Zaŋ Batiisi sʋʋ naasɛ
14
1 Ɛ́ tɛ́ŋ mɛ́, Galiile* kuóro Erodi* nɛ́ Zeezi wɩ́ɛ́.
2 Ɛ́ nɛ́ ʋ bʋ́lʋ́ tʋtʋnna rɩ́ bʋlɛ́:
«Báálɔ né wɩ́ɛ́ ɓa háá bʋlɛ́, Zaŋ Batiisi ní.
Ʋ bɩ́rɔ́ isi sʋʋ mɛ́ nɛ́, ɛ́ nɛ́ tɛ ʋ wólli wɩ́nyáŋsɛ aá a.»
3,4 Ná Zaŋ Batiisi sʋʋ wɩ́ɛ́:
Erodi fa lɔ́ʋ́ máálá Filipi háálɔ Erodiyadɛ* a ja.
Ɛ́ nɛ́ Zaŋ bʋl pá Erodi bʋlɛ́:
«Ŋmɛ́nɔ toó rɩ́ɩ́ lɛ́ɩ́ máálá háálɔ ja.»
Ɛ́ nɛ́ Erodi a ɓa ka Zaŋ vɔwɛ a kaa mʋ́ hé bɩnajaa mɛ́.
5 Erodi sɩɛ́ faá ja Zaŋ ɓʋ́ɩ́, káá fá Zuwifiwa*; bee wɩ́ɛ́ ɓa sɛ́ rɩ́ Zaŋ ká Wɩɩsɛ wɩ́laabʋ́llʋ́ rɛ́.
6 Erodi bɩŋlʋlɩ́ cana kal díí, Erodiyadɛ tolwie sɩɛ́ gɔ gʋɔla caŋdííre sɩ́ɛ́, Erodi sɩɛrʋ tɔrɛ.
7 Ɛ́ nɛ́ Erodi bʋl pá tolwie ná bʋlɛ́:
«Ŋ ŋmɩ́ɛ́sɔ́, ɩ́ háá ja omo ná wuu, ŋ sɩ́ pɛ́ɩ́.»
8 Ɛ́ nɛ́ tolwie ná maá yíkú ʋ bʋlɛ́:
«Ŋŋ́ ja Zaŋ Batiisi nyúú ní pɛrɛ́tɛ́ sɩɛrʋ rɛɛ́wa.»
9 Kuóro Erodi sɩɛrʋ wuu zɔkɛ, ká ʋ tɩ́ŋʋ́ há ŋmɩ́ɛ́sɛ́ ná wɩ́ɛ́, a fá caŋdííre ná sɩ́ɩ́, ká bʋlɛ́ tolwie ná háá ja omo ná, rɩ́wɔ́ pɔ́ʋ́.
10 Ʋ sɩɛ́ tʋŋ nɛrɔ, ʋ mʋ́ coki Zaŋ Batiisi nyúú bɩnajaa ná mɛ́,
11 a pii hé pɛrɛ́tɛ́ mɛ́, a kaa ko pá tolwie ná, ʋ laa kaa mʋ́ʋ́ maá rɩ́.
12 Zaŋ Batiisi karmɩbɛlɛ nɛ, a ko púú lɛlɔ ná hu, ká mʋ́ bʋl wɩ́ɩ́ ná há tʋ́mɛ́ pá Zeezi.
Zeezi pá nɩɛ ɓɩkana ɓɩdííle
13 Zeezi há nɛ́ Zaŋ Batiisi wɩ́ɛ́ ɛ́, ʋ ísó a zʋ nyiidaborwie, aá mʋ́ dɩhɩ̃́ ná nɛ́ŋ wuu há to ráŋ, ʋ dʋŋɔ.
Amá nɩkana ná kɩ́ɛ́lɔ́ zɩŋ, a lɛ́ tɔ́nɛ va naasɛ, a cɛl nyii nʋɔ a tɩŋ Zeezi har mʋ́.
14 Zeezi há mʋ́ɛ́ lɛ́ nyiidaborwie ná mɛ́, ʋ ná nɩɛ ɓɩkana rɩ ɓa cíkó.
Ɓa susu wuu kánʋ́.
Ɛ́ nɛ́ ʋ́ dúóri nɩɛ ná háá wɩɩlɛ́.
15 Wɩɩsɛ ko pɔrɛ, Zeezi karmɩbɛlɛ tuu pérú a bʋlɛ́:
«Tɔ́ɔ́ bíró rí, ká dɩhɩ̃́ né a gɩ́r; tá nɩɛ ná, a makɛ rɩ́wɔ́ mʋ́ tɔ́nɛ a yɔwɛ ɓɩdííle dí.»
16 Ɛ́ nɛ́ Zeezi bʋ́lwɔ́ rɩ́ bʋlɛ́:
«Ɩ́ lo rɩ́wɔ́ ké; ɩ́ tɩɩ jaa pɔ́wɔ́ rɩ́wɔ́ dí.»
17 Ɛ́ nɛ́ ɓa sɛ́:
«Dɩpɛ́ŋwa bɔmmʋ́ɔ́ arɩ́ náŋwʋlɛ́ bɛllɛ dʋŋɔ nɛ́ mɩ́ŋrá rɩ́ rɛɛ́.»
18 Ɛ́ nɛ́ Zeezi sɛ́:
«Ɩ́ káŋwɔ́ ko páŋ.»
19 Ʋ sɩɛ́ a nɩkana ná ké nyɔ́ɔ́ daha, ká ʋ la dɩpɛ́ŋwa ná bɔmmʋ́ɔ́ arɩ́ náŋwʋlɛ́ ná bɛllɛ, a báŋ bel bána rɩ́, ká bɔ́llɛ Wɩɩsɛ, ká kaa conni conni pɔ́ʋ́ karmɩbɛlɛ, ɓa laa ɓa nɩkana ná.
20 Nɩkana ná wuu dí a vɔksɛ, ká ɓa pa káánɛ sú kúrsi fí rí bɛllɛ.
21 Nɩɛ ná wuu há dí ɛ́ ɓɩdííle, ɓa sɩɛrʋ báála pérí bʋ́ɩ́'ɔmmʋ́ɔ́, ká háála rɩ́ heŋbiisi wɩ́ɛ́ to ráŋ.
Zeezi dɛ́ŋŋɛ́ nyii daha
22 Ɛ́ har rɩ́ mɛ́ nɛ́ Zeezi háárʋ́ karmɩbɛlɛ mɛ́, ɓa isi zʋ nyiidaborwie, a lɔ́ʋ́ sɩ́ɛ́ a kuosi aá daarɛ mʋʋ cɔɔ nɔ́ŋɔ, ká rʋ́ʋ́ tá nɩɛ ná rɩ́wɔ́ col jɩɩsɛ.
23 Ʋ a ɓa wuu col tenni, ká ʋ mʋ́ zɩ́ paalɔ nyúú rʋ́ʋ́ cʋɔlɛ Wɩɩsɛ, ʋ dʋŋɔ.
Tɔ́ɔ́ kúó aá bíri, rɩ Zeezi dʋŋɔ léŋ ní káánɛ́ ráŋ.
24 Ɛ́ tɛ́ŋ mɛ́ rɩ Zeezi karmɩbɛlɛ ná rɩ́wɔ́ nyiidabore ná mɩŋ mʋʋ sɩ́sɩ́ɛ́nnʋ́wa, nyipoo híkli kaá bɛ́ŋŋɛ, bee wɩ́ɛ́ poo fa lú tulé a káŋwɔ́ aá píŋŋi.
25 Zíɓelli wííle mí, Zeezi isi dɛŋŋɛ nyii daha aá mʋ́wɔ́ rɩ́.
26 Ʋ karmɩbɛlɛ ná há nóú rʋʋ dɛ́ŋŋɛ́ nyii aá ko, ɓa dé cícel ní ká bʋlɛ́:
«Lɛlbɩlɩɩlɩ́ nɛ́.»
Héwíŋ há kéŋwó ɛ́, ɓa de cáási.
27 Ɛ́ nɛ́ Zeezi bʋ́lwɔ́ rɩ́ ɓalaɓala bʋlɛ́:
«Ɩ́ pɔrɛ, ŋ nɛ́, ɩ́ sɩ́ héwíŋ fá!»
28 Ɛ́ nɛ́ Pɩɛrɛ sɛ́:
«Nyuutɩna, rɩɩ nɛ́ ɓɩɛ́na é, ɩ a rɩ́ŋ lɩɩ dɛŋŋɛ nyii daha a kóí rí.»
29 Ɛ́ nɛ́ Zeezi sʋ́ʋ́ ko.
Pɩɛrɛ de lɛ nyiidabore ná sɩɛrʋ, a dɛŋŋɛ nyii daha caasɛ Zeezi aá mʋ́.
30 Amá Pɩɛrɛ há bél nyipoo ná dóé, héwíŋ kenú, ʋ púl aá tuwi nyii mʋ́l.
Ɛ́ nɛ́ ʋ cáási bʋlɛ́:
«Nyuutɩna!
Fáŋ búŋse!»
31 Zeezi de tɩ́ɛ́nʋ́ nɛ́sɛ mʋ́l ná tɩɩ tɩɩ mɛ́, a kánʋ́, ká bʋ́lʋ́ rɩ́ bʋlɛ́:
«Ɩ yardá ɓɩɛ́na wɩ óŋ mɔhɛ̃́.
Beé rí tɛ ɩ wɩ́ŋ lɛ́ɛ́ dí?»
32 Ká ɓa wuu bɛllɛ mʋ́ zʋ nyiidabore ná, poo ná siki.
33 Ʋ karmɩbɛlɛ ná wuu fa há mɩŋ nyiidabore ná sɩɛrʋ, ɓa ɓírmi Zeezi sɩ́ɛ́ ká bʋlɛ́:
«Taŋá, ɩ nɛ́ ɓɩɛ́na ká Wɩɩsɛ Bio.»
Zeezi dúóri pʋɔllɛ Zɩnɩzarɛtɛ mɛ́