake ti iry mahury ma ikeyer desy,
de ineti ralake,
ma ikita ma ana syusu keyera desy,
ti kyoat yukun iry a iohut ma ana rabai mamaty rala desikre.
23 Ode Hulasokwe ana yukun iry maoly desikre koldyesy,
ma syusu ti iry a ilobakare ma rhe ohe,
wasi eraske ti iry a ilobakare ne lan a ksyalik ode lema kimres elik.
Iry a ilobak desikre heitlulswo yilik sir de,
ma ana rmorif ti wen sra eraske,
ma ror I ti wasi madelafke ti kiba knaru ne.
24 Ode iry a Hulasokwe iabuk sir ma ror I ti wasi madelafke ti kiba knaru ne,
neke ity ne.
Ode iry a iabuk desikre,
neke lema iry Yahudi-nare rmesan bo,
de dum a rosy iry a lema Yahudi-nare dakun.
25 Ktela Hulasokwe iala desike kola ne Hulasokwe itanuk ti Hosea iry manety Hulasokwe wasi nyanoke,
ma ikesy ti wasi kitabke khyali iry a lema Yahudi-nare ne ma kbyohe,
“Iry a lenla wasikw iry a sir ne,
ana khwaly a sir o,
‘Wasikw iry a sir.’
Ode iry a lema kususu wasikw loblobakke ti sir ne,
ana kswusu wasikw loblobakke ti sir dakun.”*
26 “Ode ti wen kabei bo,
ma kola Hulasokwe tyanuk ti iry mamin tiare ma byohe,
‘Ei neke lema wasikw iry a e,’
neke ti wen desikre dakun o,
ana Hulasokwe tyanuk ti iry desikre huruk ma byohe,
‘Ei neke,
Hulasow mamorif nini nam a Yaw ne,
anakw a e.’ ”*
27 Ode Yesaya iry manety Hulasokwe wasi nyanoke yatela ti khyali iry a Israel-are ohe,
“Biar ma iry a Israel-are ribun sir ma rola ne laran mamin ti namwatake,
keskyede ana Hulasokwe cuma mo yaorif dum bo.
28 Kali ity Ebut Hulasokwe yohut elik ohe,
ana lema soso bonyo ana yukun tun ti irire mumu ti nuske ktem ne,
ma ktyoha nam a mlay iohutke.”*
29 Ode kola dene Yesaya tyanuk huruk ma byohe,
“Kolnye ity Ebut Hulasow a Mahareta Lan Lahukke,
lema lyura ity tesnwo natut nekre dum ma rmorif,
desikemo iry a Yahudi ity neke ity teit dakun,
kola ne iry mamin ti Sodom o Gomorake,
ti kyoat heitlulswo Hulasokwe syoly o syarah sir ba ma teit ne.”*
Iry Yahudi-nare lema ratot ksala ma mlay a sir ti Hulasokwe, klala iry a lema Yahudi-nare ratot ksala ma mlay a sir ti Hulasokwe
30 Lemadendye waikw o hatnimakw e,
nam kutanuk desy kbuanke kolnye:
Biar ma iry a lema Yahudi-nare lema ralkyaw sir ma robak a ksala ma mlay a sir ti Hulasokwe,
keskyede ratot ksala desy.
Ksala desike ne Hulasokwe byohe mlay a sir,
kali rtohak ti Kristuske.
31 Klala biar ma iry a Yahudi-nare ralkyaw sir ma robak a ksala ti tnyetak Musake ma bisa ma kyala sir ma mlay a sir ti Hulasokwe,
keskyede lema ratot a ksala ti tnyetak desy.
32 Ode kyanmwane lema ratot a ksala ma bisa ma kiala sir ma mlay a sir ti Hulasokwe ne de?
Kali lema rtohak ti Kristuske,
de rtohak ti ktela ratoha tnyetak Musake ne.
Kali rrekan o wait ktela desikre bisa ma kyala sir ma mlay a sir ti Hulasokwe.
Dendye rola dene iry a matunas hatkwe ma ilily ne,
kali lema rbuma rtohak ti Kristuske.
33 Kola ne rkesy Hulasokwe tunanare ti Kitab Lanke ti khyali hatw desy ma kbyohe,
“Mtyomolu mamak!
Ktwutuk Rajake ti Sion,†
neke yola dene hatw a kihury ma irire ratunas ne.
Keskyede esei desike tyohak ti Hatw desy,
desikeo ana lema ralake kakan de.”*